Напоминаеть Апостолъ Евреи ко добрымъ деломъ еже имають чинити, ко своимъ ближнимъ, и сами ку собе, и ко своимъ старшимъ • И Тімофея к нимъ посылаеть •
1 Братолюбие же да пребываеть в васъ •
2 И странънолюбия не забывайте, симъ убо не ведяще неціи, приаша Ангелы в домы своя •
3 Поминайте узники, яко и вы с ними связани есте • И обыдимыя, яко и сами в телеси пребываете •
4 Честенъ бракъ да будеть во всемъ, и ложе нескверно • Блудникомъ бо, и прелюбодеемъ судить Богъ •
5 Не сребролюбиви бывайте обычайми, но доволни теми иже имате • Той убо рече: не оставлю тебе, ниже отступлю от тебе •
6 А тако дерзающе можемъ глаголати: Господь мне помощникъ, и не убоюся что сотворить ми человекъ?
7 Поминайте наставники ваша, ониже глаголаша вамъ слово Божие, на ихъже житие возирающе и отидоштие • Наследуйте е в вере •
8 Ісусъ убо Христосъ, вчера и днесь тойже естъ, и будеть во веки •
9 Ученми различными, и странными не превозношайтеся • Добро бо естъ благодатию утвержати серца а не брашны, еже не спомогоша ходящихъ в нихъ •
10 Имамы жертовникъ, от негоже не имуть области ясти, сени телесной служащие •
11 Техъ животных ихже вносится кровь о гресехъ от первосвещенника во святыню • Сихъ телеса сожигахуся вне полъковъ •
12 Темже и Ісусъ да осветит Своею Кровию люди вне вратъ пострада •
13 Сего ради изыйдем к Нему въне полка, поношение Его носяще •
14 Не имамы бо изде пребывающего града, но гредущего възыскаемъ •
15 И того деля возъносимъ жертвы, и благодарения всегда Богови • Сей естъ плодъ устенъ исповедающихся имени Его •
16 Милостыню давайте • И общения не забывайте • Тацеми убо жертвами угодите Богу •
17 Повинуйтеся наставникомъ вашимъ, и покаряйтеся имъ • Тие бо бдять о душахъ вашихъ, яко слово воздати хотяще • Да с радостию сия творять, а не со воздыханиемъ, не годится убо вамъ сее •
18 Молитеся за насъ • Уповаемъ бо яко добрую совесть имамы, со всеми почтиве хотяще жити •
19 И тымъ болей прошу васъ, сие чините да воскоре навращуся вамъ •
20 Богъ же смирения изведый изъ мертвыхъ, Пастыря овъцамъ великаго • Кровию завета вечнаго, Господа нашего Ісуса Христа •
21 Да совершит васъ во всякомъ деле добромъ ко чинению воли Его • Творяй въ васъ все еже любо ест пред Нимъ • Ісусъ Христом Емуже слава, и держава во веки векомъ аминь •
22 Молю же васъ братия приимите слово утешения сего, ибо в мале написахъ вамъ •
23 Знайте брата нашего Тімофея, посланого къ вамъ, с нимже аще скоро пріидет, увижду васъ •
24 Целуйте вся стареішины ваша и вся святыя • Целует вас вся Італія •
25 Благодат со въсеми вами аминь •
Примечания:
Доконано ест ко Евреомъ посланіе святого славного Апостола, и мученика Христова Павла •
+ + +
Доконана ест сия книга зовемая Апостол, еже замыкает в собе найпервей Деания Апостольская • Потомъ посланией святыхъ Апостолъ, соборныхъ седмъ • Тажъ епистолъ светого Павла 14. Лета по нароженіи нашего Спасителя Ісуса Христа Сына Божия • Тысещнаго, пятьсотаго, и двадесеть пятого • Месеца марта • При держаніи наласкавшего господаря Жикгымонта Казімировича, короля Полского • И великого князя Литовъскаго, и Рускаго, и Жомойтьскаго, и иныхъ • Во славном месте Виленском выложена, и вытиснена • Працею и великою пилъностию • Доктора Франциска Скорины с Полоцка • Богу во Троици единому • И пречистой матери Его Маріи, со всеми святыми ко чьти • И людем посполитымъ к доброму навчению •
Ко Евреомъ послание, 13 глава. Библия Скорины.
