О позвании Павлове на Апостолство • О илъжи пророце Варнісу • О проповеданіи Павлове въ Кипре, и во Антиохіи • И яко на Павла завистивые Іудеи восташа •
1 Были пакъ неціи во Антиохійской церкви, пророци, и учителе, и Варнава, и Симон нарицаемый Чорный, и Лукиусъ Киринеанинъ, и Манаінъ Ірода Четверовласнаго другъ, и Савлъ •
2 Служащим же имъ Господеви, и постящимся, рече Духъ Святый: отделите Ми Варнаву, и Савла на дело на неже изъбрахъ их •
3 Тогда постившеся, и помолившеся, и возложивши руце на ня отпустиша их •
4 Сіи же послани бывше от Духа Свята, идоша в Селевкию • Оттуду ж отплыша въ Кипръ •
5 И пришедше во Саламин, возвещаху слово Божие на сонмищех Іудейских • Имеаху же Іоанна слугу •
6 И внегда прошли весь островъ, даже до Пафу • Знайдоша некоего мужа, чародейника, лже пророка, Іудеанина, емуже бе имя Вариісус •
7 Онже былъ съ намесникомъ Сергие Павломъ, мужемъ разумънымъ • Сей призвав Варнаву, и Савла, жадалъ от них слышати слово Божие •
8 Противляшеся же имъ, Елимас, чародейникъ той • Тако бо сказуется имя его • Хотяй отвратити намесника от веры •
9 Тогда Савулъ, онже словет Павелъ, исполнен сый Духа Свята, возревъ нань
10 рече: о исполнене всякия ильсти, и всякия злости сыне диаволовъ, враже всякия правды, не престаеши развращати путіи Господьня правыя •
11 И ныне се рука Господня на тя, и будеши слепъ, не видя солца до времени • И скоро нападе нань мракъ и тма, и осязая искаше вожда •
12 Тогда видевъ намесникъ бывшее верова, дивуяся учению Господню •
13 Вънегда же везлися от Пафа, Павелъ, и еже с ним быша, пріидоша во Пергію Памфиліискую • Іоаннъ же отлучився от нихъ, навратился во Ерусалим •
14 Они пак прошедше Пергию, пріидоша во Антиохию Писидийскую • И вошедъше во сонмище въ день суботъный седоша •
15 По чтении же закона и пророковъ, послаша к нимъ начальници сонмища глаголюще: мужие братия, естъ ли же слово в васъ утешенія к людем, поведите •
16 Востав же Павелъ и помахав рукою, рече: мужие Ізраильсти и боящеися Бога услышите •
17 Богъ людей сихъ выбралъ ест отцевъ нашихъ, и люди вознесе, егда быша пришелци во земли Египестей • И мышцею высокою изведе их из нея,
18 и до четыредесять летъ препита е во пустыни •
19 И погубивъ народовъ седмъ в земли Ханаанстей, жребиемъ розделилъ имъ земли их •
20 А потомъ четыреста и пятдесятъ летъ далъ имъ судие, даже до Самуила пророка •
21 Затымъ просиша царя, и далъ имъ Богъ Саула сына Кисова, мужа от колена Вениаминова, летъ четырдесятъ •
22 И преставив его, воздвиже имъ Давыда царя • Емуже сведетелствуя рече: знаідохъ Давыда сына Іосеева мужа по серцу Моему, онже чинить вся хотения Моя •
23 От сего семене Богъ по обетованию воздвиже Ізраилю •
24 Проповедавшу Іоанну пред лицемъ внития Его, крещение покаяния всем людем Ізраилевым •
25 Якоже скончал Іоаннъ течение свое и рече: кого мя мните быти несмъ азъ но се грядеть по мне, Емуже несмъ достоинъ раздрешити ремень сапогу Его •
26 Мужи братия, сынове рода Авраамля • И иже в васъ боящиеся Бога, вамъ слово спасения сего послася •
27 Живущіе бо во Ерусалиме и князи их сего не разумевше, и глас пророческих, иже по вся суботы чтомых, судивше скончаша •
28 И ни едины вины смертны обретше нань, просиша у Пилата убити Его •
29 Якож скончаша вся яже о Нем писана быша, снемша со древа положиша и во гробе •
30 Бог же воскреси Его от мертвых
31 Онъже явися на дни многы, съшедшимъ с Ним от Галилея во Ерусалимъ, иже ныне суть сведетели к людемъ •
32 И мы жъ вамъ благовестуемъ, еже ко отцемъ обетование бывшее, яко сие сконча Богъ нам чадомъ их воздвигъ Ісуса •
33 Якоже во псалме второмъ пишеть: Сынъ Мой еси Ты, Азъ днесь родих Тя •
34 А еже воскреси Его от мертвых, да не к тому возвратит и во истьление, сице рече: яко дамъ вам преподобна Давыдова верна •
35 Темже и во другомъ глаголеть: не даси Преподобному Твоему видети исътления •
36 Давыдъ убо своему роду послуживъ, Божіимъ советомъ успе и приложися ко отцемъ своимъ, и виде исътлени •
37 А Егоже Богъ воздвиже, не виде исътления •
38 Ведомо убо да будеть всем мужие братия, яко Сего ради вамъ оставление грехомъ проповедается •
39 И от всех от них же не могосте в законе Моисеове оправдатися, о Нем всякъ веруя оправдается •
40 Блюдитеся ж да не придеть на васъ реченое во пророцех:
41 Видьте нерадивіи и чудитеся, и исчезньте • Понеже дело соделаю Азъ во днехъ ваших, емуже не имаете веровати, аще кто повесть вамъ •
42 Исходящим же имъ из сонмища Іудейска моляхуся народи, дабы во другую суботу молвили ко нимъ слова тые •
43 Разшедшу же ся собору, последовали мнози Іудеи и богобойніи пришелци, Павла, и Варнаву, ониже напоминали их абы пребывали в милости Божией •
44 Въ другую пакъ суботу мало не весь градъ собрался послушати слова Божия •
45 Видевши же Іудеи народы исполнишеся зависти • И вопреки глаголаху глаголемымъ от Павла • Противящеся и хуляще их •
46 Тогда с смелостью Павелъ, и Варнава рекоста: вамъ было годно первее глаголати слово Божие, а понеж отвергосте е, и негодни сами себе чините вечному жівоту • Се обращаемся ку языкомъ,
47 тако убо заповеда нам Господь: положих тя во свет языкомъ, и да будеши во спасение даже до последнихъ земли •
48 Слышавше же сия языци радовахуся, и славяху слово Господьне, и вероваша, елици презрени быша в живот вечный,
49 и проношашеся слово Господьне по всей стране той •
50 Іудеи же наустиша жены учьтивыя, и благообразныя, и мещаны старейшия • И воздвигоша гонение великое на Павла, и на Варнаву, и изъгнаша их от предел своих,
51 они же оттрясши прах с ног своих на не, придоша во Иконію
52 ученици же исполняхуся радости и Духа Свята •
