1 Во вторыйна́десѧть мц҇ъ, и҆же є҆́сть а҆да́ръ, въ третїйна́десѧть де́нь мц҇а прїидо́ша писа҄нїѧ ѿ царѧ̀.
2 Въ то́й же день погибо́ша сѹпоста́ты ї҆ѹде́євъ: ни є҆ди́нъ бо сопроти́висѧ и҆̀мъ боѧ́сѧ и҆́хъ.
3 Нача́лствѹющїи бо стра́намъ и҆ власти́телїе и҆ ца́рстїи книгѡ́чїѧ почита́хѹ ї҆ѹдє́й:
4 стра́хъ бо мардохе́евъ належа́ше на ни́хъ.
5 Приложи́сѧ бо повелѣ́нїе царе́во и҆менова́тисѧ є҆мѹ̀ по всемѹ̀ ца́рствїю.
6 И҆ въ сѹ́сѣхъ гра́дѣ и҆зби́ша ї҆ѹде́є пѧ́ть сѡ́тъ мѹже́й:
7 Фарса́на, неста́нна и҆ делфѡ́на, и҆ фасга́на
8 и҆ фардаѳа́на, и҆ варе́а и҆ сарвака́на,
9 и҆ мармасі́ма и҆ рѹфе́а, и҆ а҆рсе́а и҆ завѹѳеѳа́ма,
10 де́сѧть сынѡ́въ а҆ма́на а҆мадаѳѹ́ева вѹге́анина врага̀ ї҆ѹдеѡмъ, и҆́же ѿ ѳармаѳе́а, и҆ разгра́биша въ то́й де́нь (и҆мѣ҄нїѧ и҆́хъ):
11 и҆ сказа́ша число̀ и҆збїе́нныхъ царю̀ въ сѹ́сѣхъ гра́дѣ.
12 И҆ речѐ ца́рь ко є҆сѳи́ри: и҆зби́ша ї҆ѹде́є въ сѹ́сѣъ гра́дѣ пѧ́ть сѡ́тъ мѹже́й, по ѡ҆крє́стнымъ же страна́мъ коли́кѡ, мни́ши, погѹби́ша; и҆ чесогѡ̀ є҆щѐ проси́ши, и҆ бѹ́детъ тѝ;
13 И҆ речѐ є҆сѳи́рь ко царю̀: да да́стсѧ та́кожде ї҆ѹде́ѡмъ твори́ти заѹ́тра, ѩ҆́кѡ да повѣ́сѧтъ де́сѧть сынѡ́въ а҆ма́новыхъ.
14 И҆ повелѣ̀ ца́рь та́кѡ бы́ти, и҆ попѹстѝ ї҆ѹде́ѡмъ внѣ̀ гра́да повѣ́сити тѣлеса̀ сынѡ́въ а҆ма́новыхъ.
15 И҆ собра́шасѧ ї҆ѹде́є, и҆̀же въ сѹ́сѣхъ, въ четвертыйна́десѧть дее́нь а҆да́ра, и҆ и҆зби́ша мѹже́й три́ста, и҆ ничто́же разгра́биша.
16 Про́чїи же ї҆ѹде́є, и҆̀же во ца́рствїи, собра́шасѧ и҆ себѣ̀ помога́хѹ и҆ почи́ша ѿ бра́ней: и҆зби́ша бо ѿ ни́хъ пѧтьна́десѧть ты́сѧщъ въ третїйна́десѧть а҆да́ра, и҆ ничто́же расхи́тиша.
17 И҆ почи́ша въ четвертыйна́десѧть де́нь тогѡ́жде мц҇а и҆ провожда́хѹ то́й де́нь ѹ҆покое́нїѧ съ ра́достїю и҆ весе́лїемъ.
18 Ї҆ѹде́є же въ сѹ́сѣхъ гра́дѣ собра́шасѧ и҆ въ четвертыйна́десѧть почи́ша: проводи́ша же и҆ пѧтыйна́десѧть съ ра́достїю и҆ весе́лїемъ.
19 Сегѡ̀ ра́ди ї҆ѹде́є разсѣ́ѧннїи во всѧ́цѣй странѣ̀ внѣ́шней провожда́ютъ четвертыйна́десѧть де́нь а҆да́ра бла́гъ съ весе́лїемъ, посыла́юще ча҄сти кі́йждо бли́жнемѹ: живѹ́щїй же въ митропо́лїѧхъ и҆ въ пѧтыйна́десѧть де́нь а҆да́ра весе́лїѧ благі́й провожда́ютъ, посыла́юще ча҄сти бли҄жним.
20 Написа̀ же мардохе́й словеса̀ сїѧ҄ въ кни́гѹ и҆ посла̀ ї҆ѹде́ѡмъ, є҆ли́цы бѣ́ша въ ца́рствїи а҆ртаѯе́рѯовѣ, бли́з̾ и҆ дале́че сѹ́щымъ,
21 ѹ҆ста́вити дни҄ сїѧ҄ бла҄ги, є҆́же провожда́ти четвертыйна́десѧть и҆ пѧтыйна́десѧть де́нь а҆да́ра:
22 въ си́хъ бо дне́хъ почи́ша ї҆ѹде́є ѿ вра҄гъ свои́хъ: и҆ мц҇ъ а҆да́ръ, и҆́же ѡ҆брати́сѧ и҆̀мъ ѿ пла́ча въ ра́дость и҆ ѿ болѣ́зни во благі́й де́нь, провожда́ти ве́сь во благи́хъ дне́хъ ра́дости и҆ весе́лїѧ, посыла́юще ча҄сти ко дрѹгѡ́мъ и҆ ни́щымъ.
23 И҆ прїѧ́ша ї҆ѹде́є, ѩ҆́коже написа̀ и҆̀мъ мардохе́й:
24 ка́кѡ а҆ма́нъ а҆мадаѳѹ́евъ македѡ́нѧнинъ ра́товаше ї҆ѹдеєвъ, и҆ ка́кѡ и҆знесѐ сѹ́дъ и҆ жре́бїй, є҆́же погѹби́ти и҆̀хъ,
25 и҆ ѩ҆́кѡ вни́де ко царю̀, глаго́лѧ, да повѣ́ситъ мардохе́а: є҆ли҄ка нача̀ наводи́ти на ї҆ѹдє́и ѕла́ѧ, на него̀ бы́ша, и҆ повѣ́шенъ бы́сть са́мъ и҆ ча҄да є҆гѡ̀.
26 Сегѡ̀ ра́ди нареко́шасѧ дні́е сі́и фѹрі́мъ ра́ди жрє́бїй, занѐ дїале́ктомъ и҆́хъ жрє́бїи нарица́ютсѧ фѹрі́мъ, ра́ди слове́съ є҆пїсто́лїи сеѧ̀, и҆ є҆ли҄ка пострада́ша си́хъ ра́ди, и҆ є҆ли҄ка и҆̀мъ приключи́шасѧ.
27 Ѹ҆ста́ви ѹ҆́бѡ, и҆ та́кѡ прїѧ́ша ї҆ѹде́є на себѐ и҆ на сѣ́мѧ своѐ и҆ на ириложи́вшихсѧ къ ни҄мъ, нижѐ и҆на́че да ѹ҆потреблѧ́ютъ: дні́е же сі́и па́мѧти соверша́еми по ро́дѹ и҆ ро́дѹ, и҆ гра́дѹ и҆ ѻ҆те́чествѹ и҆ странѣ̀.
28 Дні́е же сі́и фѹрі́мъ да провожда́ютъ во всѧ́кое лѣ́то, и҆ па́мѧть да не ѡ҆скѹдѣ́етъ ѿ родѡ́бъ.
29 И҆ написа̀ є҆сѳи́рь царица дщѝ а҆мїнада́влѧ и҆ мардохе́й ї҆ѹде́анинъ, є҆ли҄ка сотвори́ша во ѹ҆твержде́нїе є҆пїсто́лїи ѡ҆ дне́хъ фѹрі́мъ.
30 И҆ мардохе́й и҆ є҆сѳи́рь цари́ца ѹ҆ста́виста себѣ̀ са́ми, и҆ тогда̀ ѹ҆ста́виста въ постѣ̀ свое́мъ совѣ́тъ сво́й.
31 И҆ є҆сѳи́рь сло́во поста́ви во вѣ́ки, и҆ напи́сано бы́сть въ па́мѧть.
Нашли в тексте ошибку? Выделите её и нажмите: Ctrl + Enter

Книга Есфирь, 9 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.