1 И҆ бы́сть гла́дъ на землѝ во дни҄ даві́дѡвы трѝ лѣ҄та, лѣ́то по лѣ́тѹ. И҆ вопросѝ даві́дъ лица̀ гд҇нѧ и҆ речѐ гд҇ь: над̾ саѹ́ломъ и҆ над̾ до́момъ є҆гѡ̀ ѡ҆би́да въ сме́рти крове́й є҆гѡ̀, поне́же ѹ҆мертвѝ гаваѡні́ты.
2 И҆ призва̀ ца́рь даві́дъ гаваѡні́ты и҆ речѐ къ ни҄мъ: и҆ гаваѡні́тѧне не сѹ́ть сы́нове ї҆и҃лєвы, но то́кмѡ ѿ ѡ҆ста́ткѡвъ а҆морре́йскихъ, и҆ сы́нове ї҆и҃лєвы клѧ́шасѧ и҆̀мъ: саѹ́лъ же взыска̀ порази́ти ѧ҆̀, внегда̀ поревнова́ти є҆мѹ̀ по сынѣ́хъ ї҆и҃левыхъ и҆ ї҆ѹ́диныхъ.
3 И҆ речѐ даві́дъ ко гаваѡні́тѧнѡмъ: что̀ сотворю̀ ва́мъ; и҆ чи́мъ ѹ҆молю̀, да благослови́те достоѧ́нїе гд҇не;
4 И҆ рѣ́ша є҆мѹ̀ гаваѡні́тѧне: нѣ́сть на́мъ сребра̀ и҆лѝ зла́та со саѹ́ломъ и҆ съ до́момъ є҆гѡ̀, и҆ нѣ́сть на́мъ мѹ́жа ѹ҆мертви́ти ѿ всегѡ̀ ї҆и҃лѧ. И҆ речѐ: что̀ вы̀ глаго́лете, и҆ сотворю̀ ва́мъ;
5 И҆ рѣ́ша ко царю̀: мѹ҄жа, и҆́же совершѝ над̾ на́ми и҆ погна́ ны, и҆́же ѹ҆мы́сли потреби́ти ны̀, потреби́мъ є҆го̀, да не бѹ́детъ во всѣ́хъ предѣ́лѣхъ ї҆и҃левыхъ:
6 дади́те на́мъ се́дмь мѹже́й ѿ сынѡ́въ є҆гѡ̀, и҆ повѣ́симъ и҆̀хъ на со́лнцѣ гд҇еви въ гаваѡ́нѣ саѹ́ли и҆збра́нныхъ гд҇нихъ. И҆ речѐ ца́рь: а҆́зъ да́мъ.
7 И҆ пощадѣ̀ ца́рь мемфївосѳе́а, сы́на ї҆ѡнаѳа́нѧ сы́на саѹ́лѧ, клѧ́твы ра́ди гд҇ни, ѩ҆́же посредѣ̀ и҆́хъ и҆ посредѣ̀ даві́да и҆ посредѣ̀ ї҆ѡнаѳа́на сы́на саѹ́лѧ.
8 И҆ взѧ̀ ца́рь два̀ сы҄на ресфы̀ дще́ре а҆і́а, подло́жницы саѹ́ли, и҆̀хже родѝ саѹ́лѹ, є҆рмѡні́а и҆ мемфївосѳе́а, и҆ пѧ́ть сынѡ́въ мелхо́лы дще́ре саѹ́ли и҆̀хже родѝ є҆сдрїи́лѹ сы́нѹ верзеллі́а моѹлаѳі́ева,
9 и҆ дадѐ и҆̀хъ въ рѹ́ки гаваѡні́тѡмъ. И҆ повѣ́сиша ѧ҆̀ на со́лнцѣ на горѣ̀ пред̾ гд҇емъ, и҆ падо́ша та́мѡ сі́и се́дмь вкѹ́пѣ: ті́и же ѹ҆мро́ша во дне́хъ жа́твы пе́рвыхъ, въ нача́лѣ жа́твы ѩ҆чме́нѧ.
10 И҆ взѧ̀ ресфа̀ дщѝ а҆і́ина вре́тище, и҆ потчѐ є҆̀ себѣ̀ при ка́мени, въ нача́лѣ жа́твы ѩ҆чме́нѧ до́ндеже снидо́ша на ни́хъ во́ды бж҃їѧ съ небесѐ, и҆ не дадѐ пти́цамъ небє́снымъ дне́мъ почи́ти на ни́хъ, нижѐ ѕвѣрє́мъ зємны́мъ но́щїю.
11 И҆ повѣ́даша даві́дѹ всѧ҄ є҆ли҄ка сотворѝ ресфа̀ дще́рь а҆і́а, подло́жница саѹ́лѧ. И҆ и҆стлѣ́ша, и҆ взѧ̀ ѧ҆̀ да́нъ сы́нъ ї҆ѡ́й, и҆́же ѿ и҆сча́дїй и҆споли́новыхъ.
