Эклезіясціка 1 раздзел — Біблія — Біблія Чарняўскага 2017

Пралог

Паколькі многія і важныя кнігі пакінуты былі нам Законам і Прарокамі ды іншымі, што пайшлі за імі, у іх трэба ўсхваляць Ізраэль дзеля навукі і мудрасці, і таму трэба, каб не толькі тыя, што чытаюць, станавіліся разумнейшымі, але таксама каб для чужых сталі карыснымі тыя, хто прагне мудрасці, і размаўляе, і піша. Дзед мой Ісус, аддаўшыся болей за іншых вывучэнню Закона і Прарокаў ды іншых кніг, якія былі пакінуты нам нашымі продкамі, і, набыўшы дастаткова ўмення ў гэтым, і сам захацеў напісаць штосьці з таго, што да навукі і мудрасці адносіцца, каб людзі, прагнучыя пазнання, станавіліся болей спрактыкаванымі ды каб больш імкнуліся душою да яго і мелі поспех у законным жыцці.

Дык прашу вас прыйсці з прыхільнасцю ды з дастатковаю ўвагаю чытаць і мець ласку да тых месцаў, у якіх, як можа здацца, мы змянілі некаторыя словы, бо, працуючы над перакладам, не змаглі падабраць адпаведнага выразу.

Бо не аднолькавы мае сэнс тое, што чытаецца па-гебрайску, калі тое будзе перакладзена на іншую мову; не толькі ж гэтая кніга, але і Закон, і Прарокі, і іншыя кнігі, чытаныя на сваёй мове, выяўляюць не малую розніцу.

Бо ў трыццаць восьмым годзе, у часы Пталемея Эвэргэта цара, прыбыў я ў Егіпет і, паколькі доўгі час там правёў, знайшоў там прыклад значных і патрабуючых увагі ведаў. Такім чынам, я палічыў добрым і неабходным самому прыкласці пэўнае старанне і працаваць, каб перакласці гэтую кнігу, і прысвяціў шмат бяссонных начэй і ўмеласці, каб на працягу гэтага часу, які быў патрэбен, выдаць закончаную кнігу таксама для тых, хто вырашыць для сябе жыць паводле закону ў чужой зямлі, у якой ужо ўсталяваліся ўласныя звычаі.

¹ Усякая мудрасць ад Госпада Бога і з Ім прабывае заўсёды і спакон веку.

² Пясок марскі, і кроплі дажджу, і дні века хто можа злічыць? Вышыню неба, і шырыню зямлі, і глыбіню бяздоння хто можа змераць?

³ Апярэджваючую ўсё мудрасць Божую хто можа ўцяміць?

⁴ Першая перад усім была створана мудрасць, і разуменне разважлівасці — ад вякоў.

⁵ Крыніца мудрасці — Слова Божае на нябёсах, і праява яе — адвечныя настаўленні.

⁶ Корань мудрасці каму быў аб’яўлены? Дый хто пазнаў хітрасці яе?

⁷ Каму была аб’яўлена ды паказана навука мудрасці? І ўсебаковае знанне яе хто зразумеў?

⁸ Ён адзін, Узвышні Творца ўсемагутны і Валадар моцны, наганяючы вялікі страх, Які сядзіць на троне Сваім і валадарыць, — Бог.

⁹ Ён стварыў яе ў Духу Святым, і Ён убачыў, і палічыў, і змераў;

¹⁰ і выліў Ён яе на ўсе творы Свае і на кожнага чалавека па Сваёй шчодрасці ды надзяліў ёю мілуючых Яго.

¹¹ Страх Госпадаў — слава і пашана, і радасць, і вянок радаснага захаплення.

¹² Страх Госпадаў хай захапляе сэрца, і дае радасць, і весялосць, і доўгае жыццё.

¹³ Таму, хто баіцца Госпада, будзе добра ў канцы жыцця, ды ў дзень сваёй смерці будзе дабраславёны.

¹⁴ Ушанаванне Бога — пачэсная мудрасць;

¹⁵ а каму яна адкрыецца, той размяшчае яе ў бачанні самога сябе ды ў пазнанні вялікіх спраў сваіх.

