1 И҆ преста̀ и҆сповѣ́даѧсѧ тѡві́тъ.
2 И҆ бѣ̀ лѣ́тъ ѻ҆сми́десѧти ѻ҆смѝ, є҆гда̀ погѹбѝ зра́ки, и҆ по лѣ́тѣхъ ѻ҆смѝ прозрѣ̀: и҆ творѧ́ше ми́лѡстыни, и҆ приложѝ боѧ́тисѧ гд҇а бг҃а и҆ и҆сповѣ́датисѧ є҆мѹ̀:
3 ѕѣлѡ́ же состарѣ́сѧ, и҆ прнзва̀ сы́на своего̀ и҆ ше́сть сынѡ́въ є҆гѡ̀ и҆ речѐ є҆мѹ̀: ча́до, возмѝ сы́ны твоѧ҄, сѐ, состарѣ́хсѧ и҆ при и҆схожде́нїи ѿ житїѧ̀ є҆́смь:
4 пойдѝ въ миді́ю, ча́до, ѹ҆вѣ́рихсѧ бо, є҆ли҄ка глаго́ла ї҆ѡ́на про҇ро́къ ѡ҆ нїнеѵі́и, ѩ҆́кѡ разори́тсѧ, въ миді́и же бѹ́детъ ми́ръ па́че да́же до вре́мене, и҆ ѩ҆́кѡ бра́тїѧ на҄ша на землѝ расточа́тсѧ ѿ благі́ѧ землѝ, и҆ ї҆ер҇ли́мъ бѹ́детъ пѹ́стъ, и҆ до́мъ бж҃їй въ не́мъ сожже́нъ бѹ́детъ и҆ пѹ́стъ бѹ́детъ до вре́мене:
5 и҆ па́ки поми́лѹетъ и҆̀хъ бг҃ъ и҆ возврати́тъ и҆̀хъ въ зе́млю, и҆ сози́ждѹтъ до́мъ, не ѩ҆ко́въ пе́рвый, до́ндеже и҆спо́лнѧтсѧ времена̀ вѣ́ка: и҆ по си́хъ возвратѧ́тсѧ ѿ плѣне́нїй и҆ сози́ждѹтъ ї҆ер҇ли́мъ че́стнѡ, и҆ до́мъ бж҃їй въ не́мъ сози́ждетсѧ во всѧ҄ ро́ды вѣ́ка зда́нїемъ сла́внымъ, ѩ҆́коже глаго́лаша ѡ҆ не́мъ про҇ро́цы:
6 и҆ всѝ ѩ҆зы́цы ѡ҆братѧ́тсѧ и҆́стиннѡ боѧ́тисѧ гд҇а бг҃а и҆ ѡ҆прове́ргнѹтъ їдѡлы своѧ҄,
7 и҆ возблг҇вѧ́тъ всѝ ѩ҆зы́цы гд҇а, и҆ лю́дїе є҆гѡ̀ и҆сповѣ́дѧтсѧ бг҃ѹ, и҆ вознесе́тъ гд҇ь лю́ди своѧ҄, и҆ возра́дѹютсѧ всѝ лю́бѧщїи гд҇а бг҃а во и҆́стинѣ и҆ пра́вдѣ, творѧ́ще ми́лость бра́тїи на́шей:
8 и҆ нн҃ѣ, ча́до, ѿидѝ ѿ нїнеѵі́и, ѩ҆́кѡ всѧ́чески бѹ́дѹтъ, ѩ҆̀же глаго́ла про҇ро́къ ї҆ѡ́на:
9 ты́ же сохранѝ зако́нъ и҆ повелѣ҄нїѧ и҆ бѹ́ди любоми́лостивъ и҆ пра́веденъ, да тебѣ̀ бла́го бѹ́детъ:
10 и҆ погребѝ мѧ̀ до́брѣ, и҆ ма́терь твою̀ со мно́ю, и҆ да не ктомѹ̀ пребѹ́дете въ нїнеѵі́и: ча́до, ви́ждь, что̀ сотворѝ а҆ма́нъ а҆хїа́харѹ корми́вшемѹ є҆го̀, ѩ҆́кѡ ѿ свѣ́та ѿведѐ є҆го̀ во тмѹ̀, и҆ є҆ли҄ка воздадѐ є҆мѹ̀: и҆ а҆хїа́харъ ѹ҆́бѡ спасе́сѧ, томѹ́ же воздаѧ́нїе воздаде́сѧ, и҆ то́й сни́де во тмѹ̀: манассі́а сотворѝ милосе́рдїе и҆ спасе́сѧ ѿ сѣ́ти сме́ртныѧ, ю҆́же потчѐ є҆мѹ̀: а҆ма́нъ же падѐ въ сѣ́ть и҆ поги́бе:
11 и҆ ни҃ѣ, ча҄да, вѣ́ждьте, что̀ ми́лостынѧ твори́тъ и҆ пра́вда и҆збавлѧ́етъ. И҆ сїѧ҄ глаго́лѧ, и҆спѹстѝ дѹ́шѹ свою̀ на ѻ҆дрѣ̀: бѣ́ же лѣ́тъ ста̀ пѧти́десѧти ѻ҆смѝ. И҆ погребѐ є҆го̀ сла́внѡ.
12 И҆ є҆гда̀ ѹ҆́мре а҆́нна, погребѐ ю҆̀ со ѻ҆тце́мъ свои́мъ. Ѿи́де же тѡві́а съ жено́ю свое́ю и҆ съ сынмѝ свои́ми во є҆квата́ны ко рагѹи́лѹ те́стю своемѹ̀,
13 и҆ состарѣ́сѧ че́стнѡ, и҆ погребѐ те́стєвъ свои́хъ сла́внѡ, и҆ наслѣ́ди и҆мѣ́нїе и҆́хъ и҆ тѡві́та ѻ҆тца̀ своегѡ̀:
14 и҆ ѹ҆́мре (сы́й) лѣ́тъ ста̀ два́десѧти седмѝ во є҆квата́нѣхъ миді́йскихъ:
15 и҆ слы́ша, пре́жде не́же ѹ҆мре́ти є҆мѹ̀, погѹбле́нїе нїнеѵі́и, ю҆́же плѣнѝ навѹходоно́соръ и҆ а҆сѹи́ръ: и҆ возра́довасѧ, пре́жде не́же ѹ҆́мре, ѡ҆ нїнеѵі́и.
Нашли в тексте ошибку? Выделите её и нажмите: Ctrl + Enter

Книга Товита, 14 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.