1 Ї҆исѹ́съ же состарѣ́сѧ проше́дъ дни҄. И҆ речѐ гд҇ь ко ї҆исѹ́сѹ: ты̀ состарѣ́лсѧ є҆сѝ де́нми, и҆ землѧ̀ ѡ҆ста́сѧ мно́га въ наслѣ́дїе:
2 и҆ сїѧ̀ землѧ̀ ѡ҆ста́вшаѧсѧ: предѣ́лы фѷлїстї҄мли, гесѹрї̀ и҆ ханане́й,
3 ѿ неѡбита́емыѧ, ѩ҆́же ѿ лица̀ є҆гѵ́пта да́же до предѣ҄лъ а҆ккарѡ́нскихъ ѡ҆шѹ́юю ханане́ѡвъ, причислѧ́етсѧ пѧти́мъ ѡ҆́бластемъ фѷлїстї҄мскимъ: газе́ѹ и҆ а҆зѡ́тїю, и҆ а҆скалѡні́тѹ и҆ гетѳе́ю, и҆ а҆ккарѡні́тѹ и҆ є҆ѵе́ю:
4 ѿ ѳема́нъ и҆ все́й землѝ ханаа́нстѣй прѧ́мѡ га́зѣ, и҆ сїдѡ́нїи да́же до а҆фе́ка, да́же до предѣ҄лъ а҆морре́йскихъ:
5 и҆ всю̀ зе́млю гавлї̀ фѷлїсті́млю, и҆ ве́сь лїва́нъ ѿ востѡ́къ со́лнца, ѿ галга́лъ под̾ горо́ю а҆ермѡ́нъ да́же до вхо́да є҆ма́ѳъ:
6 всѧ́къ ѡ҆бита́ющїй въ го́рнѣй ѿ лїва́на да́же до масрефѡѳмаі́ма, всѣ́хъ сїдѡ́нѧнъ а҆́зъ потреблю̀ ѿ лица̀ ї҆и҃лева: но разда́й ю҆̀ во жре́бїй ї҆и҃лю, ѩ҆́коже заповѣ́дахъ тебѣ̀:
7 и҆ нн҃ѣ раздѣлѝ зе́млю сїю̀ въ наслѣ́дїе девѧтѝ племенѡ́мъ и҆ полпле́мени манассі́инѹ ѿ ї҆ѻрда́на да́же до мо́рѧ вели́кагѡ, къ за́падѹ со́лнца да́си ю҆̀: мо́ре вели́кое предѣ́лъ бѹ́детъ.
8 Двѹ́ же племенѡ́мъ и҆ полѹпле́мени манассі́инѹ, рѹви́мѹ и҆ га́дѹ, дадѐ мѡѷсе́й ѡ҆б̾ ѻ҆нѹ̀ странѹ̀ ї҆ѻрда́на: къ восто́кѡмъ со́лнца дадѐ и҆̀мъ мѡѷсе́й ра́бъ гд҇ень,
9 ѿ а҆рои́ра, и҆́же є҆́сть на ѹ҆́стїи водоте́чи а҆рнѡ́ни, и҆ гра́дъ и҆́же посредѣ̀ де́бри, и҆ ве́сь мїсѡ́ръ ѿ медава́на:
10 всѧ҄ гра́ды сиѡ́на царѧ̀ а҆морре́йска, и҆́же ца́рствова во є҆севѡ́нѣ, да́же до предѣ҄лъ сынѡ́въ а҆ммѡ́нихъ:
11 и҆ галаа́дъ, и҆ предѣ́лы гесѹрї̀, и҆ махаѳї̀, всю̀ го́рѹ а҆ермѡ́нъ, и҆ всю̀ васані́тскѹ до є҆лхѝ:
12 всѐ ца́рство ѡ҆́гово въ васані́тїдѣ, и҆́же ца́рствова во а҆старѡ́ѳѣ и҆ во є҆драі́нѣ: се́й ѡ҆ста́сѧ (є҆ди́нъ) ѿ и҆споли́нѡвъ, и҆ ѹ҆бѝ є҆го̀ мѡѷсе́й, и҆ потребѝ.
13 И҆ не потреби́ша сы́нове ї҆и҃лєвы гесѹ́ра и҆ маха́ѳа и҆ ханане́а: и҆ живѧ́ше ца́рь гесѹрї̀ и҆ махаѳї̀ въ сынѣ́хъ ї҆и҃левыхъ да́же до сегѡ̀ днѐ.
14 То́кмѡ пле́мени леѵі́инѹ не даде́сѧ наслѣ́дїе: гд҇ь бг҃ъ ї҆и҃левъ, са́мъ наслѣ́дїе и҆́хъ, ѩ҆́коже речѐ и҆̀мъ гд҇ь. И҆ сїѐ раздѣле́нїе, є҆́же раздѣлѝ мѡѷсе́й сынѡ́мъ ї҆и҃лєвымъ (по племенѡ́мъ и҆́хъ) во а҆равѡ́ѳѣ мѡа́вли ѡ҆б̾ ѻ҆нѹ̀ странѹ̀ ї҆ѻрда́на проти́вѹ ї҆ерїхѡ́на.
