1 И҆ бы́сть сло́во гд҇не ко ї҆ѡ́нѣ втори́цею гл҃ѧ:
2 воста́ни и҆ и҆дѝ въ нїнеѵі́ю гра́дъ вели́кїй, и҆ проповѣ́ждь въ не́мъ по про́повѣди пре́ждней, ю҆́же а҆́зъ гл҃ахъ тебѣ̀.
3 И҆ воста̀ ї҆ѡ́на и҆ и҆́де въ нїнеѵі́ю, ѩ҆́коже гл҃а гд҇ь. Нїнеѵі́а же бѧ́ше гра́дъ вели́къ бг҃ѹ, ѩ҆́кѡ ше́ствїѧ пѹтѝ трїе́хъ дні́й.
4 И҆ нача́тъ ї҆ѡ́на входи́ти во гра́дъ, ѩ҆́кѡ ше́ствїе пѹтѝ днѐ є҆ди́нагѡ, и҆ проповѣ́да и҆ речѐ: є҆щѐ трѝ дни҄, и҆ нїнеѵі́а преврати́тсѧ.
5 И҆ вѣ́роваша мѹ́жїе нїнеѵі́йстїи бг҃ови, и҆ заповѣ́даша по́стъ, и҆ ѡ҆блеко́шасѧ во врє́тища ѿ вели́ка и҆́хъ да́же до ма́ла и҆́хъ.
6 И҆ до́йде сло́во ко царю̀ нїнеѵі́йскомѹ, и҆ воста̀ съ престо́ла своегѡ̀ и҆ све́рже ри҄зы своѧ҄ съ себє̀, и҆ ѡ҆блече́сѧ во вре́тище и҆ сѣ́де на пе́пелѣ.
7 И҆ проповѣ́дасѧ и҆ рече́но бы́сть въ нїнеѵі́и ѿ царѧ̀ и҆ вельмо́жъ є҆гѡ̀ глаго́лющихъ: человѣ́цы и҆ ско́ти, и҆ воло́ве и҆ ѻ҆́вцы да не вкѹ́сѧтъ ничесѡ́же, ни да пасѹ́тсѧ, нижѐ воды̀ да пїю́тъ.
8 И҆ ѡ҆блеко́шасѧ во врє́тища человѣ́цы и҆ ско́ти и҆ возопи́ша прилѣ́жнѡ къ бг҃ѹ, и҆ возврати́сѧ кі́йждо ѿ пѹтѝ своегѡ̀ лѹка́вагѡ и҆ ѿ непра́вды сѹ́щїѧ въ рѹка́хъ и҆́хъ, глаго́люще:
9 кто̀ вѣ́сть, а҆́ще раска́етсѧ и҆ ѹ҆моле́нъ бѹ́детъ бг҃ъ, и҆ ѡ҆брати́тсѧ ѿ гнѣ́ва ѩ҆́рости своеѧ̀, и҆ не поги́бнемъ;
10 И҆ ви́дѣ бг҃ъ дѣла̀ и҆́хъ, ѩ҆́кѡ ѡ҆брати́шасѧ ѿ пѹті́й свои́хъ лѹка́выхъ, и҆ раска́ѧсѧ бг҃ъ ѡ҆ ѕлѣ̀, є҆́же гл҃аше сотвори́ти и҆̀мъ, и҆ не сотворѝ.
Нашли в тексте ошибку? Выделите её и нажмите:
Ctrl + Enter
Книга пророка Ионы, 3 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784