Святый Петръ исцели хромонароженнаго, и навчаеть людей Израілевыхъ о прославлении Господа Ісуса, и о воскресении Его •
1 Въкупе жъ Петръ и Іоаннъ вхожали во храмъ на молитву въ часъ девятый •
2 И некий мужъ хромъ сый, от чрева матери своея носимъ бываше, егоже полагаху по вся дни, предъ дверми храму, рекомыми Красными • Просити милостыня от входящих во храмъ •
3 Той же видевъ Петра, и Іоанна хотящихъ внити во храмъ просяше милостыни
4 погледев же Петръ нань со Іоанномъ рече: возри на насъ •
5 Онже пилне смотряше на них, мня нечто от нею прияти •
6 Рече же Петръ: сребра и злата несть у мене, но еже имамъ сее ти дамъ • Во имя Ісуса Христа Назорея въстани и ходи,
7 и емъ за руку его десную воздвиже и • А скоро утвердилися ему плесне и глезны,
8 и воскочив ста и хождяше, и вниде с ними во храмъ, ходя, и скача, и хваля Бога •
9 И видеша и вси людие ходяща, и хваляща Бога •
10 Познаху же его яко сей бяше милостыня ради седяй при Красных дверех храмовых, исполнишеся чуда и вжаса о пригодившихся ему •
11 Держащу же исцелевшему хромому Петра, и Іоанна • Притекоша к нима вси людие, во притвор нарицаемый Саломоновъ ужасни •
12 Видев же Петръ отвещаваше к людемъ: мужие Ізраильтяне что дивитеся тому, или на насъ почто возираете, яко своею ль силою, или можностию сотворихом сего ходити?
13 Богъ Авраамов, и Ісааковъ, и Іаковль, Богъ отець наших прослави Сына Своего Ісуса • Егоже убо вы предасте и отвергостеся предъ лицемъ Пилатовымъ, суждьшу Оному пустити •
14 Вы же Святого и Праведнаго отпрестеся, и испросисте мужа убійцу дати вамъ •
15 Началника же живота забисте • Тогожъ Бог воскреси от мертвых, емуже и мы сведетели есмы о вере имени Его •
16 Сего егож вы відите и знаете укрепило имя Его, и вера еже ест Его ради дала ему всю целость сию пред всеми вами •
17 И ныне братия вемъ яко неведениемъ сее вчинисте, також и князи ваши •
18 Но Богъ якоже провозвести усты въсехъ пророк Своих, пострадати Христу и сконча тако •
19 Покайтеся убо и обратитеся да очиститеся от грехъ ваших,
20 яко да пріидуть времена прохладна от лица Господьня • И пошлеть пронареченнаго вамъ Христа Ісуса,
21 Егоже подобаеть небеси прияти, даже до лет устроения всехъ, еже глагола Богъ усты святых Своих пророк от века •
22 Моисей убо ко отцемъ рече: Пророка вам воздвигнет Господь Богъ вашъ от братие вашее яко имене Того послушаіте о всем елика же речеть къ вамъ •
23 И будеть всяка душа естъ ли же не послушаеть Пророка того, потребится от людей •
24 Но и вси пророци от Самуіла, и прочии елици глаголаша, возвестиша дни сия,
25 вы есте сынове пророкъ и завета еже завеща Богъ ко отцемъ нашимъ • Глаголя ко Аврааму: о семени твоемъ благославятся вся отечествия земная,
26 вамъ первее Богъ возъяви Сына Своего Ісуса, и посла Его благославяющи вас, да отвратитеся кажды от злоб своих •
Нашли в тексте ошибку? Выделите её и нажмите: Ctrl + Enter
Деания апостолъская, 3 глава. Библия Скорины.
Public Domain — общественное достояние.
2024, bible.by & biblia.by.