1 Воззре́в же ви́де вмета́ющия в храм набдя́щий име́ния, {в сокро́вищное храни́лище}да́ры своя́ бога́тыя.
2 Ви́дев же и не́кую вдови́цу убо́гу вмета́ющу ту две ле́пте,
3 И рече́: вои́стинну глаго́лю вам, я́ко вдови́ца сия́ убо́гая мно́жае всех вве́рже.
4 Вси бо си́и от избы́тка своего́ вверго́ша в да́ры Бо́гови, сия́ же от лише́ния своего́ все житие́, е́же име́, вве́рже.
5 И не́ким глаго́лющим о це́ркви, я́ко ка́мением до́брым и сосу́ды укра́шена, рече́:
6 Сия́ я́же ви́дите, прии́дут дни́е, в ня́же не оста́нет ка́мень на ка́мени, и́же не разори́тся.
7 Вопроси́ша же Его́, глаго́люще: Учи́телю, когда́ у́бо сия́ бу́дут? И что есть зна́мение, егда́ хотя́т сия́ бы́ти?
8 Он же рече́: блюди́те, да не прельще́ни бу́дете, мно́зи бо прии́дут во и́мя Мое́, глаго́люще, я́ко Аз есмь, и вре́мя прибли́жися. Не изы́дите у́бо во след их.
9 Егда́ же услы́шите бра́ни и нестрое́ния, не убо́йтеся: подоба́ет бо сим бы́ти пре́жде: но не у́ [абие] кончи́на.
10 Тогда́ глаго́лаше им: воста́нет бо язы́к на язы́к, и ца́рство на ца́рство.
11 Тру́си же вели́цы по ме́стам и гла́ди и па́губы бу́дут, страхова́ния же и зна́мения ве́лия с небесе́ бу́дут.
12 Пре́жде же сих всех, возложа́т на вы ру́ки своя́ и иждену́т, предаю́ще на со́нмища и темни́цы, ведо́мы к царе́м и влады́кам, и́мене Моего́ ра́ди,
13 Прилучи́тся же вам во свиде́тельство.
14 Положи́те у́бо на сердца́х ва́ших, не пре́жде поуча́тися отвещава́ти.
15 Аз бо дам вам уста́ и прему́дрость, е́йже не возмо́гут проти́витися или́ отвеща́ти вси противля́ющиися вам.
16 Пре́дани же бу́дете и роди́тели и бра́тиею и ро́дом и дру́ги, и умертвя́т от вас.
17 И бу́дете ненави́дими от всех и́мене Моего́ ра́ди.
18 И влас главы́ ва́шея не поги́бнет.
19 В терпе́нии ва́шем стяжи́те ду́ши ва́ша.
20 Егда́ же у́зрите обстои́мь Иерусали́м во́и, тогда́ разуме́йте, я́ко прибли́жися запусте́ние ему́.
21 Тогда́ су́щии во Иуде́и да бе́гают в го́ры, и и́же посреде́ его́, да исхо́дят, и и́же во страна́х, да не вхо́дят вонь.
22 Я́ко дни́е отмще́нию си́и суть, я́ко испо́лнитися всему́ пи́санному.
23 Го́ре же иму́щим во утро́бе и доя́щим в ты́я дни, бу́дет бо беда́ ве́лия на земли́ и гнев на лю́дех сих.
24 И паду́т во о́стрии меча́, и плене́ни бу́дут во вся язы́ки, и Иерусали́м бу́дет попира́емь язы́ки, до́ндеже сконча́ются времена́ язы́к.
25 И бу́дут зна́мения в со́лнце и луне́ и звезда́х, и на земли́ туга́ язы́ком от неча́яния шу́ма морска́го и возмуще́ния,
26 Издыха́ющим челове́ком от стра́ха и ча́яния гряду́щих на вселе́нную, си́лы бо небе́сныя подви́гнутся.
27 И тогда́ у́зрят Сы́на Челове́ческа гряду́ща на о́блацех с си́лою и сла́вою мно́гою.
28 Начина́ющим же сим быва́ти, восклони́теся и воздви́гните главы́ ва́ша, зане́ приближа́ется избавле́ние ва́ше.
29 И рече́ при́тчу им: ви́дите смоко́вницу и вся древа́,
30 Егда́ прошиба́ются уже́, ви́дяще са́ми ве́сте, я́ко близ жа́тва есть.
31 Та́ко и вы, егда́ у́зрите сия́ быва́юща, ве́дите, я́ко близ есть Ца́рствие Бо́жие.
32 Ами́нь глаго́лю вам, я́ко не и́мать прейти́ род сей, до́ндеже вся сия́ бу́дут.
33 Не́бо и земля́ ми́мо и́дет, а словеса́ Моя́ не и́мут прейти́.
34 Внемли́те же себе́, да не когда́ отягча́ют се́рдца ва́ша объяде́нием и пия́нством и печа́льми жите́йскими, и на́йдет на вы внеза́пу день той.
35 Я́ко сеть бо прии́дет на вся живу́щия на лицы́ всея́ земли́.
36 Бди́те у́бо на вся́ко вре́мя моля́щеся, да сподо́битеся убежа́ти всех сих хотя́щих бы́ти, и ста́ти пред Сы́ном Челове́ческим.
37 Бе́ же во дни во це́ркви учя́, но́щию же исходя́ водворя́шеся в горе́ нарица́емей Елео́н.
38 И вси лю́дие из у́тра прихожда́ху к Нему́ во це́рковь послу́шати Его́.
