1 Прии́де же в Де́рвию и Ли́стру. И се, учени́к не́кий бе ту, и́менем Тимофе́й, сын жены́ не́кия Иуде́аныни ве́рны, отца́ же Е́ллина:
2 И́же свиде́тельствован бе от су́щих в Ли́стрех и Икони́и бра́тии.
3 Сего́ восхоте́ Па́вел с собо́ю изы́ти: и прие́мь обре́за его́ Иуде́й ра́ди, су́щих на ме́стех о́нех: ве́дяху бо вси отца́ его́, я́ко Е́ллин бя́ше.
4 И я́коже прохожда́ху гра́ды, предая́ше им храни́ти уста́вы сужде́нныя от Апо́стол и ста́рец, и́же во Иерусали́ме.
5 Це́ркви же утвержда́хуся ве́рою и прибыва́ху в число́ по вся дни.
6 Проше́дше же Фриги́ю и Галати́йскую страну́, возбране́ни бы́ша от Свята́го Ду́ха глаго́лати сло́во во Аси́и.
7 Прише́дше же в Миси́ю, покуша́хуся в Вифини́ю поити́: и не оста́ви их Дух.
8 Преше́дше же Миси́ю, снидо́ша в Троа́ду.
9 И виде́ние в нощи́ яви́ся Па́влу: муж не́кий бе Македо́нянин стоя́, моля́ его́ и глаго́ля: прише́д в Македо́нию, помози́ нам.
10 И я́коже виде́ние ви́де, а́бие взыска́хом изы́ти в Македо́нию, разуме́вше, яко призва́ ны Госпо́дь благовести́ти им.
11 Отве́зшеся же от Троа́ды, приидо́хом в Самофра́к, во у́трие же в Неапо́ль,
12 Отту́ду же в Филиппу́сы, и́же есть пе́рвый град ча́сти Македо́нии, коло́ниа. Бе́хом же в том гра́де пребыва́юще дни не́кия.
13 В день же суббо́тный изыдо́хом вон из гра́да при реце́, иде́же мня́шеся моли́твенница бы́ти, и се́дше глаго́лахом к собра́вшимся жена́м.
14 И не́кая жена́, и́менем Лиди́а, порфиропрода́льница от гра́да Фиати́рскаго, чту́щи Бо́га, послу́шаше: е́йже Госпо́дь отве́рзе се́рдце внима́ти глаго́лемым от Па́вла.
15 Я́коже крести́ся та и дом ея́, моля́ше ны глаго́лющи: а́ще смотри́сте мя ве́рну Го́сподеви бы́ти, вше́дше в дом мой, пребу́дите. И прину́ди нас.
16 Бысть же иду́щим нам на моли́тву, отрокови́ца не́кая иму́щая дух пытли́в сре́те нас, я́же стяжа́ние мно́го дая́ше господе́м свои́м волхву́ющи.
17 Та после́довавши Па́влу и нам, взыва́ше глаго́лющи: си́и челове́цы раби́ Бо́га Вы́шняго суть, и́же возвеща́ют нам путь спасе́ния.
18 Се же творя́ше на мно́ги дни. Стужи́в же си Па́вел, и обра́щся, ду́хови рече́: запреща́ю ти и́менем Иису́са Христа́, изы́ди из нея́. И изы́де в том часе́.
19 Ви́девше же госпо́дие ея́, я́ко изы́де наде́жда тяжа́ния их, пое́мше Па́вла и Си́лу, влеко́ша на торг ко князе́м.
20 И вве́дше их к воево́дам, ре́ша: си́и челове́цы возмуща́ют град наш, иуде́е су́ще.
21 И завещава́ют обы́чаи, я́же не досто́ит нам приима́ти, ни твори́ти, ри́мляном су́щим.
22 И сни́деся наро́д на них, и воево́ды растерза́вше им ри́зы, веля́ху па́лицами би́ти их.
23 Мно́ги же да́вше им ра́ны, всади́ша в темни́цу, завеща́вше темни́чному стра́жу тве́рдо стрещи́ их.
24 И́же таково́ завеща́ние прие́м, всади́ их во вну́треннюю темни́цу, и но́ги их заби́ в кла́де.
25 В полу́нощи же Па́вел и Си́ла моля́щася поя́ста Бо́га, послу́шаху же их ю́зницы.
26 Внеза́пу же трус бысть ве́лий, я́ко поколеба́тися основа́нию темни́чному, отверзо́ша же ся а́бие две́ри вся, и всем ю́зы ослабе́ша.
27 Возбу́ждься же темни́чный страж, и ви́дев отве́рсты две́ри темни́цы, извле́к нож, хотя́ше себе́ уби́ти, мня избе́гша ю́зники.
28 Возгласи́ же гла́сом ве́лиим Па́вел, глаго́ля: ничто́же сотвори́ себе́ зла, вси бо есмы́ зде.
29 Проси́в же свещи́, вскочи́, и тре́петен быв, припаде́ к Па́влу и Си́ле.
30 И изве́д их вон, рече́: госпо́дие, что ми подоба́ет твори́ти, да спасу́ся?
31 О́на же реко́ста: ве́руй в Го́спода Иису́са Христа́, и спасе́шися ты и весь дом твой.
32 И глаго́ласта ему́ сло́во Госпо́дне, и всем и́же в дому́ его́.
33 И пое́м я́ в той же час но́щи, измы́ от ран, и крести́ся сам и свои́ ему́ вси а́бие.
34 Введ же я́ в дом свой, поста́ви трапе́зу, и возра́довася со всем до́мом свои́м, ве́ровав Бо́гу.
35 Дню же бы́вшу, посла́ша воево́ды па́личники, глаго́люще: отпусти́ челове́ка о́на.
36 Сказа́ же темни́чный страж словеса́ сия́ Па́влу, я́ко посла́ша воево́ды, да отпуще́на бу́дета: ны́не у́бо изше́дша, иди́та с ми́ром.
37 Па́вел же рече́ к ним: би́вше на́ю пред людьми́, неосужде́нна челове́ка Ри́млянина су́ща, всади́ша в темни́цу, и ны́не о́тай изво́дят на́ю? Ни у́бо, но да прише́дше са́ми изведу́т на́ю.
38 Сказа́ша же па́личницы воево́дам глаго́лы сия́: и убоя́шася слы́шавше, я́ко Ри́млянина еста́.
39 И прише́дше умоли́ша их и изве́дше моля́ху изы́ти из гра́да.
40 Изше́дша же из темни́цы приидо́ста к Лиди́и, и ви́девша бра́тию, уте́шиста их и изыдо́ста.
