1 И҆ нача̀ соломѡ́нъ созида́ти до́мъ гд҇ень во ї҆ер҇ли́мѣ, на горѣ̀ а҆мѡрі́а, на мѣ́стѣ, є҆́же ѹ҆гото́ва даві́дъ на гѹмнѣ̀ ѻ҆́рны ї҆евѹсе́анина:
2 нача́ же созида́ти въ мц҇ъ вторы́й лѣ́та четве́ртагѡ ца́рства своегѡ̀.
3 И҆ си́це нача̀ соломѡ́нъ созида́ти до́мъ бж҃їй: въ долготѹ̀ лакѡ́тъ, размѣ́ръ пе́рвый, лакѡ́тъ шестьдесѧ́тъ, въ широтѹ́ же лакѡ́тъ два́десѧть:
4 и҆ притво́ръ пред̾ лице́мъ до́мѹ, долгота̀ по лицѹ̀ широты̀ до́мѹ, лакѡ́тъ два́десѧть, высота́ же лакѡ́тъ сто̀ два́десѧть и҆ позлатѝ є҆го̀ внѹ́трь зла́томъ чи́стымъ.
5 До́мъ же вели́кїй ѡ҆кры̀ дска́ми ке́дровыми и҆ позлатѝ зла́томъ чи́стымъ: и҆зваѧ́ же на не́мъ подѡ́бїѧ фі́нїкѡвъ и҆ ѩ҆́кѡ мрє́жицы проме́жь себє̀ сплета́ющѧсѧ,
6 и҆ ѹ҆красѝ хра́мъ ка́менїемъ драги́мъ сла́внѡ, и҆ позлатѝ зла́томъ, є҆́же ѿ фарѹі́ма .
7 И҆ позлатѝ до́мъ и҆ стѣ́ны є҆гѡ̀, и҆ врата̀ и҆ пра́ги, и҆ ѻ҆́кна и҆ двє́ри зла́томъ, и҆ и҆зваѧ̀ херѹві́мы на стѣна́хъ.
8 Сотвори́ же до́мъ ст҃а҄ѧ ст҃ы́хъ, долгота̀ є҆гѡ̀ по лицѹ̀ широты̀ до́мѹ, лакѡ́тъ два́десѧть, широта̀ та́кожде два́десѧть лакѡ́тъ, и҆ позлатѝ и҆̀ зла́томъ чи́стымъ на херѹві́мѣхъ, тала҄нтъ ше́сть сѡ́тъ.
9 И҆ вѣ́съ гвозді́й, вѣ́съ гво́здѧ є҆ди́нагѡ пѧтьдесѧ́тъ сї҄кль зла́та, и҆ го́рницѹ позлатѝ зла́томъ.
10 И҆ сотворѝ въ домѹ̀ ст҃а҄ѧ ст҃ы́хъ херѹвї҄ма два̀, дѣ́ло ѿ дре́въ негнїю́шихъ и҆ позлатѝ и҆̀хъ зла́томъ.
11 И҆ крилѣ҄ херѹві́мѡвъ, долгота̀ два́десѧть лакѡ́тъ, и҆ є҆ди́но крило̀ лакѡ́тъ пѧтѝ, прикаса́ющеесѧ стѣнѣ̀ до́мѹ,
12 и҆ дрѹго́е крило̀ пѧтѝ лакѡ́тъ, прикаса́ющеесѧ крилѹ̀ херѹві́ма дрѹга́гѡ:
13 крилѣ҄ же херѹві́мѡвъ си́хъ распростє́ртѣ на лакѡ́тъ два́десѧть, ті́и же стоѧ́хѹ на но́зѣхъ свои́хъ, ли́ца же и҆́хъ (зрѧ́ще) къ до́мѹ.
14 Сотвори́ же завѣ́сѹ ѿ синеты̀ и҆ багрѧни́цы, и҆ червлени́цы и҆ вѷссо́на, и҆ сотка̀ на не́й херѹві́мы.
15 И҆ сотворѝ пред̾ хра́момъ стѡлпа̀ два̀, лакѡ́тъ три́десѧть пѧ́ть въ высотѹ̀, и҆ главы҄ и҆́хъ пѧ́ть лакѡ́тъ.
16 И҆ сотворѝ чє́пи въ даві́рѣ и҆ положѝ на глава́хъ столпѡ́въ, и҆ ши́пкѡвъ сотворѝ сто̀, и҆̀хже положѝ на мрє́жи.
17 И҆ поста́ви столпы̀ пред̾ лице́мъ хра́ма, є҆ди́наго ѡ҆деснѹ́ю, а҆ дрѹга́го ѡ҆шѹ́юю: и҆ наречѐ и҆́мѧ сѹ́щемѹ ѡ҆деснѹ́ю и҆справле́нїе, и҆́мѧ же сѹ́щемѹ ѡ҆шѹ́юю крѣ́пость.
Нашли в тексте ошибку? Выделите её и нажмите:
Ctrl + Enter
Вторая книга Паралипоменон, 3 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784