О перечине еже бысть Греком со Иудеи, и о выбрании седми диаконъ от Апостоловъ, и яко Іудеи объжаловали Стефана •
1 Во днех же тыхъ умножившимся ученикомъ • Бысь роптание Ельліномъ ко Іудеомъ, яко погордеваху вдовицами их, во служении вседневъном •
2 Тогда дванадесять Апостоловъ, созвавши множство ученикъ рекоша: негодно ест намъ оставившимъ слово Божие служити столомъ,
3 осмотрите убо братия мужевъ з васъ добре сведетелствованыхъ седмъ, исполненых Духа Святого, и премудрости, ихъже поставим на службу сию,
4 мы же в молитве, и у навченіи слова Божия пребудем •
5 И люба бысть речь сия всему множству • И избраша Стефана мужа наполнена веры, и Духа Свята • И Філиппа, и Прохора, и Никанора, и Тимона, и Пармена, и Николаа пришелца Антиохійскаго,
6 сих же поставиша предъ Апостолы • И помолившеся, возложиша на нихъ руце •
7 И слово Божие растяше, и множашеся число ученикъ во Ерусалиме велми • Многъ теже народъ свещенник послухаша веры •
8 Стефан же исполненый веры и силы творяше знамения, и чудеса велия в людехъ •
9 И восташа неціи от сонма глаголемаго Ливертинска, и Киринейска, и Александрійска, и иже от Киликия, и Азия • Гадающеся со Стефаномъ,
10 и не можаху противитися премудрости, и Духу имъ же глаголаше •
11 Тогда ильстиве наведоша мужей они же бы рекли, яко слышахомъ его глаголюща слова хулны, на Моисея, и на Бога •
12 И тако подвигоша люди, и старейшины, и книжники • И збегшися восхитиша его и приведоша на сонмище •
13 И поставиша сведетеля ложны они же рекоша: человекъ той не престаеть глаголати словъ хульныхъ на град сей святый и на закон •
14 Слышахом бо его глаголюща • Яко Ісусъ Назоренинъ сей разорить место сее, и изменить обычае яже предалъ намъ Моисей •
15 И возреша нань вси седящие во сонмищи, видеша лице его яко лице Ангелово •
