1 Во днех же сих, умно́жившимся ученико́м, бысть ропта́ние е́ллином {Евреи из стран языческих.}ко евре́ем, я́ко презира́еми быва́ху во вседне́внем служе́нии вдови́цы их.
2 Призва́вше же двана́десять мно́жество учени́к, ре́ша: не уго́дно есть нам, оста́вльшим сло́во Бо́жие, служи́ти трапе́зам.
3 Усмотри́те у́бо, бра́тие, му́жи от вас свиде́тельствованы седмь, испо́лнены Ду́ха Свя́та и прему́дрости, и́хже поста́вим над слу́жбою се́ю.
4 Мы же в моли́тве и служе́нии сло́ва пребу́дем.
5 И уго́дно бысть сло́во сие́ пред всем наро́дом. И избра́ша Стефа́на, му́жа испо́лнена ве́ры и Ду́ха Свя́та, и Фили́ппа, и Про́хора и Никано́ра, и Ти́мона, и Парме́на,и Никола́а прише́льца Антиохи́йскаго.
6 Я́же поста́виша пред апо́столы, и помоли́вшеся положи́ша на ня ру́ки.
7 И сло́во Бо́жие растя́ше, и мно́жашеся число́ учени́к во Иерусали́ме зело́, мног же наро́д свяще́нников послу́шаху ве́ры.
8 Стефа́н же испо́лнь ве́ры и си́лы творя́ше зна́мения и чудеса́ ве́лия в лю́дех.
9 Воста́ша же не́цыи от со́нма глаго́лемаго Ливерти́нска и Кирине́йска и Алекса́ндрска, и и́же от Килики́и и Аси́и, стяза́ющеся со Стефа́ном.
10 И не можа́ху проти́ву ста́ти прему́дрости и Ду́ху, И́мже глаго́лаше.
11 Тогда́ подусти́ша му́жи глаго́лющия, я́ко слы́шахом его́ глаго́люща глаго́лы ху́льныя на Моисе́а и на Бо́га.
12 Сподвиго́ша же лю́ди и ста́рцы и кни́жники, и напа́дше восхи́тиша его́ и приведо́ша на со́нмище.
13 Поста́виша же свиде́тели ло́жны глаго́лющия, я́ко челове́к сей не престае́т глаго́лы ху́льныя глаго́ля на ме́сто свято́е сие́ и зако́н.
14 Слы́шахом бо его́ глаго́люща, я́ко Иису́с Назоре́й сей разори́т ме́сто сие́ и измени́т обы́чаи, я́же предаде́ нам Моисе́й.
15 И воззре́вше нань вси седя́щии в со́нмищи, ви́деша лице́ его́ я́ко лице́ А́нгела.
