О Павле како знайде Тімофея и обреза его, и поя съ собою • О проповеданіи Павлове въ Макидоніи • И како уздравилъ девицу имущу духа веща, егоже бивши вовергоша в темницу, потом выпустиша •
1 Пришед же Павелъ во Дервинь, и въ Листру • И се вченикъ некій бе ту, именем Тимофей • Сынъ жены некия Іудеанины верующее во Христа • От отца же Елліна •
2 О немже славу добрую выдавали, живущие в Листре, и во Іконии братия •
3 Сего восхоте Павелъ дабы с нимъ ходилъ, и приемъ обреза и, деля Іудеи живущих на местехъ онехъ, ведяху бо вси отца его яко Еллин бяше •
4 И внегда прохожаше грады, предааше имъ хранити нравы, уставленыя от Апостолъ, и старець во Ерусалиме •
5 Церкви же утвержахуся верою, и прибываше число их по вся дни •
6 Прошедши ж Фригию, и Галатійскую страну • Возбранены от Святого Духа глаголати слово Божие во Асіи •
7 И пришедше во Мисию покушастася ити во Вифінию, и не допусти имъ Духъ •
8 И егда прошли Мисію сънидоша во Троаду •
9 И видение в нощи явися Павлу, якобы неякій мужъ Макидонянинъ стоялъ, и моли его, глаголя: пришедъ во Макидонию помози намъ •
10 И якожъ видение виде, скоро возыска изыіти во Макидонию, разумеюще тое яко прізываеть ест Господь благовестити имъ •
11 И отвезшеся от Троады, приплыша во Самофракъ, назаутрей же во Неаполімъ •
12 И оттоле во Філипусы, еже ест первая часть Макидоніи, град колония • Беху же в томъ граде пребывающе дне неколико •
13 Во день же суботный изыдоша вонъ изъ града къ реце, идеже мнешеся молитвеница быти, и седъше глаголаху къ собравшимся женамъ •
14 И некая жена именемъ Лидия, от Порфірополя града Фиатирска чтуще Бога, послухаше • Ейже Господь отвръзе серце, дабы пилна была слов глаголемых от Павла • Якоже крестися сия, и домъ ея, умоли глаголюще:
15 Понеже имате мя верну Господеви быти, вошедши въ домъ мой пребудите, и принути их •
16 Бысть же идущим на молитву, рабыни некая имуще духъ вещій стрете их, онаже пожитокъ великіи приносила господаремъ своимъ вещуючи •
17 Тая последствуючи Павлу имъ вопиаше глаголюще: сіи человеци, раби Бога Вышнего суть, они же возвещають намъ путь спасения,
18 и сее чинивала за много дніи • Стужив же Павелъ, и обратився духови рече: завещаваю тобе о имени Ісусъ Христове, изыди от нея • И изыде в томъ часе •
19 Видевши же господари ея, яко изыде надежа пожитку им • Похопивше Павла, и Силу привлекоша на торгъ ко князем,
20 и приведши их пред воеводы рекоша: сіи человеци возмущають град нашъ, ониже суть Іудеи,
21 и завещавают обычае, ихже не достоить намъ пріимати, и ни творити Римляномъ сущимъ •
22 И зъбежался народъ на не • И воеводы растръзавше на них ризы, веляху палицами е бити •
23 И многы давше имъ раны, въсадиша их въ темницу, завещавше темъничьному стражу твердо стрещи е •
24 Онже завещание приемъ, въсади их во нутреную темницу, и ногы ею заби въ кладе •
25 Въ полунощи же Павелъ, и Сила молящеся хваляху Бога поюще, и послушаху их ужници •
26 И скоро трусъ земли стался ест великъ, тако иже поколебалося основание темнице • Отверзошеся же абие все двери, и всемъ узы ослабеша •
27 Тогда обудися темничный стражъ, и егда виделъ отверсты двери темнице, изъвлекъ ножъ, хотяше себе убити, мня избегша юзникы •
28 Возопи же гласомъ великимъ Павелъ глаголя: ничего же чини собе зла, вси бо есмы зде •
29 Попросив же свеща вскочи, и трепетенъ сый припаде къ Павлу, и Силе •
30 Изведъ их вонъ рече: господие что ми подобаеть вчинити да спасуся?
31 Они же рекоша ему: веруй въ Господа Ісуса Христа, и спасешися ты, и весь домъ твой •
32 И глаголаста ему слово Господьне и всемъ еже в дому его •
33 И поемъ их тогожъ часу в нощи, омылъ раны имъ • И крестися самъ со всею челядию своею без мешкания,
34 внегда ж увелъ е в домъ свой, зготовилъ столъ • И возрадовася со всею челядию своею, яко верова Богови •
35 Дневи же бывшу послаша воеводы слуги своя глаголюще выпустити человека она •
36 Сказа же темничный страж словеса сия Павлу, яко послаша воеводы, да отпущени будете • И ныне, вышедше идите с миром •
37 Павел же рече к нимъ: бивше насъ предъ людми, не осудивши, человека Римлянины, всадиша в темницу • И ныне тайно изводите насъ? Ни убо, но да пришедше сами изведуть •
38 Отказаша же слуги слова сия воеводамъ, и бояшеся услышавши яко Римлянина еста •
39 И пришедше умолиша е, и изъведше жадали их дабы вышли изъ града •
40 Вышедши же с темници пришли суть ко Лидіи, и видевше братию утешиша ихъ, и изыідоша •