12 И҆ и҆́де даві́дъ, и҆ взѧ̀ кѡ́сти саѹ҄ли и҆ кѡ́сти ї҆ѡнаѳа́на сы́на є҆гѡ̀ ѿ мѹже́й сынѡ́въ ї҆аві́са галаа́дскагѡ, и҆̀же ѹ҆крадо́ша и҆̀хъ ѿ сто́гны веѳса́ни, занѐ повѣ́сиша и҆̀хъ та́мѡ и҆ноплемє́нницы въ де́нь, въ ѻ҆́ньже порази́ша и҆ноплемє́нницы саѹ́ла въ гелвѹ́и.
13 И҆ вознесѐ даві́дъ кѡ́сти саѹ҄ли ѿтѹ́дѹ и҆ кѡ́сти ї҆ѡнаѳа́на сы́на є҆гѡ̀, и҆ собра̀ кѡ́сти повѣ́шеныхъ на со́лнцѣ:
14 и҆ погребо́ша кѡ́сти саѹ́ли и҆ кѡ́сти ї҆ѡнаѳа́на сы́на є҆гѡ̀, и҆ кѡ́сти повѣ́шеныхъ на со́лнцѣ, въ землѝ венїамі́новѣ, при краѝ во гро́бѣ кі́са ѻ҆тца̀ є҆гѡ̀, и҆ сотвори́ша всѧ҄ є҆ли҄ка заповѣ́да ца́рь. И҆ послѹ́ша бг҃ъ землѝ по си́хъ.
15 И҆ бы́сть па́ки бра́нь и҆ноплеме́нникѡмъ со ї҆и҃лтѧны. И҆ сни́де даві́дъ и҆ ѻ҆́троцы є҆гѡ̀ съ ни́мъ, и҆ би́шасѧ со и҆ноплемє́нники: и҆ ѹ҆трѹди́сѧ даві́дъ.
16 И҆ ї҆есві́й, и҆́же бѣ̀ ѿ внѹ҄къ рафа́нихъ, (ѹ҆ негѡ́же) бѣ̀ вѣ́съ копїѧ̀ є҆гѡ̀ три́ста сї҄кль вѣ́са мѣ́дѧна, и҆ то́й бѣ̀ препоѧ́санъ ѻ҆рѹ́жїемъ, и҆ хотѧ́ше порази́ти даві́да.
17 И҆ помо́же є҆мѹ̀ а҆ве́сса сы́нъ сарѹ́инъ, и҆ и҆зба́ви даві́да а҆ве́сса, и҆ поразѝ и҆ноплеме́нника, и҆ ѹ҆мертвѝ є҆го̀. Тогда̀ клѧ́шасѧ мѹ́жїе даві́дѡвы, глаго́люще: не и҆зы́деши ктомѹ̀ съ на́ми на бра́нь, да не ѹ҆гаси́ши свѣти́лника ї҆и҃лева.
18 И҆ бы́сть по си́хъ є҆щѐ бра́нь въ ге́ѳѣ со и҆ноплемє́нники: тогда̀ поразѝ совохе́й и҆́же ѿ а҆со́ѳы сѡ́бранныѧ внѹ́ки гїга́нтѡвы.
19 И҆ бы́сть па́ки бра́нь въ ро́мѣ со и҆ноплемє́нники: и҆ поразѝ є҆леана́нъ сы́нъ а҆рїѡргі́ма виѳлее́млѧнинъ голїа́ѳа и҆́же ѿ геѳѳе́а, и҆ дре́во копїѧ̀ є҆гѡ̀ бы́сть а҆́ки наво́й ткѹ́щихъ.
20 И҆ бы́сть па́ки бра́нь въ ге́ѳѣ: и҆ бѣ̀ мѹ́жъ ѿ мадѡ́на, и҆ пе́рсты рѹ́къ є҆гѡ̀ и҆ пе́рсты но́гъ є҆гѡ̀ по шестѝ, число́мъ два́десѧть четы́ри: и҆ то́й роди́сѧ ѿ рафы̀,
21 и҆ ѹ҆ничижѝ ї҆и҃лѧ: и҆ ѹ҆бѝ є҆го̀ ї҆ѡнаѳа́нъ сы́нъ сафа́ѧ бра́та даві́дова.
22 Четы́ри сі́и роди́шасѧ внѹ́цы гїга́нтѡвы рафѣ̀ въ ге́ѳѣ, и҆ падо́ша ѿ рѹкѹ̀ даві́дѡвѹ и҆ ѿ рѹкѹ̀ рабѡ́въ є҆гѡ̀.
Нашли в тексте ошибку? Выделите её и нажмите:
Ctrl + Enter
Вторая книга Царств [Вторая Самуила], 21 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784