1 Е҆гда́ же ѡ҆конча́ша ве́черю, введо́ша тѡві́ю къ не́й.
2 Ѻ҆́нъ же и҆ды́й помѧнѹ̀ словеса̀ рафаи́лѡва, и҆ взѧ̀ жера́токъ ѳѷмїа́мный, и҆ возложѝ се́рдце ры́бїе и҆ пе́чень, и҆ покѹрѝ:
3 є҆гда́ же ѡ҆бонѧ̀ де́мѡнъ воню̀, ѿбѣжѐ въ вы҄шнѧѧ є҆гѵ́пта, и҆ свѧза̀ є҆го̀ а҆́гг҃лъ.
4 Е҆гда́ же заключє́на бы́ста ѻ҆́ба, воста̀ тѡві́а ѿ ло́жа и҆ речѐ: воста́ни, сестро̀, и҆ помо́лимсѧ, да поми́лѹетъ ны̀ гд҇ь.
5 И҆ нача̀ тѡві́а глаго́лати: блг҇ве́нъ є҆сѝ, бж҃е ѻ҆тє́цъ на́шихъ, и҆ блг҇ве́но и҆́мѧ твоѐ ст҃о́е и҆ сла́вное во вѣ́ки, да блг҇вѧ́тъ тѧ̀ нб҃са̀ и҆ всѧ҄ созда҄нїѧ твоѧ҄:
6 ты̀ сотвори́лъ є҆сѝ а҆да́ма и҆ да́лъ є҆сѝ є҆мѹ̀ помо́щницѹ є҆́ѵѹ ѹ҆твержде́нїе женѹ̀ є҆гѡ̀: ѿ тѣ́хъ роди́сѧ человѣ́ческое сѣ́мѧ: ты̀ ре́клъ є҆сѝ: не добро̀ бы́ти человѣ́кѹ є҆ди́номѹ, сотвори́мъ є҆мѹ̀ помо́щницѹ подо́бнѹю є҆мѹ̀:
7 и҆ нн҃ѣ, гд҇и, не блѹдодѣѧ́нїѧ ра́ди а҆́зъ пое́млю сестрѹ̀ мою̀ сїю̀, но по и҆́стинѣ: повелѝ поми́лованѹ мѝ бы́ти и҆ съ не́ю состарѣ́тисѧ.
8 И҆ речѐ съ ни́мъ: а҆ми́нь.
9 И҆ спа́ста ѻ҆́ба но́щїю, И҆ воста́въ рагѹи́лъ по́йде и҆ и҆скопа̀ гро́бъ, глаго́лѧ:
10 є҆да̀ и҆ то́й ѹ҆́мре;
11 И҆ прїи́де рагѹи́лъ въ до́мъ сво́й
12 и҆ речѐ є҆́днѣ женѣ̀ свое́й: послѝ є҆ди́нѹ ѿ рабы́нь, и҆ да ви́дитъ, а҆́ще жи́въ є҆́сть: а҆́ще же ни, да погребе́мъ є҆го̀, и҆ да никто́же ѹ҆вѣ́сть.
13 И҆ вни́де рабы́нѧ ѿве́рзши две́рь, и҆ ѡ҆брѣ́те ѻ҆бои́хъ спѧ́щихъ,
14 и҆ и҆зше́дши возвѣстѝ и҆̀мъ, ѩ҆́кѡ жи́въ є҆́сть.
15 И҆ благословѝ рагѹи́лъ бг҃а, глаго́лѧ: блг҇ве́нъ є҆сѝ ты̀, бж҃е, во всѧ́цѣмъ бл҃гослове́нїи чи́стѣмъ и҆ ст҃ѣ́мъ: и҆ да блг҇вѧ́тъ тѧ̀ ст҃і́и твоѝ и҆ всѧ҄ созда҄нїѧ твоѧ҄, и҆ всѝ а҆́гг҃ли твоѝ и҆ и҆збра́нни твоѝ: да блг҇вѧ́тъ тѧ̀ во вѣ́ки:
16 блг҇ве́нъ є҆сѝ, ѩ҆́кѡ возвесели́лъ мѧ̀ є҆сѝ, и҆ не бы́сть мѝ, ѩ҆́коже непщева́хъ, но по мио́зѣй мл҇ти твое́й сотвори́лъ є҆сѝ съ на́ми:
17 блг҇ве́нъ є҆сѝ, ѩ҆́кѡ поми́ловалъ є҆сѝ двои́хъ є҆диноро́дныхъ: сотворѝ и҆́ма, влдко, мл҇ть, совершѝ живо́тъ и҆́хъ во здра́вїи съ весе́лїемъ и҆ мл҇тїю.
18 Повелѣ́ же рабѡ́мъ засы́пати гро́бъ,
19 и҆ сотворѝ и҆̀мъ бра́къ дні́й четырена́десѧть,
20 И҆ речѐ є҆мѹ̀ рагѹи́лъ, пре́жде да́же соверши́тисѧ днє́мъ бра́ка, съ клѧ́твою, да не и҆зы́детъ, а҆́ще не и҆спо́лнѧтсѧ четырена́десѧть дні́е бра́ка:
21 и҆ тогда̀ взе́мъ по́лъ и҆мѣ́нїй свои́хъ да по́йдетъ со здра́вїемъ ко ѻ҆тцѹ̀: прѡ́чаѧ же, є҆гда̀ ѹ҆мрѹ̀ и҆ жена̀ моѧ̀.
Нашли в тексте ошибку? Выделите её и нажмите:
Ctrl + Enter
Книга Товита, 8 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784