1 Е҆́сть лѹка́вствїе, є҆́же ви́дѣхъ под̾ со́лнцемъ, и҆ мно́го є҆́сть над̾ человѣ́комъ:
2 мѹ́жъ, є҆мѹ́же да́стъ бг҃ъ бога́тство и҆ и҆мѣ́нїе и҆ сла́вѹ, и҆ нѣ́сть лиша́ѧй дѹшѝ свое́й ѿ всѣ́хъ, и҆́хже вожделѣ́етъ, и҆ не да́стъ є҆мѹ̀ бг҃ъ вла́сти ѿ негѡ̀ ѩ҆́сти, ѩ҆́кѡ чѹ́ждь мѹ́жъ ѩ҆́сти и҆́мать ѿ негѡ̀. И҆ сїѐ сѹета̀ и҆ недѹ́гъ ѕо́лъ є҆́сть.
3 А҆́ще роди́тъ мѹ́жъ сто̀ (ча҄дъ) и҆ лѣ҄та мнѡ́га поживе́тъ, и҆ мно́зи бѹ́дѹтъ дні́е лѣ́тъ є҆гѡ̀, и҆ дѹша̀ є҆гѡ̀ не насы́титсѧ ѿ благосты́ни, и҆ погребе́нїѧ не бы́сть є҆мѹ̀, рѣ́хъ: бла́гъ па́че є҆гѡ̀ и҆́звергъ,
4 ѩ҆́кѡ въ сѹетѣ̀ прїи́де и҆ во тмѹ̀ и҆́детъ, и҆ во тмѣ̀ и҆́мѧ є҆гѡ̀ покры́етсѧ:
5 и҆ со́лнца не ви́дѣ, нижѐ разѹмѣ̀, поко́й семѹ̀ па́че тогѡ̀:
6 и҆ поживѐ ты́сѧщѹ лѣ́тъ сѹгѹ́бѡ, и҆ благосты́ни не ви́дѣ: є҆да̀ не во є҆ди́но мѣ́сто всѧ҄ и҆́дѹтъ;
7 Ве́сь трѹ́дъ человѣ́чь во ѹ҆ста̀ є҆гѡ̀, и҆ дѹша̀ є҆гѡ̀ не и҆спо́лнитсѧ.
8 ѩ҆́кѡ ко́е и҆з̾ѻби́лїе (человѣ́кѹ) мѹ́дромѹ па́че безѹ́мнагѡ; поне́же ни́щь позна̀ ходи́ти проти́вѹ живота̀.
9 Бла́го видѣ́нїе ѻ҆́чїю па́че ходѧ́щагѡ дѹше́ю. И҆ сѐ сѹ́етствїе и҆ произволе́нїе дѹ́ха.
10 А҆́ще что̀ бы́сть, ѹ҆жѐ и҆менова́сѧ и҆́мѧ є҆гѡ̀, и҆ позна́сѧ, є҆́же є҆́сть человѣ́къ и҆ не возмо́жетъ сѹди́тисѧ съ крѣпча́йшимъ па́че себє̀:
11 ѩ҆́кѡ сѹ́ть словеса̀ мнѡ́га ѹ҆множа҄ющаѧ сѹетѹ̀.
Нашли в тексте ошибку? Выделите её и нажмите:
Ctrl + Enter
Книга Екклезиаста, или Проповедника, 6 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784