О отповеди Стефанове ко Жидомъ, являеть имъ с писма иже были всегда Богу противни, и о вкаменовании Стефанове •
1 Тогда глагола архиерей ко Стефану: аще убо сия тако суть?
2 Онъ же рече: мужие братия и отци послушаіте, Богъ славы явися отцу нашему Аврааму егда бяше во Междуречии, прежде нижли живяше въ Харане •
3 И рече к нему: изыйди от земля твоея, и от рода твоего, и пойди в землю юже покажу тобе •
4 Тогда изыде от земля Халдейския, и вселися въ Харанъ • И оттуду по смерти отца его пресели и в землю сию, на ней же вы ныне живете •
5 И не далъ ему наследия в ней ни стопы нозе • Но обеща ему дать ея, и семени его по немъ, не сущу же в него чаду •
6 Глагола к нему сице Богъ, яко будеть семя его пришелци въ земли чуждей, и поработають ими, и озлобять е летъ четыреста,
7 и народу емуже поработають сужу азъ, рече Богъ • А потомъ изыдуть, и послужать ми на месте семъ •
8 И далъ ему завет обрезание • И той сплодил Ісаака, и обрезалъ его в день осмый • Ісаакъ Іакова • Іаковъ дванадесеть патриарховъ •
9 И патриарси возненавидевши Іосифа, продаша его во Египет, и бе Богъ с нимъ,
10 и высвободилъ и от всех скорбій его, и далъ ему ласку, и мудрость пред фараономъ царемъ Египетскимъ • И поставилъ его старейшимъ надъ Египтомъ, и надо всим домомъ своимъ •
11 Приде же гладъ на всю землю Египетскую, и Ханаоню, и скорбь велия, и не обретаху пище отци наши
12 слышавше Іаковъ сущую пшеницу во Египте послал отцевъ наших первее,
13 и внегда второе придоша, познанъ ест Іосифъ от братии своей • И явенъ бысть фараонови родъ Іосифовъ •
14 Послав же Іосифъ привезе отца своего Іакова, и вес родъ свой душъ седмъдесятъ и пять •
15 Сниде же Іаковъ во Египетъ, и скончася самъ и отци наши
16 и пренесени беша в Сихем, и положени быша во гробе, еже купилъ Авраамъ ценою сребра от сыновъ Еморовых, сына Сихемова •
17 И якоже приближашеся время обетования, иже клятся Богъ Аврааму • Возрастоша людие во Египте,
18 дондеже наста царь инъ, онже не знааше Іосифа,
19 сей злеумыслывъ о роде нашемъ, озлоби отцевъ наших, уморяя младенца их, и не живяй •
20 В томъ времени родился Моисей, и бе люб Богови, онъже воспитанъ бысть месеци три в дому отца своего,
21 положена же его в реце взяла дщера фараонова, и воскорми его собе в сына место •
22 И навченъ бысть Моисій всей премудрости Египетъстей, бе же силенъ во словехъ и делехъ •
23 И якоже наполнишеся ему летъ четыредесятъ возыде на серце его посетити братию свою сыны Ізраилевы,
24 и виде некоего обидима, пособствова и вчини отмщение обидимому убив Египтянина •
25 Мнел же се разути братіи своей яко рукою его Богъ дасть имъ избавление • Они же не разумеша •
26 Назаутрей же явися имъ тяжущимся, и приводяте их во смирение глаголя: мужи братия есте вы, почто обидите себе?
27 Обидяй же ближнего своего, отогналъ и рекій: кто тебе поставил княземъ или судиею над нами?
28 Еда убити мя хощеши якоже убилъ еси вчера Египтянина?
