1 И҆ сі́и наслѣ́довавшїи ѿ сынѡ́въ ї҆и҃левыхъ въ землѝ ханаа́нстѣй, и҆̀мже раздѣли́ша ю҆̀ въ наслѣ́дїе є҆леаза́ръ жре́цъ и҆ ї҆исѹ́съ сы́нъ наѵи́нъ и҆ кнѧ҄зи ѻ҆те́чествъ племе́нъ сынѡ́въ ї҆и҃левыхъ:
2 по жре́бїємъ наслѣ́диша, ѩ҆́коже заповѣ́да гд҇ь мѡѷсе́омъ да́ти девѧтѝ племенѡ́мъ и҆ полпле́мени (манассі́инѹ),
3 даде́ бо мѡѷсе́й наслѣ́дїе двѹ̀ племенѡ́мъ и҆ полпле́мени манассі́инѹ ѡ҆б̾ ѻ҆нѹ̀ странѹ̀ ї҆ѻрда́на: леѵі́тѡмъ же не дадѐ жре́бїѧ въ ни́хъ:
4 зане́же бы́ша сы́нове ї҆ѡ́сифѡвы два̀ племена̀, манассі́ино и҆ є҆фре́мле: и҆ не даде́сѧ ча́сти въ землѝ леѵі́тѡмъ, но то́кмѡ гра́ды ѡ҆бита́ти, и҆ предгра҄дїѧ скотѡ́мъ и҆́хъ, и҆ скоты̀ и҆́хъ.
5 ѩ҆́коже заповѣ́да гд҇ь мѡѷсе́ю, та́кѡ сотвори́ша сы́нове ї҆и҃лєвы и҆ раздѣли́ша зе́млю.
6 И҆ прїидо́ша сы́нове ї҆ѹ҄дины ко ї҆исѹ́сѹ въ галга́лы. И҆ речѐ къ немѹ̀ хале́въ ї҆ефонні́инъ кенезе́й: ты̀ вѣ́си сло́во, є҆́же гл҃а гд҇ь къ мѡѷсе́ю человѣ́кѹ бж҃їю ѡ҆ мнѣ̀ и҆ ѡ҆ тебѣ̀ въ ка́дисъ-варнѝ:
7 четы́редесѧти бо лѣ́тъ бѣ́хъ, є҆гда̀ посла́ мѧ мѡѷсе́й ра́бъ гд҇ень ѿ ка́дисъ-варнѝ соглѧ́дати зе́млю: и҆ ѿвѣща́хъ є҆мѹ̀ сло́во по се́рдцѹ є҆гѡ̀:
8 бра́тїѧ моѧ҄ ходи́вшїи со мно́ю преврати́ша се́рдце люді́й, а҆́зъ же приложи́хсѧ послѣ́довати гд҇еви бг҃ѹ моемѹ̀:
9 и҆ клѧ́тсѧ мѡѷсе́й въ то́й де́нь, глаго́лѧ: землѧ̀, на ню́же возше́лъ є҆сѝ, тебѣ̀ бѹ́детъ въ жре́бїй и҆ ча́дѡмъ твои҄мъ во вѣ́къ, ѩ҆́кѡ приложи́лсѧ є҆сѝ послѣ́довати гд҇ѹ бг҃ѹ моемѹ̀:
10 и҆ нн҃ѣ препита́ мѧ гд҇ь, ѩ҆́коже речѐ, сїѐ четы́редесѧть и҆ пѧ́тое лѣ́то, ѿне́лѣже гл҃а гд҇ь сло́во сїѐ къ мѡѷсе́ю, и҆ хожда́ше ї҆и҃ль въ пѹсты́ни: и҆ нн҃ѣ сѐ, мѝ дне́сь ѻ҆́смьдесѧтъ и҆ пѧ́ть лѣ́тъ:
11 є҆щѐ є҆́смь дне́сь могі́й, ѩ҆́коже є҆гда̀ посла́ мѧ мѡѷсе́й: та́кѡ и҆ нн҃ѣ могѹ̀ входи́ти и҆ и҆сходи́ти на бра́нь:
12 и҆ нн҃ѣ прошѹ̀ ѹ҆ тебє̀ горы̀ сеѧ̀, ѩ҆́коже речѐ гд҇ь въ де́нь ѡ҆́нъ, ѩ҆́кѡ ты̀ слы́шалъ є҆сѝ сло́во сїѐ въ де́нь ѻ҆́ный: нн҃ѣ же є҆накі́ми та́мѡ сѹ́ть, гра́ды твє́рды и҆ вели́цы: а҆́ще ѹ҆̀бо бѹ́детъ гд҇ь со мно́ю, потреблю̀ и҆̀хъ, ѩ҆́коже рече́ ми гд҇ь.
13 И҆ благословѝ є҆го̀ ї҆исѹ́съ, и҆ дадѐ хеврѡ́нъ хале́вѹ сы́нѹ ї҆ефонні́инѹ, сы́нѹ кенезе́инѹ въ жре́бїй.
14 Сегѡ̀ ра́ди бы́сть хеврѡ́нъ хале́вѹ ї҆ефонні́инѹ кенезе́инѹ въ жре́бїй да́же до днѐ сегѡ̀: поне́же возслѣ́дова повелѣ́нїю гд҇а бг҃а ї҆и҃лева.
15 И҆́мѧ же хеврѡ́нѹ пре́жде бѧ́ше гра́дъ а҆рго́въ: митропо́ль є҆накі́млѧнъ се́й. И҆ почѝ землѧ̀ ѿ бра́ни.
Нашли в тексте ошибку? Выделите её и нажмите:
Ctrl + Enter
Книга Иисуса Навина, 14 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784