1 И я́коже бысть отвезти́ся нам, отто́ргшимся от них, пря́мо ше́дше приидо́хом в Ко́н, в други́й же день в Ро́дос и отту́ду в Пата́ру,
2 И обре́тше кора́бль преходя́щь в Финики́ю, возше́дше отвезо́хомся.
3 Возни́кший же нам Кипр оста́вльше ошу́юю, плы́хом в Сири́ю и приста́хом в Ти́ре, та́мо бо бя́ше кораблю́ изложи́ти бре́мя.
4 И обре́тше ученики́, пребы́хом ту дни́й седмь: и́же Па́влови глаго́лаху Ду́хом не восходи́ти во Иерусали́м.
5 Егда́ же бысть нам сконча́ти дни, изше́дше идо́хом, провожда́ющим нас всем с жена́ми и детьми́ да́же до вне гра́да: и прекло́ньше коле́на при бре́зе помоли́хомся.
6 И целова́вше друг дру́га внидо́хом в кора́бль, они́ же возврати́шася во своя́ си́.
7 Мы́ же, пла́вание наче́нше от Ти́ра, приста́хом во Птолемаи́де, и целова́вше бра́тию, пребы́хом день еди́н у них.
8 Во у́трие же изше́дше Па́вел и и́же с ним, приидо́хом в Кесари́ю, и вше́дше в дом Фили́ппа благове́стника, су́ща от седми́ диа́кон, пребы́хом у него́.
9 Сего́ же бя́ху дще́ри деви́цы четы́ри прорица́ющия.
10 Пребыва́ющим же нам та́мо дни мно́ги, сни́де не́кто от Иуде́и проро́к, и́менем Ага́в,
11 И прише́д к нам и взем по́яс Па́влов, связа́в же свои́ ру́це и но́зе, рече́: та́ко глаго́лет Дух Святы́й, му́жа, его́же есть по́яс сей, та́ко свя́жут его́ во Иерусали́ме иуде́е и предадя́т в ру́це язы́ков.
12 И я́коже слы́шахом сия́, моли́хом мы же и наме́стнии, {та́мошнии жи́тели}не восходи́ти ему́ во Иерусали́м.
13 Отвеща́в же Па́вел и рече́: что творите́, пла́чуще и сокруша́юще ми се́рдце? Аз бо не то́чию свя́зан бы́ти хощу́, но и умре́ти во Иерусали́ме гото́в есмь за и́мя Го́спода Иису́са.
14 Не повину́ющуся же ему́, умолча́хом, ре́кше: во́ля Госпо́дня да бу́дет.
15 По дне́х же сих угото́вльшеся взыдо́хом во Иерусали́м.
16 Приидо́ша же с на́ми и не́цыи ученицы́ от Кесари́и, веду́ще с собо́ю, у него́же бы обита́ти нам, Мна́сона не́коего Ки́прянина, дре́вняго ученика́.
17 Бы́вшим же нам во Иерусали́ме, любе́зно прия́ша нас бра́тия.
18 На у́трие же вни́де Па́вел с на́ми ко Иа́кову, вси же приидо́ша ста́рцы.
19 И целова́в их, сказа́ше по еди́ному ко́еждо, е́же сотвори́ Бог во язы́цех служе́нием его́.
20 Они́ же слы́шавше сла́вляху Бо́га и реко́ша ему́: ви́диши ли, бра́те, коли́ко тем есть Иуде́й ве́ровавших? И вси́ ревни́тели зако́ну су́ть.
21 Увести́шася же о тебе́, я́ко отступле́нию учи́ши от зако́на Моисе́ова живу́щия во язы́цех вся Иуде́и, глаго́ля не обре́зовати им чад свои́х, ниже́ во обы́чаех оте́ческих ходи́ти.
22 Что́ у́бо есть? Вся́ко подоба́ет наро́ду сни́тися: услы́шат бо, я́ко прише́л еси́.
23 Сие́ у́бо сотвори́, е́же ти глаго́лем: суть у нас му́жие четы́ри обеща́вше себе́ Бо́гу.
24 Сия́ пои́м очи́стися с ни́ми и иждиви́ на них, да остри́жут си главы́: и разуме́ют вси, я́ко возвеще́нная им о тебе́ ничто́же суть, но пребыва́еши и сам зако́н храня́.
25 А о ве́ровавших язы́цех мы посла́хом, суди́вше ничто́же таково́е соблюда́ти им, то́кмо храни́ти себе́ от идоложе́ртвенных и кро́ве, и уда́вленины и блуда́.
26 Тогда пое́м Па́вел му́жи о́ны, нау́трие с ни́ми очи́щься вни́де во святи́лище, возвеща́я исполне́ние дней очище́ния, до́ндеже принесено́ бысть за еди́наго коего́ждо их приноше́ние.
27 И я́коже хотя́ху седмь дний сконча́тися, и́же от Аси́и иуде́и, ви́девше его́ во святи́лищи, нава́диша весь наро́д и возложи́ша нань ру́це,
28 Вопию́ще: му́жие изра́ильстии, помози́те, сей есть челове́к, и́же на лю́ди и зако́н и на ме́сто сие́ всех всю́ду учи́т, еще́ же и е́ллины введе́ в це́рковь и оскверни́ свято́е ме́сто сие́.
29 [Бя́ху бо ви́дели Трофи́ма Ефе́сянина во гра́де с ним, его́же мня́ху, я́ко в це́рковь ввел есть Па́вел.]
30 Подви́жеся же град весь, и бысть стече́ние лю́дем, и е́мше Па́вла, влеча́ху его́ вон из це́ркве, и а́бие затвори́шася две́ри.
31 И́щущим же им уби́ти его́, взы́де весть к ты́сящнику спи́ры, я́ко весь возмути́ся Иерусали́м.
32 Он же а́бие пои́м во́ины и со́тники, притече́ на ня, они́ же ви́девше ты́сящника и во́ины, преста́ша би́ти Па́вла.
33 Присту́пль же ты́сящник я́т его́ и повеле́ связа́ти его́ вери́гома желе́знома двема́, и вопроша́ше: кто́ у́бо есть и что́ есть сотвори́л.
34 Друзи́и же и́но не́что вопия́ху в наро́де: не моги́й же разуме́ти изве́стное молвы́ ра́ди, повеле́ отвести́ его́ в по́лк. {Крепость.}
35 Егда́ же бысть на степе́нех, прилучи́ся воздви́жену бы́ти ему́ от во́ин ну́жды ра́ди наро́да.
36 После́доваше бо мно́жество люде́й зову́щих: возьми́ его́.
37 Хотя́ же вни́ти в по́лк Па́вел глаго́ла ты́сящнику: а́ще ле́ть ми́ есть глаго́лати что́ тебе́? Он же рече́: гре́чески уме́еши ли?
38 Не ты ли еси́ Еги́птянин, пре́жде сих дни́й превеща́вый и изведы́й в пусты́ню четы́ри ты́сящи муже́й сикаре́й?
39 Рече́ же Па́вел: аз челове́к у́бо есмь Иуде́анин, Та́рсянин, сла́внаго гра́да в Килики́и жи́тель: молю́ же тя, повели́ ми глаго́лати к лю́дем.
40 Повеле́вшу же ему́, Па́вел стоя́ на степе́нех помаа́в руко́ю к лю́дем: мно́гу же безмо́лвию бы́вшу, возгласи́ евре́йским язы́ком, глаго́ля:
