1 Е҆фре́мъ же ѕо́лъ дѹ́хъ, гонѧ́ше зно́й ве́сь де́нь: тщє́тнаѧ и҆ сѹ́єтнаѧ ѹ҆мно́жи, и҆ завѣ́тъ со а҆ссѷрї҄аны завѣща̀, и҆ є҆ле́й во є҆гѵ́петъ посыла́ше.
2 И҆ сѹ́дъ гд҇еви ко ї҆ѹ́дѣ, є҆́же ѿмсти́ти ї҆а́кѡва: по пѹтє́мъ є҆гѡ̀ и҆ по начина́нїємъ є҆гѡ̀ возда́стъ є҆мѹ̀.
3 Во ѹ҆тро́бѣ запѧ̀ бра́та своего̀ и҆ трѹды҄ свои́ми ѹ҆крѣпѣ̀ къ бг҃ѹ:
4 и҆ ѹ҆крѣпѣ̀ со а҆́гг҃ломъ и҆ превозмо́же. Пла́кашасѧ и҆ моли́шасѧ мѝ: въ домѹ̀ ѡ҆́новѣ ѡ҆брѣто́ша мѧ̀, и҆ тѹ̀ глаго́ласѧ къ ни҄мъ.
5 Гд҇ь же бг҃ъ вседержи́тель бѹ́детъ па́мѧть є҆гѡ̀.
6 И҆ ты̀ ѡ҆ бз҃ѣ свое́мъ ѡ҆брати́шисѧ, ми́лость и҆ сѹ́дъ снабдѝ, и҆ приближа́йсѧ къ бг҃ѹ своемѹ̀ пр҇нѡ.
7 Ханаа́нъ, въ рѹцѣ̀ є҆гѡ̀ мѣ́рило непра́вды, наси́льствовати возлюбѝ.
8 И҆ речѐ є҆фре́мъ: ѻ҆ба́че ѡ҆богатѣ́хъ, ѡ҆брѣто́хъ прохлажде́нїе себѣ̀: всѝ трѹды̀ є҆гѡ̀ не ѡ҆брѧ́щѹтсѧ є҆мѹ̀ ра́ди непра́вдъ, и҆́миже согрѣшѝ.
9 А҆́зъ же гд҇ь бг҃ъ тво́й, и҆зведо́хъ тѧ̀ и҆з̾ землѝ є҆гѵ́петски: є҆щѐ вселю̀ тѧ̀ въ кѹ́щахъ, ѩ҆́коже во дни҄ пра́здника.
10 И҆ гл҃ахъ ко про҇ро́кѡмъ, и҆ а҆́зъ видѣ҄нїѧ ѹ҆мно́жихъ, и҆ въ рѹка́хъ про҇ро́ческихъ ѹ҆подо́бихсѧ.
11 А҆́ще не галаа́дъ є҆́сть, ѹ҆̀бо ло́жни бы́ша во галга́лѣхъ кнѧ҄зи трє́бы кладѹ́ще, и҆ трє́бища и҆́хъ ѩ҆́коже же́лви на цѣли́знѣ польстѣ́й.
12 И҆ ѿи́де ї҆а́кѡвъ на по́ле сѷрі́йско, и҆ рабо́та ї҆и҃ль ѡ҆ женѣ̀ и҆ ѡ҆ женѣ̀ снабдѣ̀.
13 И҆ про҇ро́комъ и҆зведѐ гд҇ь ї҆и҃лѧ и҆з̾ землѝ є҆гѵ́петскїѧ, и҆ про҇ро́комъ снабдѣ́сѧ.
14 Разгнѣ́ва мѧ̀ є҆фре́мъ и҆ воз̾ѧри́ мѧ: и҆ кро́вь є҆гѡ̀ на не́мъ пролїе́тсѧ, и҆ ѹ҆кори́знѹ є҆гѡ̀ возда́стъ є҆мѹ̀ гд҇ь.
Нашли в тексте ошибку? Выделите её и нажмите:
Ctrl + Enter
Книга пророка Осии, 12 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784