1 По словесѝ є҆фре́мовѹ ѡ҆правда҄нїѧ прїѧ̀ се́й во ї҆и҃ли, и҆ положѝ ѧ҆̀ ваа́лови, и҆ ѹ҆́мре.
2 И҆ нн҃ѣ приложи́ша согрѣша́ти и҆ сотвори́ша себѣ̀ слїѧ́нїе ѿ зла́та и҆ сребра̀ своегѡ̀ по ѡ҆́бразѹ їдѡлѡвъ, дѣла̀ хѹдо́жникѡвъ совершє́на: и҆̀мъ сі́и глаго́лютъ: пожри́те человѣ́кѡвъ, ѡ҆скѹдѣ́ша бо телцы̀.
3 Сегѡ̀ ра́ди бѹ́дѹтъ ѩ҆́кѡ ѡ҆́блакъ ѹ҆́треннїй, ѩ҆́коже роса̀ ѹ҆́треннѧѧ и҆дѹ́щи, ѩ҆́коже пле́вы съ то́ка (и҆ пра́хъ съ вѣ́твїѧ) развѣва́емый ви́хромъ, ѩ҆́коже ды́мъ и҆з̾ трѹбы̀.
4 А҆́зъ же гд҇ь бг҃ъ тво́й ѹ҆твержда́ѧй не́бо и҆ созида́ѧй зе́млю, є҆гѡ́же рѹ́цѣ созда́стѣ всѐ во́инство небе́сное, и҆ не показа́хъ тѝ и҆̀хъ, є҆́же ходи́ти в̾слѣ́дъ и҆́хъ: и҆ а҆́зъ и҆зведо́хъ тѧ̀ и҆з̾ землѝ є҆гѵ́петскїѧ, и҆ бг҃а ра́звѣ менє̀ да не позна́еши, и҆ сп҃са́ющагѡ нѣ́сть ра́звѣ менє̀.
5 А҆́зъ пасо́хъ тѧ̀ въ пѹсты́ни на землѝ ненаселе́ннѣй,
6 на па́житехъ и҆́хъ, и҆ насы́тишасѧ до и҆сполне́нїѧ, и҆ вознесо́шасѧ сердца̀ и҆́хъ, сегѡ̀ ра́ди забы́ша мѧ̀.
7 И҆ бѹ́дѹ и҆̀мъ ѩ҆́кѡ панѳи́рь, и҆ ѩ҆́кѡ ры́сь на пѹтѝ а҆ссѷрі́євъ:
8 и҆ срѧ́щѹ и҆̀хъ а҆́ки медвѣ́дица лиша́ема, и҆ разрѹшѹ̀ соключе́нїе серде́цъ и҆́хъ: и҆ поѧдѧ́тъ ѧ҆̀ скѵ́мни дѹбра́внїи, и҆ ѕвѣ́рїе польсті́и расто́ргнѹтъ ѧ҆̀.
9 Въ поги́бели твое́й, ї҆и҃лю, кто̀ помо́жетъ тебѣ̀;
10 Гдѣ̀ ца́рь тво́й се́й; то́й да спасе́тъ тѧ̀ во всѣ́хъ градѣ́хъ твои́хъ: и҆ да сѹ́дитъ тѝ, ѡ҆ не́мже глаго́лалъ є҆сѝ: да́ждь мѝ царѧ̀ и҆ кнѧ́зѧ.
11 И҆ да́хъ тебѣ̀ царѧ̀ во гнѣ́вѣ мое́мъ, и҆ ѹ҆твержа́хсѧ въ ѩ҆́рости мое́й.
12 Согромажде́нїе непра́вды є҆фре́мъ, сокрове́нъ грѣ́хъ є҆гѡ̀:
13 бѡлѣ́зни а҆́ки ражда́ющїѧ прїи́дѹтъ є҆мѹ̀: се́й сы́нъ немѹ́дрый, занѐ нн҃ѣ не ѹ҆стои́тъ въ сокрѹше́нїи ча҄дъ.
14 Ѿ рѹкѝ а҆́довы и҆зба́влю ѧ҆̀ и҆ ѿ сме́рти и҆скѹплю̀ ѧ҆̀: гдѣ̀ прѧ̀ твоѧ̀, сме́рте; гдѣ̀ ѻ҆сте́нъ тво́й, а҆́де; ѹ҆тѣше́нїе скры́сѧ ѿ ѻ҆́чїю моє́ю:
15 занѐ се́й междѹ̀ бра́тїѧми разлѹчи́тъ: наведе́тъ гд҇ь вѣ́тръ зно́енъ и҆з̾ пѹсты́ни на́нь, и҆ и҆зсѹши́тъ жи҄лы є҆гѡ̀ и҆ ѡ҆пѹстоши́тъ и҆сто́чники є҆гѡ̀: се́й и҆зсѹши́тъ зе́млю є҆гѡ̀ и҆ всѧ҄ сосѹ́ды є҆гѡ̀ люби҄мыѧ.
Нашли в тексте ошибку? Выделите её и нажмите: Ctrl + Enter

Книга пророка Осии, 13 глава. Елизаветинская Библия.

Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.

Public Domain

Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784



2007–2024. Сделано с любовью для любящих и ищущих Бога. Если у вас есть вопросы или пожелания, то пишите нам: bible-man@mail.ru.