Есфирь 3 Есфирь 3 глава

¹ И҆ по си́хъ просла́ви ца́рь а҆ртаѯе́рѯъ а҆ма́на сы́на а҆мадаѳѹ́ина вѹге́анина и҆ вознесѐ є҆го̀, и҆ предсѣдѧ́ше вы́шше всѣ́хъ дрѹгѡ́въ є҆гѡ̀:

² и҆ всѝ, и҆̀же во дворѣ̀ (царе́вѣ), покланѧ́хѹсѧ а҆ма́нѹ: си́це бо повелѣ̀ ца́рь твори́ти. Мардохе́й же не кла́нѧшесѧ є҆мѹ̀.

³ И҆ глаго́лаша сѹ́щїи во дворѣ̀ царе́вѣ мардохе́ю: мардохе́е, чесѡ̀ ра́ди не слѹ́шаеши глаго́лемыхъ ѿ царѧ̀;

⁴ По всѧ҄ же дни҄ глаго́лахѹ є҆мѹ̀, и҆ не послѹ́шаше и҆́хъ. И҆ возвѣсти́ша а҆ма́нѹ, ѩ҆́кѡ мардохе́й сопротивлѧ́етсѧ повелѣ́нїю царе́вѹ, и҆ повѣ́да и҆̀мъ мардохе́й, ѩ҆́кѡ ї҆ѹде́анинъ є҆́сть.

⁵ И҆ ѹ҆вѣ́давъ а҆ма́нъ, ѩ҆́кѡ не кла́нѧетсѧ є҆мѹ̀ мардохе́и, разгнѣ́васѧ ѕѣлѡ̀

⁶ и҆ ѹ҆мы́сли погѹби́ти всѧ҄ ї҆ѹдє́и, и҆̀же въ ца́рствѣ а҆ртаѯе́рѯовѣ:

⁷ и҆ сотворѝ совѣ́тъ въ лѣ́то второена́десѧть ца́рства а҆ртаѯе́рѯова, и҆ мета́ше жрє́бїѧ де́нь ѿ днѐ и҆ мц҇ъ ѿ мц҇а, ѩ҆́кѡ погѹби́ти во є҆ди́нъ де́нь ро́дъ мардохе́евъ: и҆ падѐ жре́бїй на четвертыйна́десѧть де́нь мц҇а, и҆́же є҆́сть а҆даръ.

⁸ И҆ речѐ (а҆ма́нъ) ко царю̀ а҆ртаѯе́рѯѹ, глаго́лѧ: є҆́сть ѩ҆зы́къ разсѣ́ѧнный во ѩ҆зы́цѣхъ во все́мъ ца́рствѣ твое́мъ: зако́ны же и҆́хъ стра́нни па́че всѣ́хъ ѩ҆зы҄къ, и҆ зако́нѡвъ ца́рскихъ не слѹ́шаютъ, и҆ не по́льзѹетъ царю̀ ѡ҆ста́вити и҆̀хъ:

⁹ и҆ а҆́ще го́дѣ є҆́сть царе́ви, да повели́тъ погѹби́ти ѧ҆̀: а҆́зъ же запишѹ̀ въ сокро́вище царе́во де́сѧть ты̀сѧщъ тала҄нтъ сребра̀.

¹⁰ И҆ сне́мъ ца́рь пе́рстень (съ рѹкѝ своеѧ̀), дадѐ въ рѹ́цѣ а҆ма́нѹ, да запеча́таетъ писа҄нїѧ напи҄саннаѧ на ї҆ѹдє́й.

¹¹ И҆ речѐ ца́рь а҆ма́нѹ: сребро̀ ѹ҆́бѡ и҆мѣ́й ты̀ себѣ̀, лю́демъ же творѝ, ѩ҆́коже хо́щеши.

¹² И҆ при́звани бы́ша писцы̀ царє́вы въ третїйна́десѧть де́нь мц҇а пе́рвагѡ, и҆ написа́ша, ѩ҆́коже повелѣ̀ а҆ма́нъ, къ воево́дамъ и҆ нача́лникѡмъ по всѣ҄мъ страна́мъ, ѿ ї҆нді́йскїѧ ѡ҆́бласти да́же и҆ до є҆ѳїо́пїи, сто̀ два́десѧти седмѝ страна́мъ, нача́лствѹющымъ над̾ ѩ҆зы҄ки по и҆́хъ ѧ҆зы́кѹ, и҆́менемъ а҆ртаѯе́рѯа царѧ̀.