¹⁶ Пачатак мудрасці — страх Госпадаў, з вернымі яна ствараецца ва ўлонні, і спрадвеку асноўваецца ў людзях праўды ды іх патомству даручае сябе.

¹⁷ Страх Госпадаў — пабожнасць ведаў.

¹⁸ Пабожнасць зберажэ і апраўдае сэрца,

¹⁹ дасць асалоду і радасць.

²⁰ Паўната мудрасці — баяцца Бога, яна напоіць іх пладамі сваімі.

²¹ Увесь дом яго напоўніць каштоўнымі рэчамі ды кладоўкі яго — багаццямі.

²² Вянец мудрасці — страх Госпадаў, што дае супакой і ласку збаўлення:

²³ абодва — дары Божыя.

²⁴ Веданне і разуменне разважлівасці мудрасць вылівае, як дождж, і хвалу тых, якія яе трымаюцца, узвышае.

²⁵ Корань мудрасці — гэта страх Госпадаў, і галіны яе — даўгавечныя.

²⁶ У скарбоўнях мудрасці — разуменне і пабожнасць ведаў; а мудрасць грэшнікаў — гэта праклён.

²⁷ Страх Госпадаў выдаляе грэх і, калі ён прысутнічае, спыняе ўсякі гнеў.

²⁸ Бо той, у каго няма страху, не зможа быць апраўданы, бо гнеў упартасці яго ёсць падзенне яго.

²⁹ Цярплівы ўтрымаецца толькі да часу, і затым вернецца асалода.

³⁰ Разумны да часу будзе скрываць свае словы, і вусны многіх будуць славіць яго розум.

³¹ У скарбоўнях мудрасці — прыпавесці навукі;

³² а грэшніку шанаванне Бога — праклён.

³³ Сыне, калі прагнеш мудрасці, захавай справядлівасць, і Бог дасць табе яе.

³⁴ Бо мудрасць і навука — гэта страх Госпадаў, і тое, што Яму падабаецца, —

³⁵ вернасць і пакорлівасць.

³⁶ Будзь верным у страху Госпадавым ды не прыступай да Яго з раздвоеным сэрцам.

³⁷ Не будзь крывадушным на віду людзей ды пільнуй вусны свае.

³⁸ Не вынось сябе, каб часам не ўпасці, і не выклікай ганьбы на сваю душу,

³⁹ бо адкрые Бог скрытасці твае, ды на сходзе скрышыць цябе,

⁴⁰ бо блага прыступіўся ты да страху Госпадава і тваё сэрца поўнае подступу і падману.

Знайшлі памылку ў тэксце? Вылучыце яе і націсніце: Ctrl + Enter

Сябры, вельмі патрэбныя наступныя папяровыя выданні:

Сьвятая Бібля ў перакладзе Янкі Станкевіча 1973 (і Новы Закон 1970).
Эвангельле Мацьвея, Марка, Лукі, Іоана — 1926−1930, Лодзь.
Евангелля і Дзеі ў перакладах Гадлеўскага і Татарыновіча.
Генезіс і Кніга Эклезіяста, або Прапаведніка ў перакладзе Яна Пятроўскага, 1984, 1987.

Калі вы імі валодаеце і можаце прадаць, патэлефануеце па тэлефоне +375296422269, ці напішыце — bible-man@mail.ru.

Калі вы чытаеце на беларускай мове, паспрабуйце новы праект — biblia.by:

Эклезіясціка (Мудрасць Ісуса, сына Сіраха), 1 раздзел. Пераклад Чарняўскага 2017.

Звярніце ўвагу. Нумары вершаў — гэта спасылкі, якія вядуць на раздзел з параўнаннем перакладаў, паралельнымі спасылкамі, тэкстамі з нумарамі Стронг. Паспрабуйце, магчыма, вы будзеце прыемна здзіўлены.

Публікуецца з дазволу Міжканфесіянальнага хрысціянскага рэлігійнага брацтва
«Біблейскае таварыства ў Рэспубліцы Беларусь».
© 2017

Эклезіясціка 1 Эклезіясціка 1 раздзел