1 Адкуль-жа войны й ростыркі між вамі? Ці ня стуль: з прыжадлівасьцяў вашых, што буяняць у чэлесах вашых?*
2 Пажадаеце, а ня маеце; забіваеце й завідуеце, ды ня можаце асягнуць; сварыцеся й б’ецеся, а ня маеце таму, што не дамагаецеся.
3 Просіце й не атрымліваеце, бо блага просіце: каб стравіць у вашых похацях.
4 Блудадзейнікі, няўжо ня ведаеце, што прыязьнь гэтага сьвету ёсьць варожая Богу? Хто вось-жа хацеўбы прыязьніцца з гэтым сьветам, стаецца ворагам Бога.*
5 ціж, думаеце, надарма Пісанне гавора: «аж да запаздросьлівасьці любіць дух, што ў вас жыве»?
6 Але тым-большую дае ласку; таму й сказана: «Бог пышным працівіцца, а пакорным дае ласку» (Прып. 3:34).
7 паддавайцеся тады Богу, а супраціўляйцеся дзьяблу, дык уцячэ ад вас.
8 Прыбліжайцеся да Бога, а прыблізіцца да вас. Ахайце рукі, грэшнікі, ачысьцьце сэрцы двудушнікі.
9 Скрушэцеся, плачце і сумуйце, сьмех ваш у журбу хай абернецца, а радасьць у жаль.
10 Супакорцеся перад Богам, а узвышыць вас.
11 Не абражайце, браты, адзін другога. Хто абражае ці асуджае свайго брата, то абражае й судзіць закон, то ты ня выканальнік закону, а судзьдзя.
12 Адзін ёсьць заканадаўча й судзьдзя, які можа загубіць і выбавіць. А хтож ты, што судзіш бліжняга?
13 Вось вы цяпер кажаце: «Сяння, або заўтра пойдзем да таго-там места, пражывём год і будзем гандляваць ды зарабляць» — вы, якія ня ведаеце, што будзе ўзаўтра;
14 што бо такое вашае жыцьцё? Пара, што на хвілінку зьяўляецца ды гіне.
15 Умест таго каб сказаць: «Калі Бог пазволіць», або: «калі жывы будзем, зробім тое ці сёе»,
16 вы надута самаўпэўніваецеся. Такое ўсякае пустахвальства — гэта ганьба.
17 Вось-жа — грэх таму, хто ўмее рабіць дабро, а ня робіць.
Зноскі:
1 Сабечніцтва і завіслівая пажадлівасць натраўляюць чалавека на бліжняга й папіхаюць да благога, але ніколі яго не здавольваюць; ад яго бо аднята духовая раўнавага, супакой, ды малітва яго пахібная, ён бо просіць у Бога не таго, чаго трэба прасіць чалавеку.
4 Запавет Бога з чалавекам ня-раз паясняецца прыкладам у св. Пісанні жанімскай сувязі, а нарушэнне яго жанімскай здрадзе; хто палюбіў свет больш, чым Бога, дык стаецца богаздраднікам, бо любасць Бога да чалавека зайдросная; ён сэрцам адступае ад Аблюбленіка душ.
Ліст святога апостола Якуба, 4 раздзел. Пераклад П. Татарыновіча.
