1 И҆ бы́сть мѹ́жъ ѿ горы̀ є҆фре́мли, и҆ и҆́мѧ є҆мѹ̀ мі́ха:
2 и҆ речѐ ма́тери свое́й: ты́сѧща и҆ сто̀ сре́бреникѡвъ и҆̀же ѹ҆кра́дєны ѹ҆ тебє̀, и҆ заклина́ла мѧ̀ є҆сѝ и҆ глаго́лала є҆сѝ во ѹ҆́шы моѝ: сѐ, сребро̀ ѹ҆ менє̀, а҆́зъ взѧ́хъ є҆̀. И҆ речѐ ма́ти є҆гѡ̀: благослове́нъ сы́нъ мо́й гд҇еви.
3 И҆ ѿдадѐ ты́сѧщѹ и҆ сто̀ сре́бреникѡвъ ма́тери свое́й. И҆ речѐ ма́ти є҆гѡ̀: ѡ҆свѧща́ющи ѡ҆свѧти́хъ сребро̀ гд҇еви ѿ рѹкѝ моеѧ̀, тебѣ̀ сы́нови моемѹ̀ сотвори́ти (кѹмі́ръ) и҆зва́ѧнъ и҆ слїѧ́нъ, и҆ нн҃ѣ ѿда́мъ є҆̀ тебѣ̀.
4 И҆ ѿдадѐ сребро̀ ма́тери свое́й. И҆ взѧ̀ ма́ти є҆гѡ̀ двѣ́сти сре́бреникѡвъ и҆ дадѐ и҆̀хъ сребродѣ́лю, и҆ сотворѝ то́е (кѹмі́ръ) и҆зва́ѧнъ и҆ слїѧ́нъ: и҆ бы́сть въ домѹ̀ мі́хи.
5 И҆ до́мъ мі́хинъ є҆мѹ̀ до́мъ бж҃їй. И҆ сотворѝ є҆фѹ́дъ {Гре́ч.: є҆пѡмі́съ, славе́н.: нара́мникъ.} и҆ ѳерафі́нъ {їдѡли}: и҆ напо́лни рѹ́кѹ є҆ди́номѹ ѿ сынѡ́въ свои́хъ, и҆ бы́сть є҆мѹ̀ жре́цъ.
6 Въ ты҄ѧ же дни҄ не бѧ́ше царѧ̀ во ї҆и҃ли: кі́йждо мѹ́жъ, є҆́же пра́во ви́дѧшесѧ пред̾ ѻ҆чи́ма є҆гѡ̀, творѧ́ше.
7 И҆ бы́сть ю҆́ноша ѿ виѳлее́ма ї҆ѹ́дина и҆ ѿ ро́да пле́мене ї҆ѹ́дина, и҆ се́й леѵі́тинъ, и҆ ѡ҆бита́ше та́мѡ:
8 и҆ по́йде се́й мѹ́жъ ѿ гра́да виѳлее́ма ї҆ѹ́дина ѡ҆бита́ти, и҆дѣ́же ѡ҆брѧ́щетъ мѣ́сто: и҆ прїи́де до горы̀ є҆фре́мли и҆ да́же до до́мѹ мі́хина, є҆́же сотвори́ти пѹ́ть сво́й.
9 И҆ речѐ є҆мѹ̀ мі́ха: ѿкѹ́дѹ и҆́деши; И҆ речѐ є҆мѹ̀ леѵі́тинъ: а҆́зъ є҆́смь ѿ виѳлее́ма ї҆ѹ́дина, и҆ и҆дѹ̀ ѡ҆бита́ти, и҆дѣ́же ѡ҆брѧ́щѹ мѣ́сто.
10 И҆ речѐ є҆мѹ̀ мі́ха: сѣдѝ со мно́ю и҆ бѹ́ди мѝ ѻ҆те́цъ и҆ жре́цъ, и҆ а҆́зъ да́мъ тебѣ̀ сре́бреникѡвъ де́сѧть въ го́дъ и҆ дво́и ри҄зы, и҆ ѩ҆̀же на житїѐ тебѣ̀.
11 И҆ по́йде леѵі́тъ, и҆ нача̀ ѡ҆бита́ти ѹ҆ мѹ́жа. И҆ бы́сть ю҆́ноша є҆мѹ̀ ѩ҆́кѡ є҆ди́нъ ѿ сынѡ́въ є҆гѡ̀.
12 И҆ напо́лни мі́ха рѹ́кѹ леѵі́тинѹ, и҆ бы́сть є҆мѹ̀ ю҆́ноша жре́цъ, и҆ бѧ́ше въ домѹ̀ мі́хи.
13 И҆ речѐ мі́ха: нн҃ѣ ѹ҆вѣ́дѣхъ, ѩ҆́кѡ бл҃госотвори́тъ мнѣ̀ гд҇ь, ѩ҆́кѡ бы́сть мнѣ̀ леѵі́тинъ жре́цъ.
Нашли в тексте ошибку? Выделите её и нажмите: Ctrl + Enter

Книга Судей израилевых, 17 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.