Товит 5 Товит 5 глава

¹ И҆ ѿвѣша́въ тѡві́а, речѐ є҆мѹ̀: ѻ҆́тче, сотворю̀ всѧ҄, є҆ли҄ка заповѣ́далъ є҆сѝ мѝ:

² но ка́кѡ возмогѹ̀ взѧ́ти сребро̀, а҆ не зна́ю є҆гѡ̀;

³ И҆ дадѐ є҆мѹ̀ рѹкописа́нїе и҆ речѐ є҆мѹ̀: и҆щѝ себѣ̀ человѣ́ка, и҆́же по́йдетъ съ тобо́ю, и҆ да́мъ є҆мѹ̀ мздѹ̀, до́ндеже жи́въ є҆́смь, и҆ ше́дъ возмѝ сребро̀.

⁴ И҆ и҆́де и҆ска́ти человѣ́ка, и҆ ѡ҆брѣ́те рафаи́ла, и҆́же бѣ̀ а҆́гг҃лъ, и҆ не вѣ́дѧше:

⁵ и҆ речѐ є҆мѹ̀: могѹ́ ли пойтѝ съ тобо́ю въ ра҄ги мидї҄искїѧ, и҆ и҆звѣ́стенъ ли є҆сѝ ѡ҆ мѣ́стѣхъ;

⁶ И҆ речѐ є҆мѹ̀ а҆́гг҃лъ: пойдѹ̀ съ тобо́ю, и҆ пѹ́ть вѣ́мъ, и҆ ѹ҆ гаваи́ла бра́та на́шегѡ живѧ́хъ.

⁷ И҆ речѐ є҆мѹ̀ тѡві́а: пождѝ мѧ̀, и҆ рекѹ̀ ѻ҆тцѹ̀ моемѹ̀.

⁸ И҆ речѐ є҆мѹ̀: и҆дѝ и҆ не коснѝ.

⁹ И҆ вше́дъ речѐ ѻ҆тцѹ̀: сѐ, ѡ҆брѣто́хъ, и҆́же по́йдетъ со мно́ю се́й же речѐ: пригласѝ є҆го̀ ко мнѣ̀, да ѹ҆вѣ̀мъ, ко́егѡ пле́мене є҆́сть, и҆ а҆́ще вѣ́ренъ є҆́сть, є҆́же и҆тѝ съ тобо́ю.

¹⁰ И҆ призва̀ є҆го̀: и҆ вни́де, и҆ привѣ́тствоваста дрѹ́гъ дрѹ́га.

¹¹ И҆ речѐ є҆мѹ̀ тѡві́тъ: бра́те, ѿ ко́егѡ пле́мене и҆ ѿ ко́егѡ ѻ҆те́чества є҆сѝ ты̀; скажи́ ми.

¹² И҆ речѐ є҆мѹ̀: пле́мене и҆ ѻ҆те́чества ты̀ и҆́щеши; и҆лѝ нае́мника, и҆́же спѹтьше́ствѹетъ съ сы́номъ твои́мъ; И҆ речѐ є҆мѹ̀ тѡві́тъ: хощѹ̀ бра́те, вѣ́дати ро́дъ тво́й и҆ и҆́мѧ.

¹³ Ѻ҆́нъ же речѐ: а҆́зъ а҆зарі́а а҆нані́и вели́кагѡ ѿ бра́тїи твоеѧ̀.

¹⁴ И҆ речѐ є҆мѹ̀: бла́гѡ прише́лъ є҆сѝ, бра́те, и҆ на мѧ̀ да не гнѣ́ваешисѧ, ѩ҆́кѡ взыска́хъ пле́мѧ твоѐ и҆ ѻ҆те́чество твоѐ ѹ҆вѣ́дати, и҆ ты̀ є҆сѝ бра́тъ мо́й ѿ добра̀ и҆ бла́га ро́да: зна́хъ бо а҆́зъ а҆нані́ю и҆ ї҆ѡнаѳа́на сынѡ́въ семе́а вели́кагѡ, ѩ҆́кѡ ходи́хомъ кѹ́пнѡ во ї҆ер҇ли́мъ кла́нѧтисѧ, прносѧ́ще перворѡ́днаѧ и҆ десѧти҄ны плодѡ́въ, и҆ не заблѹди́ша въ заблѹжде́нїи бра́тїи на́шеѧ: ѿ ко́рене вели́кагѡ є҆сѝ, бра́те:

¹⁵ но рцы̀ мнѣ̀, кѹ́ю тебѣ̀ и҆́мамъ мздѹ̀ да́ти; дра́хмѹ на де́нь и҆ нѹ҄жднаѧ тебѣ̀ ѩ҆́коже и҆ сы́нови моемѹ̀:

¹⁶ и҆ є҆щѐ приложѹ̀ тебѣ̀ над̾ мздѹ̀, а҆́ще здра́ви возвратите́сѧ.

¹⁷ И҆ благоизво́листа та́кѡ. И҆ речѐ къ тѡві́и: гото́въ вѹ́ди къ пѹтѝ, и҆ да благоспѣши́тсѧ ва́ма. И҆ ѹ҆гото́ва сы́нъ є҆гѡ̀, ѩ҆̀же къ пѹтѝ. И҆ речѐ є҆мѹ̀ ѻ҆те́цъ є҆гѡ̀: и҆дѝ съ человѣ́комъ си́мъ: ѡ҆бита́ѧй же на нб҃сѝ бг҃ъ бл҃гоѹстро́итъ пѹ́ть ва́шъ, и҆ а҆́гг҃лъ є҆гѡ̀ да спѹтьше́ствѹетъ ва́ма. И҆ и҆зыдо́ста ѻ҆́ба ѿитѝ, и҆ пе́съ ѻ҆́трочища съ ни́ма.

¹⁸ Пла́касѧ же а҆́нна ма́ти є҆гѡ̀ и҆ речѐ къ тѡві́тѹ: почто̀ ѿпѹсти́лъ є҆сѝ ча́до на́ше; и҆лѝ не же́злъ рѹкѝ на́шеѧ є҆́сть, внегда̀ входи́те є҆мѹ̀ и҆ и҆сходи́ти пред̾ на́ма;

¹⁹ сребро̀ сребро́мъ да не возврати́тсѧ, но ѹ҆ме́ты сы́на на́шегѡ да бѹ́детъ:

²⁰ ѩ҆́кѡ бо даде́сѧ на́ма жи́ти ѿ гд҇а, сїѐ дово́лно є҆́сть на́ма.

²¹ И҆ речѐ є҆́й тѡві́тъ: не печа́лисѧ, сестро̀, здра́въ прїи́детъ, и҆ ѻ҆́чи твоѝ ѹ҆́зрѧтъ є҆го̀:

²² а҆́гг҃лъ бо бла́гъ спѹтьше́ствовати бѹ́детъ є҆мѹ̀ и҆ благоѹспѣ́етсѧ пѹ́ть є҆гѡ̀, и҆ возврати́тсѧ здра́въ.