ПОЧИНАЕТЬСЯ КНИГА ДЕАНИЯ • И ПОСЪЛАНИЯ АПОСТОЛЬСКАЯ, ЗОВЕМАЯ АПОСТОЛЪ, З БОЖИЮ ПОМОЧЬЮ СПРАВЪЛЕНА ДОКТОРОМЪ ФРАНЪЦИСКОМЪ СКОРИНОЮ С ПОЛОЦЬКА •
ДЕАНИЯ СВЕТЫХЪ АПОСТОЛЪ КНИГЪ ПРЕДМОВА БОГУ КО ЧТИ ПОЧИНАЕСТЕ
Великий Лука Анътиохийский в лекарскихъ наукахъ докторъ пренавченый • И Евангелистъ Ісусъ Христовъ предивный • Товаришъ славнаго всехъ народовъ учителя, и Апостола Господьня Павла • Онже будучи лекаремъ телеснымъ досконалымъ • Видяй вси речи телесные иже суть суетны, и минущи • Возжеле быти лекаремъ душъ наших, еже на образъ, и на подобенство превечного Бога створеныхъ • Зналъ убо иже не толико живъ естъ человекъ хлебом, или лекарствомъ • Но боле всякимъ словомъ, еже походить изъ устъ Божіихъ • Которым же небеса утвердишеся • Земля основана бысть • Водам пределы положены сут, и вси видимые, и невидимые речи сотворены быша, еже мимо идуть • Слово толико само Господьне пребываеть во вся веки • Прото святый Лука писалъ ест о слове Божиемъ, навышшей, наистей, и нарядней, нежели иные • Яко самъ о томъ на початку Еивангелия своего • Пиша ко Феофилу, светчить глаголя: изволися и мне последовавшу • Выше всехъ, испытно, по ряду писати •
Почалъ бо от бывших прежде нарожения Слова Божия • Яко о дивномъ зачатіи Иоанна Предтечи, о нароженіи его • Таже о благовестованіи Архангела Гаврила ко девици матери Божией Маріи • О нихже ни единый Еивангеліста писалъ естъ •
Потомъ о нароженіи нашего Спасителя Ісуса Христа Сына Божія, о принесеніи Его во храмъ Божій • И о гаданіи со докторы во церкви, истее нежели иные выписуеть • Таж по ряду о житіи • О навченіи, о добродеаніи, о страданіи, о вмученіи, и о воскресеніи Его из мертвых яко и иніи Еивангелисты кажеть •
В сей пакъ книзе Деаній Апостольскыхъ • Напочатку ихъ великую часть святого Еввангелия Христова выписуеть • По чемъ быхомъ ведали, яко Господь уступовалъ на небо • Намъ путь за собою указуя • Которого часу, четыредесятого дня по востаніи Его из мертвых • На которомъ месте • На горе Елеонъ, версту от Ерусалима • Суботенъ имущи путь • Занежъ Іудеи не можаху дале в суботу ходити толико тысещу ступеней иже ест верста едина • Кто при томъ былъ, святые Апостоли, и множество мужей от Галилеи • Кто сведетелствовалъ о Немъ яко имать пріити судити живыхъ и мертвыхъ • Два мужа во одежди белой •
Теже о Святомъ Духу како на Апостолы во огненыхъ языцехъ бысть прежде обещаный сошедлъ • И яко начаша разными языки слово Божие проповедати • И яко ся почала вера Христова розмножати •
Прото якоже писалъ естъ первей во святомъ чтеніи, от начала нарожения Господа нашего Ісуса Христа • Такожъ и сезде даж до вознесения на небеса житие Его все • Ширей ясней, и досконалей нежели иные Еивангелисты выписуеть •
Затымъ починаеть жития или деания святых Апостолъ • А наболей дву верховных святого Петра, и святого Павла • Емуже товаришемъ былъ доводне сказывати • А тако имате в сей хвалебной книзе, о початку, о розмножении, и о утверженіи церкви христианское • И яко ся напредъ почали называти христиане, тоестъ помазанъники Божіи, и цари будущего века • Теже яко ся почали празники Господьскые, яко Великъдень и неделя, на небо воступление и пятьдесятница • Яко бо по выштіи сыновъ Ізраилевых з неволи египетское пятдесятого дня данъ естъ Ветхый Законъ • Тако по выкупленіи нашемъ из моци бесовъское, пятдесятого дня сосланъ ест Духъ Святый •
Ту знайдешъ о церковной службе еже естъ во преломленіи посвещеного хлеба • Ту знайдешъ о церковной науце, еже вся обща христианомъ имети • Ту знайдешъ о церковной единоте, иже всемъ с любовию молитися вкупе • Ту ест о первоепископехъ • О перводиаконехъ • О первомученикохъ • О первоучителехъ • О первосветителехъ • О первочудотворъцехъ, и о всехъ иныхъ веры Христовы розмножителехъ •
А тако святый Лука Евангелиста во первыхъ книгахъ своих, о зернети сокровенномъ в земли писалъ ест, во сих же других пишеть, о томже возрастающем, процветающем, и плодъ безчисленый выдающемъ • Яко на первомъ казаніи святого Петра приступиша ко вере Христове и крестишеся мужевъ боле трехъ тысещъ, што жъ пакъ потомъ, наболей епистолами и проповеданиемъ святого Павла, и иных святыхъ Апостолъ ониже всю вселенную навратиша • Пророком убо данъ былъ духъ единым языкомъ еврейскимъ или халдейскимъ ко людемъ глаголати • Апостолом же, и верующимъ во Христа, данъ бысть Духъ Святый всеми языки еже суть подъ солнецемъ, правду Божию, слово избавления, и Царство Небесъное провещевати • Ониже насъ от тяжкостей, и от бременъ Ветхаго Закона вызволили суть • Нового жития небесного на земли живущихъ навчили суть • Веру, надежу, любовь проповедали суть • Дабы иные на свете збирали сокровіща • Иные крепости • Иные богатства • Иные премудрости • Не наследуючи сего суетнаго и отменнаго веку • Не боячися мучителей, ни смерти, ни диавола • Не гневаючи, ни злоречечи, ни обидечи ближнего своего • И к тому яко ся имамы заховати ко братіи своей, яко к родителемъ, яко ко старейшимъ, яко ко младшимъ, яко ко немощнымъ, яко ко иноверкомъ, и яко ко всякому человеку •
Наболей пакъ святый Лука в сей книзе ку концу пишеть • О навращеніи дивномъ ко вере Христове, святого Апостола Павла • О проповеданіи его, о хоженіи, и плаваніи его по морю даже до Рима • И тако скончеваеть книгу сию •
Конець сказанию •
