1 Слы́шите сїѧ҄, жерцы̀, и҆ вонми́те, до́ме ї҆и҃левъ, и҆ до́ме царе́въ, внѹши́те, поне́же къ ва́мъ є҆́сть сѹ́дъ: ѩ҆́кѡ прѹгло̀ бы́сте стражбѣ̀, и҆ ѩ҆́коже мре́жа распросте́рта на ї҆тавѷрі́и,
2 ю҆́же ловѧ́щїи ло́въ поткнѹ́ша, а҆́зъ же наказа́тель ва́мъ:
3 а҆́зъ позна́хъ є҆фре́ма, и҆ ї҆и҃ль не ѿстѹпѝ ѿ менє̀, занѐ нн҃ѣ соблѹдѝ є҆фре́мъ, и҆ ѡ҆скверни́сѧ ї҆и҃ль:
4 не положи́ша помышле́нїй свои́хъ, є҆́же возврати́тисѧ къ бг҃ѹ своемѹ̀, ѩ҆́кѡ дѹ́хъ блѹже́нїѧ є҆́сть въ ни́хъ, и҆ гд҇а не ѹ҆вѣ́дѣша.
5 И҆ смири́тсѧ ѹ҆кори́зна ї҆и҃лева въ лицѐ є҆мѹ̀, и҆ ї҆и҃ль и҆ є҆фре́мъ и҆знемо́гѹтъ въ непра́вдахъ свои́хъ, и҆знемо́жетъ же и҆ ї҆ѹ́да съ ни́ми.
6 Со ѻ҆вца́ми и҆ телцы҄ по́йдѹтъ взыска́ти гд҇а и҆ не ѡ҆брѧ́щѹтъ є҆гѡ̀, ѹ҆клони́сѧ бо ѿ ни́хъ.
7 ѩ҆́кѡ гд҇а ѡ҆ста́виша, ѩ҆́кѡ ча҄да чѹ҄жда породи́ша себѣ̀: нн҃ѣ поѧ́стъ ѧ҆̀ ржа̀, и҆ прича҄стїѧ и҆́хъ.
8 Вострѹби́те трѹбо́ю на хо́лмѣхъ, возгласи́те на высо́кихъ, проповѣ́дите въ домѹ̀ ѡ҆́новѣ, ѹ҆жасе́сѧ венїамі́нъ,
9 є҆фре́мъ въ па́гѹбѹ бы́сть во дни҄ наказа́нїѧ: въ племенѣ́хъ ї҆и҃левыхъ показа́хъ вѣ҄рнаѧ.
10 Бы́ша кнѧ҄зи ї҆ѹ҄дины ѩ҆́кѡ прелага́юще предѣ́лы: на нѧ̀ и҆злїю̀ ѩ҆́кѡ во́дѹ гнѣ́въ мо́й.
11 Соѡдолѣ̀ є҆фре́мъ сопе́рника своего̀, попра̀ сѹ́дъ, ѩ҆́кѡ нача̀ ходи́ти в̾слѣ́дъ сѹ́етныхъ.
12 А҆́зъ же ѩ҆́кѡ мѧте́жъ є҆фре́мови и҆ ѩ҆́кѡ ѻ҆сте́нъ до́мѹ ї҆ѹ́динѹ.
13 И҆ ви́дѣ є҆фре́мъ не́мощь свою̀ и҆ ї҆ѹ́да болѣ́знь свою̀: и҆ и҆́де є҆фре́мъ ко а҆ссѷрі́ємъ и҆ посла̀ послы̀ ко царю̀ ї҆арі́мѹ: и҆ то́й не возмо́же и҆зцѣли́ти ва́съ, и҆ не преста́нетъ ѿ ва́съ болѣ́знь.
14 Занѐ а҆́зъ є҆́смь ѩ҆́кѡ панѳи́рь є҆фре́мови и҆ ѩ҆́кѡ ле́въ до́мѹ ї҆ѹ́динѹ: и҆ а҆́зъ восхищѹ̀, и҆ пойдѹ̀, и҆ возмѹ̀, и҆ не бѹ́детъ и҆з̾има́ѧй:
15 пойдѹ̀ и҆ возвращѹ́сѧ на мѣ́сто своѐ, до́ндеже поги́бнѹтъ, и҆ взы́щѹтъ лица̀ моегѡ̀.
Нашли в тексте ошибку? Выделите её и нажмите:
Ctrl + Enter
Книга пророка Осии, 5 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784