1 Глаго́лаше же и при́тчу к ним, ка́ко подоба́ет всегда́ моли́тися и не стужа́ти си́,
2 Глаго́ля: судия́ бе не́кий в не́коем гра́де, Бо́га не боя́ся и челове́к не срамля́яся.
3 Вдова́ же не́кая бе во гра́де том, и прихожда́ше к нему́, глаго́лющи: отмсти́ мене́ от сопе́рника моего́.
4 И не хотя́ше на до́лзе вре́мени. Последи́ же рече́ в себе́: а́ще и Бо́га не бою́ся, и челове́к не срамля́юся,
5 Но зане́ твори́т ми труды́ вдови́ца сия́, да отмщу́ ея́, да не до конца́ приходя́щи застои́т {труди́т}мене́.
6 Рече́ же Госпо́дь: слы́шите, что судия́ непра́вды глаго́лет?
7 Бог же не и́мать ли сотвори́ти отмще́ние избра́нных Свои́х, вопию́щих к Нему́ день и нощь, и долготерпя́ о них?
8 Глаго́лю вам, я́ко сотвори́т отмще́ние их вско́ре. Оба́че Сын Челове́ческий прише́д, у́бо обря́щет ли си́ ве́ру на земли́?
9 Рече́ же и ко други́м упова́ющим собо́ю, я́ко суть пра́ведницы, и уничижа́ющим про́чих, при́тчу сию́:
10 Челове́ка два внидо́ста в це́рковь помоли́тися, еди́н фарисе́й, а други́й мыта́рь.
11 Фарисе́й же став, си́це в себе́ моля́шеся: Бо́же, хвалу́ Тебе́ воздаю́, я́ко несмь я́коже про́чии челове́цы, хи́щницы, непра́ведницы, прелюбоде́е, или́ я́коже сей мыта́рь.
12 Пощу́ся двакра́ты в суббо́ту, десяти́ну даю́ всего́ ели́ко притяжу́.
13 Мыта́рь же издале́ча стоя́, не хотя́ше ни о́чию возвести́ на не́бо, но бия́ше пе́рси своя́, глаго́ля: Бо́же, ми́лостив бу́ди мне гре́шнику.
14 Глаго́лю вам, я́ко сни́де сей оправда́н в дом свой па́че о́наго, я́ко всяк вознося́йся смири́тся, смиря́яй же себе́ вознесе́тся.
15 Приноша́ху же к Нему́ и младе́нцы, да их ко́снется, ви́девше же ученицы́ запрети́ша им.
16 Иису́с же призва́в их, глаго́ла: оста́вите дете́й приходи́ти ко Мне и не брани́те им, таковы́х бо есть Ца́рствие Бо́жие.
17 Ами́нь бо глаго́лю вам: и́же а́ще не прии́мет Ца́рствия Бо́жия я́ко отроча́, не и́мать вни́ти в не́.
18 И вопроси́ Его́ не́кий князь, глаго́ля: Учи́телю благи́й, что сотвори́в, живо́т ве́чный насле́дствую?
19 Рече́ же ему́ Иису́с: что Мя глаго́леши бла́га? Никто́же благ, то́кмо еди́н Бог.
20 За́поведи ве́си, не прелюбы́ твори́, не уби́й, не укра́ди, не лжесвиде́тельствуй, чти отца́ твоего́ и ма́терь твою́.
21 Он же рече́: вся сия́ сохрани́х от ю́ности моея́.
22 Слы́шав же сия́ Иису́с рече́ ему́: еще́ еди́наго не доконча́л еси́, вся, ели́ка и́маши, прода́ждь и разда́й ни́щим, и име́ти и́маши сокро́вище на небеси́, и гряди́ во след Мене́.
23 Он же слы́шав сие́, приско́рбен бысть, бе бо бога́т зело́.
24 Ви́дев же его́ Иису́с приско́рбна бы́вша, рече́: ка́ко не удо́бь иму́щии бога́тство в Ца́рствие Бо́жие вни́дут.
25 Удо́бее бо есть вельбу́ду сквозе́ иглине́ у́ши проити́, не́же бога́ту в Ца́рствие Бо́жие вни́ти.
26 Ре́ша же слы́шавшии: то кто мо́жет спасе́н бы́ти?
27 Он же рече́: невозмо́жная от челове́к возмо́жна суть от Бо́га.
28 Рече́ же Петр: се мы оста́вихом вся и по Тебе́ идо́хом.
29 Он же рече́ им: ами́нь глаго́лю вам, я́ко никто́же есть, и́же оста́вит дом, или́ роди́тели, или́ бра́тию, или́ сестры́, или́ жену́, или́ ча́да, Ца́рствия ра́ди Бо́жия,
30 И́же не прии́мет мно́жицею во вре́мя сие́, и в век гряду́щий живо́т ве́чный.
31 Пое́м же обана́десяте ученика́ Своя́, рече́ к ним: се восхо́дим во Иерусали́м, и сконча́ются вся пи́санная проро́ки о Сы́не Челове́честе.
32 Предадя́т бо Его́ язы́ком и поруга́ются Ему́, и укоря́т Его́ и оплю́ют Его́,
33 И би́вше убию́т Его́, и в тре́тий день воскре́снет.
34 И ти́и ничесо́же от сих разуме́ша, и бе глаго́л сей сокрове́н от них, и не разумева́ху глаго́лемых.
35 Бысть же егда́ прибли́жися Иису́с во Иерихо́н, слепе́ц не́кий седя́ше при пути́ прося́.
36 Слы́шав же наро́д мимоходя́щь, вопроша́ше: что у́бо есть сие́?
37 Пове́даша же ему́, я́ко Иису́с Назаряни́н мимохо́дит.
38 И возопи́, глаго́ля: Иису́се Сы́не Дави́дов, поми́луй мя.
39 И предиду́щии преща́ху ему́, да умолчи́т, он же па́че мно́жае вопия́ше: Сы́не Дави́дов, поми́луй мя.
40 Став же Иису́с повеле́ привести́ его́ к Себе́. Прибли́жшу же ся ему́ к Нему́, вопроси́ его́,
41 Глаго́ля: что хо́щеши, да ти сотворю́? Он же рече́: Го́споди, да прозрю́.
42 Иису́с же рече́ ему́: прозри́, ве́ра твоя́ спасе́ тя.
43 И а́бие прозре́, и во след Его́ идя́ше, сла́вя Бо́га. И вси лю́дие ви́девше возда́ша хвалу́ Бо́гови.
