О гадании Апостолов во Ерусалиме и маем ли обрезатися, о листе еже послаша во Антиохию, о розделеніи Павла с Варнавою •
1 И неціи пакъ пришедъше от Іудея, учаху братию глаголюще: не обрежете лі ся по обычаю Моисееву не можете спастися •
2 Бывши же распри, и стязанию немалу Павла, и Варнавы к нимъ, установиша на томъ, абы Павелъ и Варнава шли до Ерусалима, и некие иные с ними ко Апостоломъ, и старцемъ, о вопрошеніи сем •
3 Тогда они суще выпроважени от церкві прохожаху Фіникию, и Самарию, поведающе обращение погановъ • И чиняху радость велию всей братіи •
4 Пришедши же во Ерусалимъ, приата быста от церкви, и от Апостолъ, и от старець • Споведаша же им елика сътвори Богъ с нима, и яко отверзе языкомъ дверь веры •
5 Восташа же неціи от сонма фарисейскаго, веровавшие глаголюще • Яко подобаеть обрезати их, и завещавати блюсти законъ Моисеовъ •
6 Собралися же Апостоли, и старци сведети о словеси сем •
7 Многу же взысканию бывшу • Воставъ Петръ рече к ним: мужие братия вы весте яко от дней первых, Богъ в насъ избра дабы усты моими услышали языци благовествование и веровали •
8 И Серцевидець Бог сведетелствовал, давъ имъ Дух Святыі, якоже и намъ,
9 и ничтоже раздели между нами и онеми, верою убо очистил серца их •
10 Ныне же что искушаете Бога, хотяще возложити иго на шию ученикомъ, егоже ни отци наши, ани мы возмогохом понести?
11 Но благодатию Господа Ісуса Христа веруемъ спастися якожъ и они •
12 Тогда умолкоша все множство, и послушаху Варнавы, и Павла, поведающих елика сътвори Богъ знамения, и чудеса во языцехъ с нима •
13 По умолчанию же ею отвеща Іаковъ глаголя: мужие братия послушайте мене •
14 Симонъ поведалъ, яко ест Богъ напредъ наведил імъ, абы принял от язык люди во имя Свое •
15 И сему согласують словеса пророкъ, якоже пишеть:
16 По сих навращуся, и созіжду храмъ Давыдовъ падший, и раскопания его направлю, и воздвигну и,
17 яко да прочіи человеци возыщуть Господа, и вси языци над ними же призывано ест имя Мое, глаголеть Господь творяй вся сия •
18 Разумна суть Богови от века вся дела Его •
19 Для того азъ сужу, не стужати тымъ ониже от язык обращаются къ Богу •
20 Но написати к нимъ, да выстерегаются от требъ идолскых, и от блуда, и от удавленины, и от крови • И елика невгодна собе быти, инымъ не чинити •
21 Моисей бо от родов давных во всех градех проповедающих себе имат во сонмищи, идеже на каждую суботу чьтется •
22 Тогда полюбилосе Апостоломъ, и старцем, и всему собору • Абы выбраные от себе муже послали во Антиохию, съ Павломъ, и Варнавою • Іуду нарицаемаго Варсаву, и Силу мужа нарочиты во братіи пославши листы
23 рукою их, писаны сеце: Апостоли, и старци, и братия • Тымъ ониже суть во Антиохіи, в Сиріи, и въ Киликіи братиямъ, иже от языкъ навращеным о Господи радоватися усказуемъ •
24 Понеже убо слышахом, яко неціи пришедше от нас возмутиша васъ словесы, развращающе душе ваше, веляще вамъ обрезатися, и блюсти законъ • Имъже того мы не розказали •
25 И изволися намъ бывшимъ посполу выбравши мужей послати къ вамъ • Со возлюбленными нашими Варнавою и Павломъ,
26 человекома, ониже предаша душе свое, для имене Господа нашего Ісуса Христа •
27 Послахом же Іуду, и Силу, и техъ словом усказуемъ таяжде •
28 Слюбилося ест Духу Святому, и намъ, ни едина на васъ воскладати бременя • Развей толико потребных сихъ:
29 Да воздеръжитеся от жертвъ ідольских, и от крови, и от удавленины, и от блуда, и елика не хощете вамъ быти, другим не чините • От нихже соблюдающе себе, добре сотворите, здравъствуйте •
30 Тогда они послани бывше, пріидоша во Антиохию • И собравши множество, подаша имъ листъ •
31 Прочетши же возрадовашеся о утешеніи •
32 Іуда же, и Сила пророци суще, словами многыми утешиста братию, и утвердиста •
33 И ту пребывше некое время, отпущена быста с миромъ от братіи ко Апостолом •
34 И захотелося Силе остати ту • Іуда пакъ самъ навратился во Ерусалимъ •
35 Павелъ же, и Варнава живяху во Антиохіи, учаще и благовествующе, со иными многыми слово Господьне •
36 По некоихъ же днехъ рече Павелъ ко Варнаве: возвратившися подобаеть намъ наведити братию нашу во всехъ градехъ, в нихже проповедахомъ слово Господьне, како ся имеють •
37 Варнава пак совеща абы поняли съ собою и Іоанна нарицаемаго Марка •
38 Павелъ же глаголаше: занеж отступилъ от насъ во Памфиліи и не шолъ на дело с нами, в немже положени быхомъ, не понимаймы его съ собою •
39 И бысть межи неми распря, тако иже разлучишеся от себе • Варнава убо поимъ Марка отплыл во Кипръ •
40 Павелъ же выбравъ собе Силу, изыде преданъ благодати Божией от братіи,
41 прохожаше ж Сирію, и Киликию, утвержая церкви •