¹³ И҆ посла̀ съ писмонѡ́сцы писа҄нїѧ въ ца́рство а҆ртаѯе́рѯово, да побїю́тъ ро́дъ жидо́вскїй въ де́нь є҆ди́нъ мц҇а вторагѡна́десѧть, и҆́же є҆́сть а҆да́ръ, и҆ да расхи́тѧтъ и҆мѣ҄нїѧ и҆́хъ.

¹⁴ Списа́нїе же є҆пїсто́лїи сицево̀ бѣ̀: ца́рь вели́кїй а҆ртаѯерѯъ нача́лствѹющымъ ѿ ї҆нді́и да́же до є҆ѳїо́пїи над̾ сто̀ два́десѧть седмїю̀ страна́ми и҆ мѣстонача́лникѡмъ пѡ́дданнымъ.

¹⁵ Над̾ мно́гими ца́рствѹющь ѩ҆зы҄ки и҆ ѡ҆бдержа́въ всю̀ вселе́ннѹю, восхотѣ́хъ, не де́рзостїю ѡ҆́бласти возноси́мь, но кро́тостїю и҆ ти́хостїю всегда̀ пра́вѧ, безмѧте́жно житїѐ всегда̀ ѹ҆строѧ́ти подрѹ́чныхъ (на́шихъ), и҆ ца́рствїе (своѐ) безмо́лвно и҆ проходи́мо да́же до конє́цъ соблюда́ѧ, ѡ҆бнови́ти жела́емый всѣ҄мъ человѣ́кѡмъ ми́ръ.

¹⁶ Вопроси́вшѹ же мѝ совѣ́тники моѧ҄, ка́кѡ бы возмо́жно сїѐ соверши́ти, и҆́же ѹ҆ на́съ цѣломѹ́дрїемъ пресловѹ́тый и҆ во благоволе́нїи неизмѣ́нный и҆ тве́рдою вѣ́рностїю ѹ҆твержде́нный и҆ вторѹ́ю че́сть по царѝ полѹчи́вый а҆ма́нъ сказа̀ на́мъ, ѩ҆́кѡ во всѣ́хъ по вселе́ннѣй колѣ́нѣхъ смѣси́сѧ вражде́бный нѣ́кїй наро́дъ, зако́нами сопроти́вный ко всѧ́комѹ ѩ҆зы́кѹ и҆ повелѣ҄нїѧ ца҄рскаѧ всегда̀ небрегѹ́щь, дабы̀ не ѹ҆строѧ́лосѧ ѿ на́съ благоѹправлѧ́емое непоро́чнѡ соѡблада́нїе.

¹⁷ Ѹ҆разѹмѣ́вше ѹ҆бо, ѩ҆́кѡ се́й ѩ҆зыкъ є҆ди́нъ сопротивлѧ́етсѧ всегда̀ всѧ́комѹ человѣ́кѹ, ѹ҆ставле́нїе зако́нѡвъ и҆ностранное и҆змѣнѧ́етъ, и҆ проти́вѧсѧ на́шымъ дѣлѡ́мъ, гѡ́ршаѧ соверша́етъ ѕла҄ѧ, дабы̀ ца́рствїе на́ше не полѹчи́ло благостоѧ́нїѧ: повелѣ́хомъ ѹ҆̀бо напи́санными къ ва́мъ гра́мотами ѿ а҆ма́на ѹ҆чине́нагѡ над̾ вещьмѝ (ца́рскими) и҆ втора́гѡ ѻ҆тца̀ на́шегѡ, всѣ́хъ со жена́ми и҆ ча́ды погѹби́ти всекоре́ннѣ вра́жїими мечьмѝ без̾ всѧ́кїѧ ми́лости и҆ пощадѣ́нїѧ, въ четвертыйна́десѧть де́нь вторагѡна́десѧть мц҇а а҆да́ра, настоѧ́щагѡ лѣ́та, ѩ҆́кѡ да бывшїи дре́вле и҆ нн҃ѣ вразѝ во є҆ди́нѣмъ днѝ го́рькѡ во а҆́дъ соше́дше, въ про́чее вре́мѧ ти́хо и҆ безмо́лвно житїѐ дадѧ́тъ на́мъ до конца̀ проходи́ти.

¹⁸ Списа҄нїѧ же є҆пїсто́лїи посыла́хѹсѧ по страна́мъ, и҆ повелѣ́но бы́сть всѣ҄мъ ѩ҆зы́кѡмъ готѡ́вымъ бы́ти въ нарѣче́нный де́нь.

¹⁹ Приспѣ́ же дѣ́ло и҆ въ сѹ́сы: и҆ ца́рь ѹ҆́бѡ и҆ а҆ма́нъ пирѹ҄юща наслажда́стасѧ, гра́дъ же (сѹ́сы) мѧтѧ́шесѧ.