О препираніи Іудеи верующих во Христа съ Петромъ, иже входил къ необрезаным • Петръ с того ся вымолвяет • Ученицы розыдошеся по свете • Агавъ глад прорицает •
1 Слышали пакъ суть Апостоли, и братия живущие во Іудеи, яко и погани приняли слово Божие,
2 и егда прішел Петръ во Ерусалим роптаху нань еже были от обрезания
3 глаголюще: почто вшолъ еси к мужемъ необрезаным, и елъ с ними?
4 Начавъ же Петръ речь сперва, и по ряду сказываше имъ глаголя:
5 азъ бых во граде Іоппіистемъ моляся • И видехъ во захваченіи мысли, видение: сходящъ сосудъ некій яко плащеницу велию, от четырь краи висящу с небеси, и спустися даже до мене •
6 В нюже егда смотряхъ, видехъ четвероногие звери земли, и гады, и птице небесные •
7 Слышах же и гласъ глаголющь ко мне: воставъ Петре заколи и ежь •
8 Рекох же: никако Господи, всяко бо скерно и нечисто николи же вніиде во уста моя •
9 Отвеща же ми вторицею гласъ с небеси глаголющъ: яже Богъ очистил ты не скверни,
10 се же бысть и третицею, и потом взяшася вся на небо •
11 И се абие трие мужи сташа пред храміною в нейже бехъ, послани с Кесареи ко мне •
12 Рече же ми Духъ ити с ними ничтоже разсужая • Шли ж со мною и шесть братіа сия • И вніидохом в домъ мужа •
13 Той же сказа намъ, како виде Ангела в дому своемъ ставши и рекша ему: пошли во Іоппию мужей, и призови Симона нарицаемаго Петра •
14 Онъ речеть къ тобе слова в нихже спасешися ты, и весь домъ твой •
15 Внегда же начахъ глаголати, нападе Духъ Святый на них, якоже и на нас вначале •
16 И воспомянухъ на слова Господьня, еже глаголаше: Іоаннъ убо крестилъ ест водою, вы же имате крестити Духом Святымъ •
17 Понеже убо равный даръ далъ ест имъ Богъ, якож и нам, веровавтим въ Господа нашего Ісуса Христа • Азъ же кто бехъ возбранити Богу?
18 Слышавши же сия умолъкоша • И славяху Бога глаголюще: се убо и поганом далъ ест Богъ покаание въ жизнь •
19 Тые пакъ еже были розъбеглися для скорби бывшее при Стефане, пріидоша до Фіникия, и до Кипра, и до Антиохіа • Ни къ единому глаголюще слова Божия, толико к самым Іудеомъ •
20 Быша же неціи от нихъ мужие Кипрьстіи, и Киринеістіи, они же, пришедши во Антиохию глаголаху ко Еллиномъ, благовествующе Господа Ісуса,
21 и бе рука Господьня с ними, много ж число веровавших обратишеся къ Господу •
22 И поведена бысть речь сия во уши сбору иже бе во Ерусалиме • И послали Варнаву до Антиохіи •
23 Онже внегда пришолъ тамо, и узрелъ ласку Божию возрадовался • И напоминалъ всехъ, дабы в умысле серца своего пребыли, прилучени къ Господу •
24 Былъ убо мужъ добръ, исполненъ Духа Свята, и веры • И приложися народъ мног Господеви •
25 И оттоле иде Варнава во Тарсъ взыскати Савла, и знашедъ его приведе во Антиохию •
26 Быша же ту целый годъ, собирающеся во церкви и научающе народъ многъ • Тако иже во Антиохіи напредъ ученици нарекошеся христиане •
27 В тые жъ дни снидошеся пророци во Антиохию •
28 Востав же единъ от них именем Агавъ, назнаменаше Духомъ гладъ велик быти по всей вселенней еже и бысть при Клавдие кесари •
29 Тогда ученици единый каждый водле можности своея, умыслили послати к употребе, живущим во Іудеи братиамъ •
30 Еже и вчиниша пославше ко старейшимъ рукою Варнавлевою и Саулевою •
