1 Те́мже, бра́тие свята́я, зва́ния небе́снаго прича́стницы, разуме́йте Посла́нника и Святи́теля испове́дания на́шего Иису́са Христа́.
2 Ве́рна су́ща Сотво́ршему Его́, я́коже и Моисе́й во всем дому́ Его́.
3 Мно́жайшей бо сла́ве Сей па́че Моисе́а сподо́бися, ели́ко мно́жайшую честь и́мать па́че до́му сотвори́вый его́.
4 Всяк бо дом созида́ется от не́коего, а сотвори́вый вся́ческая Бог.
5 И Моисе́й ве́рен бе во всем дому́ Его́, я́коже слуга́, во свиде́тельство глаго́латися име́вшим,
6 Христо́с же я́коже Сын в дому́ Свое́м, Его́же дом мы есмы́, а́ще у́бо дерзнове́ние и похвалу́ упова́ния да́же до конца́ изве́стно удержи́м.
7 Те́мже, я́коже глаго́лет Дух Святы́й: днесь, а́ще глас Его́ услы́шите,
8 Не ожесточи́те серде́ц ва́ших, я́коже в прогне́вании, по дни искуше́ния в пусты́ни,
9 Иде́же искуси́ша Мя отцы́ ва́ши, искуси́ша Мя и ви́деша дела́ Моя́ четы́редесять лет.
10 Сего́ ра́ди негодова́х ро́да того́ и рех: при́сно блу́дят се́рдцем, ти́и же не позна́ша путе́й Мои́х.
11 Я́ко кля́хся во гне́ве Мое́м, а́ще вни́дут в поко́й Мой.
12 Блюди́те, братие, да не когда́ бу́дет в не́коем от вас се́рдце лука́во, испо́лнено неве́рия, во е́же отступи́ти от Бо́га жи́ва.
13 Но утеша́йте себе́ на всяк день до́ндеже днесь нарица́ется, да не ожесточи́тся не́кто от вас ле́стию грехо́вною.
14 Прича́стницы бо бы́хом Христу́, а́ще у́бо нача́ток соста́ва да́же до конца́ изве́стен удержи́м.
15 Внегда́ глаго́лет: днесь, а́ще глас Его́ услы́шите, не ожесточи́те серде́ц ва́ших, я́коже в прогне́вании.
16 Не́цыи бо слы́шавше прогне́ваша, но не вси изше́дшии из Еги́пта с Моисе́ом.
17 Ко́их же негодова́ четы́редесять лет? Не согреши́вших ли, и́хже ко́сти падо́ша в пусты́ни?
18 Кото́рым же кля́лся не вни́ти в поко́ище Его́? Я́ве, я́ко проти́вльшимся.
19 И ви́дим, я́ко не возмого́ша вни́ти за неве́рствие.
