1 Есть же ве́ра упова́емых извеще́ние, веще́й обличе́ние неви́димых.
2 В сей бо свиде́тельствовани бы́ша дре́внии.
3 Ве́рою разумева́ем соверши́тися веко́м глаго́лом Бо́жиим, во е́же от неявля́емых ви́димым бы́ти.
4 Ве́рою множа́йшую же́ртву А́вель па́че Ка́ина принесе́ Бо́гу, е́юже свиде́тельствован бысть бы́ти пра́ведник, свиде́тельствующу о да́рех его́ Бо́гу, и то́ю уме́рый еще́ глаго́лет.
5 Ве́рою Ено́х преложе́н бысть не ви́дети сме́рти, и не обрета́шеся, зане́ преложи́ его́ Бог, пре́жде бо преложе́ния его́ свиде́тельствован бысть, я́ко угоди́ Бо́гу.
6 Без ве́ры же невозмо́жно угоди́ти Бо́гу, ве́ровати же подоба́ет приходя́щему к Бо́гу, я́ко есть, и взыска́ющим Его́ мздовозда́тель быва́ет.
7 Ве́рою отве́т прии́м Но́е, о ни́хже не у́ бе ви́дев, и убоя́вся, сотвори́ ковче́г во спасе́ние до́му своего́, е́юже осуди́ [весь] мiр, и я́же по ве́ре пра́вды бысть насле́дник.
8 Ве́рою зово́м Авраа́м послу́ша изы́ти на ме́сто, е́же хотя́ше прия́ти в насле́дие, и изы́де не ве́дый, ка́мо гряде́т.
9 Ве́рою прии́де Авраа́м на зе́млю обетова́ния, я́коже на чу́жду, в кро́вы всели́ся со Исаа́ком и Иа́ковом, снасле́дникома обетова́ния того́жде.
10 Жда́ше бо основа́ния иму́щаго гра́да, ему́же худо́жник и соде́тель Бог.
11 Ве́рою и сама́ Са́рра непло́ды си́лу во удержа́ние се́мене прия́т и па́че вре́мене во́зраста роди́, поне́же ве́рна непщева́ Обетова́вшаго.
12 Те́мже и от еди́наго роди́шася, да еще́ умерщвле́ннаго, я́коже зве́зды небе́сныя мно́жеством и я́ко песо́к вскрай мо́ря безчи́сленный.
13 По ве́ре умро́ша си́и вси, не прие́мше обетова́ний, но издале́ча ви́девше я́, и целова́вше, и испове́давше, я́ко стра́ннии и прише́льцы суть на земли́.
14 И́бо такова́я глаго́лющии явля́ются, я́ко оте́чествия взыску́ют.
15 И а́ще бы у́бо о́но по́мнили, из него́же изыдо́ша, име́ли бы вре́мя возврати́тися,
16 Ны́не же лу́чшаго жела́ют, си́речь небе́снаго, те́мже не стыди́тся си́ми Бог, Бог нарица́тися их, угото́ва бо им град.
17 Ве́рою приведе́ Авраа́м Исаа́ка искуша́емь, и единоро́днаго приноша́ше, обетова́ния прие́мый.
18 К нему́же глаго́лано бысть: я́ко о Исаа́це нарече́т ти ся се́мя.
19 Помы́слив, я́ко и из ме́ртвых воскреси́ти си́лен есть Бог, те́мже того́ и в при́тчи прия́т.
20 Ве́рою о гряду́щих благослови́ Исаа́к Иа́кова и Иса́ва.
21 Ве́рою, Иа́ков умира́я, коего́ждо сы́на Ио́сифова благослови́, и поклони́ся на верх жезла́ его́.
22 Ве́рою, Ио́сиф умира́я, о исхожде́нии сыно́в Изра́илевых па́мятствова, и о косте́х свои́х запове́да.
23 Ве́рою Моисе́й роди́вся сокрове́н бысть три ме́сяцы от оте́ц свои́х, зане́ ви́деша красно́ отроча́, и не убоя́шася повеле́ния царе́ва.
24 Ве́рою Моисе́й, вели́к быв, отве́ржеся нарица́тися сын дще́ре фарао́новы.
25 Па́че же изво́ли страда́ти с людьми́ Бо́жиими, не́жели име́ти вре́менную греха́ сла́дость.
26 Бо́льшее бога́тство вмени́в еги́петских сокро́вищ поноше́ние Христо́во, взира́ше бо на мздовоздая́ние.
27 Ве́рою оста́ви Еги́пет, не убоя́вся я́рости царе́вы, Неви́димаго бо я́ко ви́дя, терпя́ше.
28 Ве́рою сотвори́ Па́сху и проли́тие кро́ве, да не погубля́яй перворожде́нная ко́снется их.
29 Ве́рою преидо́ша Чермно́е мо́ре а́ки по су́се земли́, его́же искуше́ние прие́мше Еги́птяне истопи́шася.
30 Ве́рою сте́ны Иерихо́нския падо́ша обхожде́нием седми́х дний.
31 Ве́рою Раа́в блудни́ца не поги́бе с сопроти́вльшимися, прии́мши схо́дники {согляда́телей}с ми́ром и ины́м путе́м изве́дши.
32 И что еще́ глаго́лю? Не доста́нет бо ми повеству́ющу ле́та о Гедео́не, Вара́це же и Сампсо́не, и Иеффа́и, о Дави́де же и Самуи́ле, и о [други́х] проро́цех,
33 И́же ве́рою победи́ша ца́рствия, соде́яша пра́вду, получи́ша обетова́ния, загради́ша уста́ львов,
34 Угаси́ша си́лу о́гненную, избего́ша о́стрея меча́, возмого́ша от не́мощи, бы́ша кре́пцы во бране́х, обрати́ша в бе́гство полки́ чужи́х.
35 Прия́ша жены́ от воскресе́ния ме́ртвыя своя́, ини́и же избие́ни бы́ша, не прие́мше избавле́ния, да лу́чшее воскресе́ние улуча́т.
36 Друзи́и же руга́нием и ра́нами искуше́ние прия́ша, еще́ же и уз, и темни́ц.
37 Ка́мением побие́ни бы́ша, претре́ни бы́ша, искуше́ни бы́ша, уби́йством меча́ умро́ша, проидо́ша в ми́лотех и в ко́зиях ко́жах, лише́ни, скорбя́ще, озло́блени.
38 И́хже не бе досто́ин весь міръ, в пусты́нях скита́ющеся, и в гора́х, и в верте́пах, и в про́пастех земны́х.
39 И си́и вси послу́шествани бы́вше ве́рою, не прия́ша обетова́ния,
40 Бо́гу лу́чшее что о нас предзре́вшу, да не без нас соверше́нство прии́мут.
