1 И҆ речѐ рафаи́лъ ко тѡві́и: не вѣ́си ли, бра́те, ка́кѡ ѡ҆ста́вилъ є҆сѝ ѻ҆тца̀ твоего̀;
2 предтеце́мъ пред̾ жено́ю твое́ю и҆ ѹ҆гото́ваимъ до́мъ:
3 возми́ же въ рѹ́кѹ же́лчь ры́бїю. И҆ поидо́ста, и҆ кѹ́пнѡ и҆́де пе́съ в̾слѣ́дъ и҆́хъ.
4 А҆́нна же сѣдѧ́ше ѡ҆бзира́ющи на пѹтѝ сы́на своего̀.
5 И҆ ѹ҆смотрѝ є҆го̀ грѧдѹ́ща и҆ речѐ ѻ҆тцѹ̀ є҆гѡ̀: сѐ, сы́нъ мо́й грѧде́тъ и҆ человѣ́къ поше́дый съ ни́мъ.
6 А҆ рафаи́лъ речѐ: вѣ́мъ а҆́зъ, тѡві́е, ѩ҆́кѡ ѿве́рзетъ ѻ҆́чи ѻ҆те́цъ тво́й:
7 ты̀ ѹ҆́бѡ пома́жи же́лчїю на ѻ҆чесе́хъ є҆гѡ̀, и҆ ѹ҆грызе́нъ ѡ҆тре́тъ, и҆ ѿве́рзетъ бѣ́льма, и҆ ѹ҆́зритъ тѧ̀.
8 И҆ прите́кши а҆́нна нападѐ на вы́ю сы́на своегѡ̀ и҆ речѐ є҆мѹ̀: ви́дѣхъ тѧ̀, ча́до,ѿни҃ѣ да ѹ҆мрѹ̀. И҆ пла́кастасѧ ѻ҆́ба.
9 Тѡві́тъ же и҆схожда́ше ко две́ремъ и҆ преткнѹ́сѧ. Сы́нъ же є҆гѡ̀ притечѐ къ немѹ̀
10 и҆ под̾ѧ̀ ѻ҆тца̀ своего̀ и҆ посы́па же́лчь на ѻ҆чеса̀ ѻ҆тца̀ своегѡ̀, глаго́лѧ: дерза́й, ѻ҆́тче.
11 Е҆гда́ же ѡ҆грызє́на бы́ша, ѡ҆трѐ ѻ҆́чи своѝ,
12 и҆ ѿрто́шасѧ ѿ ѹ҆́глѡвъ ѻ҆че́съ є҆гѡ̀ бѣ́льма, и҆ ви́дѣвъ сы́на своего̀, нападѐ на вы́ю є҆гѡ̀
13 и҆ пла́касѧ и҆ речѐ: блг҇ве́нъ є҆сѝ, бж҃е, и҆ блг҇ве́но и҆́мѧ твоѐ во вѣ́ки, и҆ блг҇ве́ни всѝ ст҃і́и твоѝ а҆́гг҃ли,
14 ѩ҆́кѡ наказа́лъ є҆сѝ и҆ поми́ловалъ є҆сѝ мѧ̀: сѐ, ви́ждѹ тѡві́ю сы́на моего̀. И҆ вни́де сы́нъ є҆гѡ̀ ра́дѹѧсѧ, и҆ возвѣстѝ ѻ҆тцѹ̀ своемѹ̀ вели҄чїѧ бы҄вшаѧ є҆мѹ̀ въ миді́и.
15 И҆ и҆зы́де тѡві́тъ во срѣ́тенїе невѣ́стки своеѧ̀ ра́дѹѧсѧ и҆ благословѧ̀ бг҃а, ко вратѡ́мъ нїнеѵі́и. И҆ чѹдѧ́хѹсѧ ви́дѧщїи є҆го̀ грѧдѹ́ща, ѩ҆́кѡ прозрѣ̀.
16 И҆ тѡві́тъ и҆сповѣ́дашесѧ пред̾ ни́ми, ѩ҆́кѡ поми́лова є҆го̀ бг҃ъ. И҆ є҆гда̀ прнбли́жисѧ тѡві́тъ къ са́ррѣ невѣ́стцѣ свое́й, благословѝ ю҆̀, глаго́лѧ: прїидѝ здра́ва, дщѝ: блг҇ве́нъ бг҃ъ, и҆́же приведѐ тѧ̀ къ на́мъ, и҆ ѻ҆те́цъ тво́й и҆ ма́ти твоѧ̀. И҆ бы́сть ра́дость всѣ҄мъ сѹ́щымъ въ нїнеѵі́и бра́тїѧмъ є҆гѡ̀.
17 И҆ прїи́де а҆хїа́харъ, и҆ насва́съ сы́нъ бра́та є҆гѡ̀,
18 и҆ бы́сть бра́къ тѡві́и съ весе́лїемъ дні́й се́дмь.
Нашли в тексте ошибку? Выделите её и нажмите:
Ctrl + Enter
Книга Товита, 11 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784