1 И҆ рече́тъ: слы́шите ѹ҆́бѡ сїѧ҄, вла҄сти до́мѹ ї҆а́кѡвлѧ и҆ ѡ҆ста́вшїи до́мѹ ї҆и҃лева: не ва́мъ ли є҆́сть є҆́же разѹмѣ́ти сѹ́дъ;
2 Ненави́дѧщїи добра̀, а҆ и҆́щѹщїи ѕла̀, похища́ющїи ко́жы и҆́хъ съ ни́хъ и҆ плѡ́ти и҆́хъ ѿ косте́й и҆́хъ:
3 ѩ҆́коже ѡ҆б̾ѧдо́ша плѡ́ти люді́й мои́хъ, и҆ ко́жы и҆́хъ ѿ косте́й и҆́хъ ѡ҆дра́ша, и҆ кѡ́сти и҆́хъ столко́ша и҆ содроби́ша ѩ҆́кѡ плѡ́ти въ коно́бъ и҆ ѩ҆́кѡ мѧса̀ въ горне́цъ:
4 та́кѡ возопїю́тъ ко гд҇ѹ, и҆ не послѹ́шаетъ и҆́хъ и҆ ѿврати́тъ лицѐ своѐ ѿ ни́хъ въ то̀ вре́мѧ, поне́же слѹка́вноваша въ начина́нїихъ свои́хъ на нѧ̀.
5 Сїѧ҄ гл҃етъ гд҇ь на проро́ки льстѧ́щыѧ люді́й мои́хъ, ѹ҆грыза́ющыѧ зѹбы̀ свои́ми и҆ проповѣ́дающыѧ ми́ръ на ни́хъ, и҆ не вда́сѧ во ѹ҆ста̀ и҆́хъ, возста́виша на ни́хъ ра́ть:
6 сегѡ̀ ра́ди но́щь бѹ́детъ ва́мъ ѿ видѣ́нїѧ, и҆ тма̀ бѹ́детъ ва́мъ ѿ волхвова́нїѧ, и҆ за́йдетъ со́лнце на проро́ки, и҆ поме́ркнетъ на нѧ̀ де́нь:
7 и҆ ѹ҆срамѧ́тсѧ ви́дѧщїи сѡ́нїѧ, и҆ посмѣѧ́ни бѹ́дѹтъ волсвѝ, и҆ возглаго́лютъ на ни́хъ всѝ сі́и, занѐ не бѹ́детъ послѹ́шаѧй и҆́хъ.
8 А҆́ще а҆́зъ не напо́лню си́лы дх҃омъ гд҇нимъ и҆ сѹдо́мъ и҆ си́лою, є҆́же возвѣсти́ти ї҆а́кѡвѹ нечє́стїѧ є҆гѡ̀ и҆ ї҆и҃леви грѣхѝ є҆гѡ̀.
9 Слы́шите сїѧ҄, старѣ҄йшины до́мѹ ї҆а́кѡвлѧ и҆ ѡ҆ста́вшїи до́мѹ ї҆и҃лева, гнѹша́ющїисѧ сѹдо́мъ и҆ всѧ҄ пра҄ваѧ развраща́ющїи,
10 созида́ющїи сїѡ́на кровьмѝ и҆ ї҆ер҇ли́ма непра́вдами:
11 старѣ҄йшины є҆гѡ̀ на да́рѣхъ сѹжда́хѹ, и҆ жерцы̀ є҆гѡ̀ на мздѣ̀ ѿвѣщава́хѹ, и҆ проро́цы є҆гѡ̀ на сребрѣ̀ волхвова́хѹ, и҆ на гд҇ѣ почива́хѹ, глаго́люще: не гд҇ь ли въ на́съ є҆́сть; не прїи́дѹтъ на ны̀ ѕла҄ѧ.
12 Сегѡ̀ ра́ди ва́съ дѣ́ла сїѡ́нъ ѩ҆́коже ни́ва и҆з̾ѡре́тсѧ, и҆ ї҆ер҇ли́мъ ѩ҆́кѡ ѻ҆во́щное храни́лище бѹ́детъ, и҆ гора̀ до́мѹ ѩ҆́коже лѹ́гъ дѹбра́вный.
Нашли в тексте ошибку? Выделите её и нажмите:
Ctrl + Enter
Книга пророка Михея, 3 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784