1
2
3 Въ время оно. приступишя къ Иисусу фарисеи. искушающе и глаголюще аще достоить человеку. пустити жену свою по вьсакои вине
4 и отъвещавъ Иисусъ рече имъ. несте ли чьли. яко сътвори испрьва мужьскъ полъ и женьскъ сътворилъ я есть
5 и рече. сего ради. оставить человекъ отца своего и ма тере. и прилепиться къ жене своеи. и будета оба въ плъть едину.
6 темьже уже несте дъва. нъ плъть едина еже убо Богъ съчета. человекъ да не разлучаеть.
7 глаголашя Ему. чьто убо Моиси заповеда. дати кънигы распустьныя. и отъпустити ю.
8 глагола имъ яко Моиси. по жестосрьдию вашему. повеле вамъ. пустити жены вашя. и спрьва же не бысть тако.
9 глаголю же вамъ. яко аще иже пустить жену свою. разве словесе любодеа ньнааго. творитъ ю прелюбы творити. и женяися потьбегою прелюбы творить.
10 и глаголашя Ему ученици Его. аще тако есть вина человеку съ женою. у нее есть не женитися.
11 Онъ же рече имъ. не вьси. въместять словесе сего. нъ имъ же дано есть.
12 сутъ бо каженици. иже изъ чрева матерьня. родишяся тако. и суть каженици. яже исказишя человеции суть каженици. иже исказишяся сами. Царствия ради Небесьнааго. могыи въместити да въместить.
13
14
15
16 Въ время оно. юноша некыи приступи къ Иисусу моля И глаголя. Учителю благыи. чьто благо сътвору. да имамъ животъ вечьныи.
17 Онъ же рече ему. чьто Мя глаголеши блага. никътоже благъ. тъкъмо единъ Богъ. аще ли хощеши въ животъ вечьныи вънити. съблюди заповеди.
18 глагола Ему кыя. Иисусъ же рече ему. еже не убиеши. не прелюбы сътвориши. не украдеши. не лъжесъведетель буди.
19 чьти отца своего и матерь. и възлюбиши ближьнеаго своего. яко самъ ся.
20 глагола Ему юноша. вьса си сътворихъ отъ юности моея. чесо есмь еще не доконьчалъ.
21 рече ему Иисусъ. аще хощеши съврьшенъ быти иди продаждь имение твое и даждь нищиимъ. и имети имааши съкровище на небесе. и приди въследъ Мене
22 слышавъ же юноша слово. отъиде скръбя бе бо имея сътяжания мънога.
23 Иисусъ же рече. къ ученикомъ Своимъ. амин. глаголю вамъ. яко не удобь вънидеть богать. въ Царьствие Небесьное.
24 пакы глаголю вамъ. яко удобее есть вельбуду. сквозе уши игълине проити. неже богату въ Царьствие Божие вънити
25 слышавъше же се ученици Его. дивлеахуся зело. глаголюще. къто убо можеть спасенъ быти
26 възьревъ же Иисусъ рече имъ отъ чловекъ се не възъможьно есть. а отъ Бога вьса възможьна суть.
27 тогда отъвещавъ Петръ рече Ему. се мы оставихомъ вьса. и въследъ Тебе идохомъ. чьто будеть намъ
28 Исусъ же рече ему аминъ. глаголю вамъ яко вы шьдъшеи по Мъне. въ пакыбытие. егда сядеть Сынъ Чловечьскыи. на престоле славы Своея. сядете и вы на дъвоюна десяте престолу. судяще обема надесяте коленома Израилевома
29 и вьсакъ иже оставить братию. или сестры. или отца. или матере. или жену. или дети. или села. или храмы. имене Моего ради. сътократицею прииметь. и животъ вечьны и наследьствить
30 мънози же будуть. прьвии последьнии. и последьнии прьвии.
Нашли в тексте ошибку? Выделите её и нажмите:
Ctrl + Enter
Евангелие отъ Матфеа, 19 глава. Остромирово Евангелие.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте.
