1 Бы́сть же во Икони́и, вку́пе вни́ти и́ма в со́нмище Иуде́йское и глаго́лати та́ко, я́ко ве́ровати Иуде́ев и Е́ллинов мно́жеству мно́гу.
2 Неве́рующии же Иуде́и воздвиго́ша и озло́биша {к зло́бе подъусти́ша}ду́ши язы́ков на бра́тию.
3 Дово́льно же у́бо вре́мя пребы́ша дерза́юще о Го́споде, свиде́тельствующем сло́ву благода́ти Своея́ и даю́щем зна́мения и чудеса́ бы́ти рука́ма их.
4 Раздели́ша же ся мно́жество гра́да: и о́ви у́бо бя́ху со Иуде́и, о́ви же со Апо́столы.
5 И я́коже бы́сть стремле́ние язы́ком же и Иуде́ем с нача́льники их, досади́ти и ка́мением поби́ти их.
6 Уве́девша же, прибего́ста во гра́ды Ликао́нския, в Ли́стру и Де́рвию, и во окре́стныя их,
7 И та́мо бе́ста благовеству́юща.
8 И не́кто муж в Ли́стрех не́мощен нога́ма седя́ше, хром от чре́ва ма́тере своея́ сый, и́же николи́же бе ходи́л.
9 Сей слы́шаше Па́вла глаго́люща, и́же воззре́в нань и ви́дев, я́ко ве́ру и́мать здрав бы́ти,
10 Рече́ ве́лиим гла́сом: тебе́ глаго́лю во и́мя Го́спода Иису́са Христа́, вста́ни на но́гу твою́ прав. И а́бие возскочи́ и хожда́ше.
11 Наро́ди же ви́девше, е́же сотвори́ Па́вел, воздвиго́ша глас свой, ликао́нски глаго́люще: бо́зи уподо́бльшеся челове́ком снидо́ша к нам.
12 Нарица́ху же у́бо Варна́ву Ди́а, Па́вла же Ерми́а, поне́же той бя́ше нача́льник сло́ва.
13 Жрец же Ди́ев, су́щаго пред гра́дом их, приведе́ юнцы́, и принесе́ венцы́ пред врата́, с наро́ды хотя́ше жре́ти.
14 Слы́шавша же апо́стола Варна́ва и Па́вел, растерза́вша ри́зы своя́, вскочи́ста в наро́д, зову́ща и глаго́люща:
15 Му́жие, что сия́ твори́те? И мы подобостра́стна есма́ вам челове́ка, благовеству́юща вам, от сих су́етных обраща́тися к Бо́гу жи́ву, И́же сотвори́ не́бо и зе́млю, и мо́ре и вся, я́же в них.
16 И́же в мимоше́дшия ро́ды оста́вил бе вся язы́ки ходи́ти в путе́х их.
17 И у́бо не несвиде́тельствована Себе́ оста́ви, благотворя́, с небесе́ нам дожде́вы {дожди́}дая́, и времена́ плодоно́сна, исполня́я пи́щею и весе́лием сердца́ на́ша.
18 И сия́ глаго́люща, едва́ уста́виста наро́ды не жре́ти и́ма, но отыти́ коему́ждо во своя́си. Пребыва́ющема же и́ма и уча́щема,
19 Приидо́ша от Антиохи́и и Икони́и не́цыи Иуде́е, и стяза́ющемася и́ма с дерзнове́нием, наусти́ша наро́ды отступи́ти от нею́, глаго́люще: я́ко ничто́же и́стинно глаго́лета, но все лже́та. И наусти́вше наро́ды и ка́мением поби́вше Па́вла, извлеко́ша вне гра́да, мня́ще его́ уме́рша.
20 О́крест же ста́вшим его́ ученико́м, воста́в вни́де во гра́д. И нау́трие изы́де с Варна́вою в Де́рвию.
21 Благовествова́ста же гра́ду тому́ и научи́ста мно́ги, возврати́стася в Ли́стру и Икони́ю и Антиохи́ю,
22 Утвержда́юща ду́ши ученико́в, моля́ща пребы́ти в ве́ре, и я́ко мно́гими скорбьми́ подоба́ет нам вни́ти в Ца́рствие Бо́жие.
23 Рукополо́жше же им пресви́теры на вся це́ркви и помоли́вшеся с посто́м, преда́ста их Го́сподеви, в Него́же ве́роваша.
24 И проше́дша Писиди́ю, приидо́ста в Памфили́ю.
25 И глаго́лавша в Перги́и сло́во Госпо́дне, снидо́ста во Аттали́ю.
26 И отту́ду отплы́ста во Антиохи́ю, отню́дуже бе́ста пре́дана благода́ти Бо́жией в де́ло, е́же сконча́ста.
27 Прише́дша же и собра́вша це́рковь, сказа́ста, ели́ка сотвори́ Бог с ни́ма и я́ко отве́рзе язы́ком дверь ве́ры.
28 Пребы́ста же та́мо вре́мя не ма́ло со ученики́.
