О погребеніи Стефанове • О гоненіи Савулове • О проповеданіи Філиппове въ Самарыи • О крещеніи евнуха • О сошествии Святого Духа на поганы, и о Сімоне волхве •
1 Савулъ теже изволяша ко убійстьву его • Бысть же в той день гонение велие на христианы живущие во Ерусаліме, и вси разбегошеся по странам Іудеи, и Самареи, кроме Апостол •
2 Погребоша же Стефана мужи богобойніи, и вчинили плачь велик над нимъ •
3 Саулъ же озлобляше христианы, по домехъ ходя влачаше мужа и жены, и даяше до темница •
4 Тые пакъ они же были розбеглися, ходили благовестующе слово Божие •
5 Филиппъ же пришед во градъ Самарею проповедаше имъ Христа •
6 И пріимаху народи глаголемое от Філиппа единодушно слышачи и видячи знамения еже творяше •
7 Многым же имуще духи нечисты, вопиюще гласомъ веліимъ исхожаху • Мнози и раслаблени, и хроми исцелени суть •
8 И бысть радость велия во граде томъ •
9 Муж пакъ некій именем Симонъ, онже первее во граде бе чаруя, и сводя людей Самарейскихъ поведая себе быти некоего веліка,
10 егоже послушаху вси от мала даж и до велика глаголющи: сей ест сила Божия великая
11 и внимаху ему занеже велие время удивляше их чародеаниемъ своимъ •
12 И внегда вероваша Філиппу благовестующу яже о Царствіи Божіи, и о имени Ісусъ Христове • Крещахуся мужие и жены •
13 Симон же и той верова, и крестився пребываше у Філиппа видя силы и знамения велия бываемая ужасенъ дивляшеся •
14 Внегда же услышали Апостоли во Ерусалиме, яко прияла Самария слово Божие • Послаша к нимъ Петра и Іоанна,
15 сии же пришежше помолишеся о нихъ да пріимуть Духъ Святый •
16 Понеже еще ни на единого з нихъ не былъ напал, толіко крещені быша во имя Господа Ісуса •
17 Тогда возъложили на не руце, и пріимаху Духъ Святый •
18 Видев же Симонъ яко возложениемъ руку Апостолъ дается Духъ Святый, принесе имъ сребро,
19 глаголя: дайте и мне власть сию, да на негоже положу руце прииметь Дух Святый •
20 Рече к нему Петръ: сребро твое с тобою да будеть у пагубу, яко даръ Божій мнелъ еси сребромъ купити,
21 несть ти части ни жребия о словеси семъ • Ибо серце твое несть праведно пред Богомъ •
22 Покайся ныне о злости своей и помолися Богу, еда убо отпустит ти ся умышление серца твоего,
23 во желчи бо горести, и въ соузе неправедне зрю тя быти •
24 Отвещав же Симонъ рече: помолитеся вы о мне къ Господу, яко да ничтоже найдеть на мя от сихъ яже рекосте •
25 Они же засведетелствовавше, и глаголавше слово Божие навратишеся во Ерусалим, и многым странам Самарие благовестиша •
26 Ангел же Господень рече къ Філиппу глаголя: востани и иди на полудне • На пут сходящій от Ерусалима въ Газу, еже ест пуста •
27 И востав пойде, и се мужъ Мурин, евнухъ, урядник Кандакии царици Ефіопское егож уставила надо всемъ скарбом своимъ, онъже пришол былъ помолитися во Ерусалимъ •
28 И навращаваяся седелъ на колесници своей, и чтяше пророка Исаию •
29 Рече же Духъ къ Філиппу: приступи, и прилучися къ колесници сей •
30 Притек же Філиппъ услыша его чтуща Ісаию пророка, и рече: Разумееши ли, что чтеши?
31 Он же отвеща: и како могу разумети? Леч бы некто навчил мя • И просилъ ест Філиппа дабы въступилъ на колесницу и седелъ с нимъ •
32 Слова же Писания еже чтяше были сия: яко овча на заколение ведеся, и яко агнець противу срыгущему Его быва безгласенъ • Тако не отверзе устъ Своих •
33 Во смиреніи Его судъ Его взятся, род же Его кто исповесть? Яко воземлется от земли живот Его •
34 Отвещав же евнухъ къ Філиппу рече: молю ти ся о комъ пророкъ глаголеть сее, о собе ль, или о комъ иномъ некоемъ?
35 Отверзъ же Філиппъ уста своя, началъ от Писма сего благовестити ему Ісуса
36 и якож идяху путем прідоша на некую воду • И глагола евнухъ: се вода что возбраняеть ми креститися?
37 Рече же Філиппъ: аще веруеши от всего серца твоего мощно ти ест • Отвещав же рече: верую Сына Божия быти Ісуса Христа,
38 и повеле стати колесници, и слезоста оба к воде Филиппъ и евнухъ, и крести его •
39 Егда же взыдоша от воды, Духъ Господень восхыти Филиппа, и не виде его к тому евнух, и идяше во путь свой радуяся •
40 Філиппъ же обретеся во Азоте, и проходяй благовествоваше всем градом даже пріиде въ Кесарею •
