О зависти Жидовской ко Апостолом, и яко Петръ отповедел имъ • О набожной молитве верующих во Христа • И о светомъ житіи их •
1 Глаголющим же имъ к людемъ найдоша на них свещенници и воевода церковный, и саддукеи,
2 жалующе того иже учать людей, и возвещають о імени Ісусове воскресение изъ мертвыхъ •
3 И возтягоша на нихъ руце, и положиша их в соблюдение до утра, бе бо вечеръ уже •
4 Мнози же отслышавших слово вероваша, и бысть число мужей яко пять тысещъ •
5 Бысть же наутрей • Собралися князи ихъ • И старейшины • И книжъници во Иерусалимъ,
6 и Аннан архиерей, и Каіафа, и Іонна, и Алексадръ, и елици беша от рода архиерейска •
7 И поставльше их посреде вопрошаху: коею силою и коімъ именем сотвористе сее вы?
8 Тогда Петръ исполнися Духа Свята, рече к нимъ: князи людстии, и старейшины Ізраилевы •
9 Естъ ли же насъ пытаете о добродеании человека хромого, о чемъ сей исцелися •
10 Разумно буди всемъ вамъ, и всемъ людемъ Ізраилевым • Яко во імя Ісуса Христа Назорея, Егоже вы распясте, Егоже Бог воскреси от мертвых • О Сем сей стоить пред вами здрав •
11 Сей естъ камень укореный от васъ зижущих бывый во главу углу, и несть о ином ни о единомъ спасения,
12 несть бо иного имени под небесем даного человеком о нем же подобает спастися намъ •
13 Видящи же Петрово дръзновение, и Іоанново • И зразумевша яко человеци не книжни еста и прости, дивляхуся знаяху же их яко со Ісусом беста •
14 Человека же видеста с нима стояща исцелевъшаго, ничтоже можаху противу рещи •
15 Повелевшим же има вонъ изъ сонмища изыти стязахуся къ собе
16 глаголюще: что сотворим человекома сима? Яко убо разумно быст знамение, бывшее ими, всемъ живущим во Иерусалиме • Явно ест и не можемъ запрети,
17 но да не более прострется в людехъ, прещениемъ да запретим има, къ тому не глаголати о имени семъ ни единому человеку •
18 И призвавше их заповедаша имъ отнудь не провещавати ни учити о имени Ісусове •
19 Петръ же и Іоаннъ отвещавше к нимъ, рекоша: праведно ли ест то пред Богомъ, васъ послушати более, нежли Бога, судите •
20 Не можем бо мы яже видехом и слышахом, не глаголати •
21 Они же пригрозивше имъ, пустиша е, ничтоже обретше како мучити их, людей ради, яко вси прославляху Бога о бывшемъ •
22 Леты бо бяше множайшими четыридесяте человек той, о немже быстъ чудо сее исцеления •
23 Отпущена ж бывша пріидоша ко своим и возвестиша елика к нимъ архиереи и старейшины реша •
24 Они же слышавше единодушно воздвигоша гласъ къ Богу, и рекоша: Владыко Боже сотворивый небо, и землю, и море, и вся яже въ них •
25 Иже усты Давыда отрока Своего рекый: въскую шаташеся языци, и людие повчишася тщетным?
26 Предсташа царие земстіи, и князи собрашеся вкупе, на Господа и на Христа Его •
27 Собрашеся воистинну во граде семъ на Святого Отрока Твоего Ісуса Егоже помаза • Иродъ, и Понтиский Пилатъ, со языки, и людми Ізраилевыми вчинити •
28 Елика рука Твоя и советъ Твой прежде нарче быти •
29 И ныне Господи призри на запрещения их, и дай жъ рабом Твоимъ со всем дръзновениемъ глаголати слово Твое •
30 Простри руку Твою да бывають исцеления, и знамения, и чудеса іменемъ Святымъ Сына Твоего Ісуса,
31 и помолившимся имъ, подвижася место, идеже бяху собрани, и исполнишеся вси Духа Свята, и глаголаху слово Божие со деръзновениемъ •
32 Народу же веровавшему бе серце едино, и душа едина, и ни единъ же что от имения своего, поведаше свое быти • Но бяху имъ вся обща,
33 и велию силою воздаяху Апостоли сведетелство о воскресеніи Ісуса Христа • И милость велия была ест межи всеми ими,
34 не бяше бо нищъ ни единъ в них, но елици быша господие селом, или домомъ, продающе приношаху цены продаемых,
35 и полагаху е пред ноги Апостолъ • И розделеваху единому каждому, еже аще кто что требоваше •
36 Осій же нарицаемый от Апостолъ Варнава, еже исказуется сын утешенія с племеня Леввиева, Кипрянин родом
37 имея село, продавъ принесе цену и положи пред ноги Апостолъ •
