1 И҆ ѡ҆печа́ливсѧ пла́кахъ, и҆ моли́хсѧ съ болѣ́знїю, глаго́лѧ:
2 првднъ є҆сѝ, гд҇и, и҆ всѧ҄ дѣла̀ твоѧ҄, и҆ всѝ пѹтїѐ твоѝ мл҇ть и҆ и҆́стниа, и҆ сѹ́дъ и҆́стиненъ и҆ првднъ ты̀ сѹ́диши во вѣ́къ:
3 помѧнѝ мѧ̀ и҆ при́зри на мѧ̀ да не ѿмща́еши мѝ грѣхѝ моѧ҄ и҆ невѣ҄дѣнїѧ моѧ҄ и҆ ѻ҆тє́цъ мои́хъ, и҆́миже согрѣши́ша пред̾ тобо́ю:
4 преслѹ́шаша бо за́пѡвѣди твоѧ҄ и҆ да́лъ є҆сѝ на́съ въ расхище́нїе и҆ плѣне́нїе и҆ сме́рть и҆ въ при́тчѹ поноше́нїѧ всѣ҄мъ ѩ҆зы́кѡмъ, въ нѧ́же расточи́хомсѧ:
5 и҆ нн҃ѣ мнѡ́ги сѹдбы҄ твоѧ҄ сѹ́ть и҆ и҆́стинны, твори́те со мно́ю ѡ҆ грѣсѣ́хъ мои́хъ и҆ ѻ҆тє́цъ мои́хъ, ѩ҆́кѡ не сотвори́хомъ повелѣ́нїй твои́хъ, не бо̀ ходи́хомъ во и҆́стинѣ пред̾ тобо́ю:
6 и҆ нн҃ѣ, ѩ҆́коже ѹ҆го́дно пред̾ тобо́ю, сотворѝ со мно́ю: повелѝ ѿѧ́ти дѹ́хъ мо́й, ѩ҆́кѡ да разрѣшѹ́сѧ и҆ бѹ́дѹ землѧ̀, поне́же ѹ҆́не є҆́сть мѝ ѹ҆мре́ти, не́жели жи́вѹ бы́тн, занѐ поноше́нїѧ лжи҄ва слы́шахъ, и҆ печа́ль є҆́сть мно́га во мнѣ̀: повелѝ ѿрѣши́тисѧ мѝ ѿ нѹ́жды ѹ҆жѐ на вѣ́чное мѣ́сто, да не ѿврати́ши лица̀ твоегѡ̀ ѿ менє̀.
7 Въ то́йже де́нь слѹчи́сѧ дще́ри рагѹи́левѣй са́ррѣ бо є҆квата́нѣхъ миді́и, и҆ то́й поноси́мѣй бы́ти ѿ рабы́нь ѻ҆тца̀ є҆ѧ̀:
8 а҆́кѡ бѧ́ше дана̀ седмѝ мѹжє́мъ, и҆ а҆смоде́й лѹка́вый де́мѡнъ ѹ҆бѝ и҆̀хъ, пре́жде да́же бы́ти и҆̀мъ съ не́ю ѩ҆́кѡ съ жена́ми: и҆ рѣ́ша є҆́й: не разѹмѣ́еши ли ѹ҆бива́ющи твои́хъ мѹже́й; ѹ҆жѐ се́дмь и҆мѣ́ла є҆сѝ, и҆ ни є҆ди́нагѡ и҆́хъ нарекла́сѧ є҆сѝ:
9 что̀ на́съ бїе́ши; а҆́ще и҆змро́ша, и҆дѝ съ ни́ми, да не ви́димъ твоегѡ̀ сы́на и҆лѝ дще́ре во вѣ́къ.
10 Сїѧ҄ слы́шавши ѡ҆печа́лисѧ ѕѣлѡ̀, ѩ҆́кѡ ѹ҆дави́тисѧ, и҆ речѐ: є҆ди́на ѹ҆́бѡ є҆́смь ѻ҆тцѹ̀ моемѹ̀: а҆́ще сотворю̀ сїѐ, ѹ҆кори́зна є҆мѹ̀ бѹ́детъ, и҆ ста́рость є҆гѡ̀ ннзведѹ̀ съ болѣ́знїю во а҆́дъ.
11 И҆ молѧ́шесѧ при ѻ҆ко́нцы и҆ речѐ: блг҇ве́нъ є҆сѝ, гд҇и бж҃е мо́й, и҆ блг҇ве́но и҆́мѧ твоѐ ст҃о́е и҆ чт҇но́е во вѣ́ки: да блг҇вѧ́тъ тѧ̀ всѧ҄ дѣла̀ твоѧ҄ во вѣ́къ:
12 и҆ нн҃ѣ, гд҇и, ѻ҆́чи моѝ и҆ лицѐ моѐ ко тебѣ̀ да́хъ:
13 рѣ́хъ да разрѣши́ши мѧ̀ ѿ землѝ и҆ да не слы́шѹ а҆́зъ ктомѹ̀ поноше́нїѧ:
14 ты̀ вѣ́сн, гд҇и, ѩ҆́кѡ чиста̀ є҆́смь ѿ всѧ́кагѡ грѣха̀ мѹ́жнѧ
15 и҆ не ѡ҆скверни́хъ и҆́мене моегѡ̀ ннжѐ и҆́мене ѻ҆тца̀ моегѡ̀ въ землѝ плѣне́нїѧ моегѡ̀: є҆диноро́дна є҆́смь ѻ҆тцѹ̀ моемѹ̀, и҆ нѣ́сть є҆мѹ̀ ѻ҆́трочища, и҆́же наслѣ́дитъ є҆го̀, нижѐ бра́та бли́жнѧгѡ, нижѐ сѹ́щагѡ є҆мѹ̀ сы́на да соблюдѹ́ мѧ томѹ̀ въ женѹ̀: ѹ҆жѐ погибо́ша мѝ се́дмь: вскѹ́ю мѝ жи́ти; и҆ а҆́ще не ѹ҆го́дно є҆́сть тебѣ̀ ѹ҆би́ти мѧ̀, повелѝ призрѣ́ти на мѧ̀ и҆ поми́ловати мѧ̀, да не ктомѹ̀ слы́шѹ поноше́нїе.
16 И҆ ѹ҆слы́ша гд҇ь моли́твѹ ѻ҆бои́хъ пред̾ сла́вою вели́кагѡ рафаи́ла,
17 и҆ по́сланъ бѣ̀ и҆зцѣли́ти ѻ҆бои́хъ, тѡві́тѹ ѡ҆чи́стити бѣ́льма и҆ са́ррѹ дще́рь рагѹи́левѹ да́ти тѡві́и сы́нѹ тѡві́товѹ въ женѹ̀, и҆ свѧза́ти а҆смоде́а лѹка́ваго де́мѡна, занѐ тѡві́и подоа́етъ наслѣ́дити ю҆̀. Въ то̀ вре́мѧ возврати́всѧ тѡві́тъ, вни́де въ до́мъ сво́й, а҆ са́рра дщѝ рагѹи́лева сни́де ѿ го́рницы своеѧ̀.
Нашли в тексте ошибку? Выделите её и нажмите: Ctrl + Enter

Книга Товита, 3 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.