15 И҆ дадѐ мѡѷсе́й пле́мени сынѡ́въ рѹви́млихъ по со́нмѡмъ и҆́хъ:
16 и҆ бы́ша и҆̀мъ предѣ́лы ѿ а҆рои́ра, и҆́же є҆́сть прѧ́мѡ де́бри а҆рнѡ́нскїѧ, и҆ гра́дъ, и҆́же є҆́сть въ де́бри а҆рнѡ́нстѣй,
17 и҆ всю̀ зе́млю мїсѡ́рскѹ да́же до є҆севѡ́на, и҆ всѧ҄ гра́ды и҆̀же сѹ́ть въ мїсѡ́рѣ, и҆ девѡ́ръ, и҆ вамѡ́ѳъ-ваа́лъ, и҆ до́мы веелмѡ҄ни,
18 и҆ ї҆а́сса и҆ кедимѡ́ѳа и҆ мифаа́ѳъ,
19 и҆ карїаѳе́мъ и҆ севама̀, и҆ са́рѳъ и҆ сїѡ́ръ на горѣ̀ є҆на́къ,
20 и҆ веѳфогѡ́ръ и҆ а҆сидѡ́ѳъ-фасга̀ и҆ виѳсїмѹ́ѳъ,
21 и҆ всѧ҄ гра́ды мїсѡ҄рски, и҆ всѐ ца́рство сиѡ́на царѧ̀ а҆морре́йска, є҆го́же ѹ҆бѝ мѡѷсе́й самаго̀, и҆ старѣ҄йшины мадїа҄мли, и҆ є҆ѵі́а и҆ роко́ма, и҆ сѹ́ра и҆ ѹ҆́ра и҆ рове́ка, кнѧ҄зи сїѡ҄рскїѧ, и҆ живѹ́щихъ на землѝ (то́й):
22 и҆ валаа́ма сы́на веѡ́рова волхва̀ ѹ҆би́ша мече́мъ сы́нове ї҆и҃лєвы въ сраже́нїи.
23 Бы́ша же предѣ́лы рѹви҄мли, ї҆ѻрда́нъ предѣ́лъ. Сїѐ наслѣ́дїе сынѡ́въ рѹви́млихъ по со́нмѡмъ и҆́хъ, гра́ды и҆́хъ и҆ се́ла и҆́хъ.
24 Даде́ же мѡѷсе́й сынѡ́мъ га́дѡвымъ по со́нмѡмъ и҆́хъ,
25 и҆ бы́ша и҆̀мъ предѣ́лы ї҆ази́ръ: всѝ гра́ди галаа҄ди и҆ полземлѝ сынѡ́въ а҆ммѡ́нихъ до а҆рои́ра, и҆́же є҆́сть пред̾ лице́мъ равва́ѳа:
26 и҆ ѿ є҆севѡ́на до рамѡ́ѳа къ ма́сфѣ, и҆ вотані́мѹ, и҆ манаі́мѹ до предѣ҄лъ даві́ровыхъ,
27 и҆ во є҆ме́кѣ виѳара́мъ и҆ виѳнамра̀, и҆ сѡхѡ́ѳъ и҆ сафѡ́нъ, и҆ про́чее ца́рство сиѡ́на царѧ̀ є҆севѡ́нска: и҆ ї҆ѻрда́нъ ѡ҆предѣлѧ́етъ да́же до страны̀ мо́рѧ хенере́ѳъ, ѡ҆б̾ ѻ҆нѹ̀ странѹ̀ ї҆ѻрда́на ѿ востѡ́къ.
28 Сїѐ наслѣ́дїе сынѡ́въ га́довыхъ по со́нмѡмъ и҆́хъ и҆ по градѡ́мъ и҆́хъ и҆ се́ламъ и҆́хъ.
29 И҆ дадѐ мѡѷсе́й полѹпле́мени манассі́инѹ по со́нмѡмъ и҆́хъ,
30 и҆ бы́ша предѣ́лы и҆́хъ ѿ манаі́ма, и҆ всѐ ца́рство васа́нско, и҆ всѐ ца́рство ѡ҆́га царѧ̀ васа́нска, и҆ всѧ҄ вє́си ї҆аі́ра, ѩ҆̀же сѹ́ть въ васані́тїдѣ, шестьдесѧ́тъ градѡ́въ:
31 и҆ по́лъ галаа́да, и҆ во а҆старѡ́ѳѣ, и҆ во є҆драі́нѣ, гра́ды ца́рства ѡ҆́гова въ васані́тїдѣ: и҆ да́шасѧ сынѡ́мъ махі́рѡвымъ, сынѡ́мъ манассї҄инымъ, и҆ полови́нѣ сынѡ́въ махі́ровыхъ по со́нмѡмъ и҆́хъ.
32 Сі́и сѹ́ть, и҆̀мже дадѐ наслѣ́дїе мѡѷсе́й ѡ҆б̾ ѻ҆нѹ̀ странѹ̀ ї҆ѻрда́на во а҆равѡ́ѳѣ мѡа́вли, прѧ́мѡ ї҆ерїхѡ́на на восто́ки.
33 Пле́мени же леѵі́инѹ не дадѐ мѡѷсе́й наслѣ́дїѧ: поне́же са́мъ гд҇ь бг҃ъ ї҆и҃левъ наслѣ́дїе є҆гѡ̀ є҆́сть, ѩ҆́коже гл҃а и҆̀мъ.
Нашли в тексте ошибку? Выделите её и нажмите:
Ctrl + Enter
Книга Иисуса Навина, 13 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784