1 Си́це показа́ ми гд҇ь бг҃ъ, и҆ сѐ, припло́дъ прѹ́жїй и҆ды́й ѹ҆́треннїй, и҆ сѐ, гѹ́сеница, є҆ди́нъ гѡ́гъ ца́рь.
2 И҆ бѹ́детъ, а҆́ще сконча́етъ ѩ҆ды́й травѹ̀ земнѹ́ю, и҆ рѣ́хъ: гд҇и, гд҇и, мл҇тивъ бѹ́ди, кто̀ возста́витъ ї҆а́кѡва; ѩ҆́кѡ ма́лъ є҆́сть.
3 Раска́йсѧ ѡ҆ се́мъ, гд҇и: и҆ сїѐ не бѹ́детъ, гл҃етъ гд҇ь.
4 Си́це показа́ ми гд҇ь, и҆ сѐ, призва̀ прю̀ во ѻ҆гнѝ гд҇ь бг҃ъ, и҆ поѧдѐ бе́зднѹ мно́гѹ, и҆ поѧдѐ ча́сть.
5 И҆ рѣ́хъ: гд҇и, гд҇и, преста́ни нн҃ѣ, кто̀ возста́витъ ї҆а́кѡва; ѩ҆́кѡ ма́лъ є҆́сть.
6 Раска́йсѧ ѡ҆ се́мъ, гд҇и: и҆ сїѐ не бѹ́детъ, гл҃етъ гд҇ь.
7 Си́це показа́ ми гд҇ь: и҆ сѐ, мѹ́жъ стоѧ́й на ѡ҆гра́дѣ а҆дама́нтовѣ, и҆ въ рѹцѣ̀ є҆гѡ̀ а҆дама́нтъ.
8 И҆ речѐ гд҇ь ко мнѣ̀: что̀ ты̀ ви́диши, а҆мѡ́се; И҆ рѣ́хъ: а҆дама́нтъ. И҆ речѐ гд҇ь ко мнѣ̀: сѐ, а҆́зъ ѹ҆чиню̀ а҆дама́нта средѣ̀ люді́й мои́хъ ї҆и҃лѧ, ктомѹ̀ не приложѹ̀, є҆́же мимоитѝ є҆го̀:
9 и҆ потребѧ́тсѧ трє́бища смѣ́ха, и҆ трє́бы ї҆и҃лєвы ѡ҆пѹстѣ́ютъ, и҆ воста́нѹ на до́мъ ї҆еровоа́мль со ѻ҆рѹ́жїемъ.
10 И҆ посла̀ а҆масі́а жре́цъ веѳи́льскїй ко ї҆еровоа́мѹ царю̀ ї҆и҃левѹ глаго́лѧ: развра́ты твори́тъ на тѧ̀ а҆мѡ́съ средѣ̀ до́мѹ ї҆и҃лева, не возмо́жетъ землѧ̀ под̾ѧ́ти всѣ́хъ слове́съ є҆гѡ̀,
11 поне́же сїѧ҄ глаго́летъ а҆мѡ́съ: ѻ҆рѹ́жїемъ сконча́етсѧ ї҆еровоа́мъ, ї҆и҃ль же плѣне́нъ ѿведе́тсѧ ѿ землѝ своеѧ̀.
12 И҆ речѐ а҆масі́а ко а҆мѡ́сови: ви́дѧй грѧдѝ и҆ ѿидѝ ты̀ на зе́млю ї҆ѹ́динѹ, и҆ та́мѡ живѝ, и҆ та́мѡ да прорица́еши:
13 а҆ въ веѳи́ли посе́мъ не приложѝ прорица́ти, ѩ҆́кѡ ѡ҆свѧще́нїе царѧ̀ є҆́сть и҆ до́мъ є҆́сть ца́рства.
14 И҆ ѿвѣща̀ а҆мѡ́съ и҆ речѐ ко а҆масі́и: не бѣ́хъ про҇ро́къ а҆́зъ, нижѐ сы́нъ про҇ро́чь, но па́стырь бѣ́хъ и҆ ѩ҆́гѡдичїѧ ѡ҆бира́ѧ:
15 и҆ поѧ́ мѧ гд҇ь ѿ ѻ҆ве́цъ и҆ речѐ ко мнѣ̀: и҆дѝ и҆ прорцы̀ на лю́ди моѧ҄ ї҆и҃лѧ.
16 И҆ нн҃ѣ слы́ши сло́во гд҇не: ты̀ глаго́леши: не прорица́й на ї҆и҃лѧ и҆ не возмѹща́й наро́да на до́мъ ї҆а́кѡвль:
17 сегѡ̀ ра́ди сїѧ҄ гл҃етъ гд҇ь: жена̀ твоѧ̀ во гра́дѣ соблѹ́дитъ, сы́нове же твоѝ и҆ дщє́ри ѻ҆рѹ́жїемъ падѹ́тъ, и҆ землѧ̀ твоѧ̀ ѹ҆́жемъ и҆змѣ́ритсѧ, и҆ ты̀ на землѝ нечи́стѣй сконча́ешисѧ, и҆ ї҆и҃ль плѣне́нъ ѿведе́тсѧ ѿ землѝ своеѧ̀.
Нашли в тексте ошибку? Выделите её и нажмите:
Ctrl + Enter
Книга пророка Амоса, 7 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784