29 Бежа же Моисей для слова того, и бысть пришелець въ земли Мадиамъстей, идеже роди сына два,
30 минувшим же летом четыредесятъ, явися ему во пустыни горы Синайския ангелъ Господень, во пламени огнене в купине •
31 Моисей же видевъ дивляшеся видению, приступающу же ему разумети • Бысть гласъ Господень к нему:
32 Азъ Бог отець твоих, Богъ Авраамовъ, и Богъ Ісааковъ, и Богъ Іаковль • Трепетен же бывъ Моисей, не смеаше смотрети •
33 Рече ж ему Бог: изуй обувь с ног твоих, место бо на немже стоиши земля свята ест •
34 Видя видех озлобление людей Моихъ иже во Египте, и стогнание их услышах, и снидохъ высвободити их, и ныне гряди пошлю тя во Египетъ •
35 Сего Моисея егоже отогнаша глаголюще: кто тя поставил князя и судьею, того Богъ князя и избавителя посла • Рукою Анъгела, явльшегося ему въ купине •
36 Сей изведе ихъ чиняй знамения и чудеса во земли Египетстей, и въ Чермнемъ мори, и въ пустыни летъ четыредесятъ •
37 Сей ест Моисей рекій сыномъ Ізраилевымъ: Пророка воздвигнет вамъ Господь Богъ вашъ от братия вашея яко мене, того послушайте •
38 Сей бывый во собраніи въ пустыни к нему же Ангел глаголаше на горе Синай, и со отци нашими, онже приня слово живота дати нам,
39 егоже не хотеша послухати отци наши, но отринуша, и обратиша серца своя во Египетъ,
40 рекше Аарону: сотвори намъ богы иже преды идуть насъ • Моисею убо сему онъже вывелъ насъ и земли Египетския не вемы что ему бысть •
41 И телець слиша во дни оны, и вознесоша жертву идолу, и веселяхуся въ делехъ руку своих •
42 Отвратися же от них Богъ, и предалъ их служити воемъ небеснымъ • Якоже пишеть во книзе пророкъ: еда заколения и жертвы принесосте Ми летъ четыредесятъ во пустыни доме Ізраилевъ?
43 И восприасте храмъ Молоховъ, и звезду бога вашего Ремфана, и образы, яже сотвористе покланятися имъ, и преселю васъ далей Вавилона •
44 Сень сведения бяше отцемъ нашим во пустыни, якоже повеле глаголя Моисеови, сотворити ю по образу еже виде •
45 Еяже приемше отци наши со Ісусомъ Наввином, внесоша во одержание языков, ихъже изъгна Бог от лица отцевъ нашихъ, до дней Давыда
46 онже обрете ласку пред Богом, и проси дабы знашелъ селение Богу Іаковлю •
47 Саломон же созда Ему храмъ •
48 Но Вышній не в рукотворенных домехъ живеть • Якоже пророкъ глаголеть:
49 Небо Мне престолъ естъ, земля же подножие ногама Моима • Кый храмъ созіжете Ми глаголеть Господь, или кое место отпочинению Моему?
50 Не рука ли Моя сотворила сия вся?
51 Твердое шие, и необрезани серци и ушесы • Вы есте всегда Духу Святому противилися, яко отци ваши, також и вы •
52 Кого от пророкъ не изъгнаша отци ваши? И убиша превозвестивших пришестьвие Праведнаго, Емуже вы ныне предатели бысте и убійце •
53 Иже приясте законъ повелениемъ Ангелскимъ, и не соблюдосте •
54 Слышавши же сия распыхахуся сердци своими, и скрежетаху зубы нань •
55 Стефан же сый исполнен Духа Свята, возрев на небо, виде славу Божию, и Ісуса стояща одесную Бога,
56 и рече: се вижу небеса отверста, и Сына Человеча стояща одесную Бога •
57 Возопивше же гласомъ велиемъ затыкаху уши свое, и нападоша единомыслено нань •
58 И выведши и вне града, камениемъ побиваху • И сведетели снемши и с себе ризы своя, положиша при ногу юноша нарицаемаго Савла •
59 И камениемъ убиваху Стефана, молящася и глаголюща: Господи Ісусе пріими духъ мой,
60 и приклонивъ колени възопи гласомъ великимъ: Господи не постави имъ греха сего, и сия рекъ успе •
Нашли в тексте ошибку? Выделите её и нажмите:
Ctrl + Enter
Деания апостолъская, 7 глава. Библия Скорины.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте.
Public Domain — общественное достояние.
2024, bible.by & biblia.by.
