1 Про҇ро́чество словесѐ гд҇нѧ на ї҆и҃лѧ, гл҃етъ гд҇ь, простры́й не́бо и҆ ѡ҆снова́ѧй зе́млю и҆ созида́ѧй дѹ́хъ человѣ́ка въ не́мъ:
2 сѐ, а҆́зъ полага́ю ї҆ер҇ли́ма ѩ҆́кѡ преддвє́рїѧ дви҄жимаѧ всѣ҄мъ лю́демъ ѡ҆́крестъ, и҆ во ї҆ѹде́и бѹ́детъ ѡ҆бсѣде́нїе на ї҆ер҇ли́ма:
3 и҆ бѹ́детъ въ де́нь ѻ҆́ный, положѹ̀ ї҆ер҇ли́ма ка́мень попира́емый всѣ́ми ѩ҆зы҄ки: всѧ́къ попира́ѧй є҆го̀ рѹга́ѧсѧ порѹга́етсѧ, и҆ соберѹ́тсѧ на́нь всѝ ѩ҆зы́цы землѝ.
4 Въ де́нь ѡ҆́нъ, гл҃етъ гд҇ь вседержи́тель, поражѹ̀ всѧ́каго конѧ̀ во ѹ҆́жасъ и҆ вса́дника є҆гѡ̀ въ безѹ́мїе: и҆ на до́мъ ї҆ѹ́довъ ѿве́рзѹ ѻ҆́чи моѝ и҆ всѧ҄ ко́ни люді́й поражѹ̀ во ѡ҆слѣпле́нїе.
5 И҆ рекѹ́тъ ты́сѧщницы ї҆ѹ҄дины всѝ въ сердца́хъ свои́хъ: ѡ҆брѧ́щемъ себѣ̀ живѹ́щыѧ во ї҆ер҇ли́мѣ ѡ҆ гд҇ѣ вседержи́тели бз҃ѣ и҆́хъ.
6 Въ де́нь ѡ҆́нъ положѹ̀ ты́сѧщники ї҆ѹ҄дины ѩ҆́кѡ главню̀ ѻ҆́гненнѹ въ дрова́хъ и҆ ѩ҆́кѡ свѣщѹ̀ ѻ҆́гненнѹ въ сте́блїи, и҆ поѧдѧ́тъ ѡ҆деснѹ́ю и҆ ѡ҆шѹ́юю всѧ҄ лю́ди ѡ҆́крестъ: и҆ насели́тсѧ ї҆ер҇ли́мъ є҆щѐ по себѣ̀ во ї҆ер҇ли́мѣ:
7 и҆ сп҃се́тъ гд҇ь селє́нїѧ ї҆ѹ́дѡва ѩ҆́коже и҆спе́рва, ѩ҆́кѡ да не велича́етсѧ похвала̀ до́мѹ даві́дова и҆ велича҄нїѧ живѹ́щихъ во ї҆ер҇ли́мѣ на ї҆ѹ́дѹ.
8 И҆ бѹ́детъ въ де́нь ѡ҆́нъ, защи́титъ гд҇ь живѹ́щихъ во ї҆ер҇ли́мѣ: и҆ бѹ́детъ немощны́й въ ни́хъ въ то́й де́нь ѩ҆́кѡ даві́дъ, а҆ до́мъ даві́довъ ѩ҆́кѡ до́мъ бж҃їй, ѩ҆́коже а҆́гг҃лъ гд҇ень пред̾ ни́ми.
9 И҆ бѹ́детъ въ де́нь ѡ҆́нъ, взыщѹ̀ и҆з̾ѧ́ти всѧ҄ ѩ҆зы́ки грѧдѹ́щыѧ на ї҆ер҇ли́мъ,
10 и҆ и҆злїю̀ на до́мъ даві́довъ и҆ на живѹ́щыѧ во ї҆ер҇ли́мѣ дх҃ъ блгдти и҆ щедро́тъ, и҆ воззрѧ́тъ на́нь, є҆го́же прободо́ша, и҆ воспла́чѹтсѧ ѡ҆ не́мъ пла́канїемъ ѩ҆́кѡ ѡ҆ возлю́бленнѣмъ, и҆ поболѧ́тъ ѡ҆ не́мъ болѣ́знїю ѩ҆́кѡ ѡ҆ пе́рвенцѣ.
11 Въ де́нь ѡ҆́нъ возвели́читсѧ плачево́пльствїе во ї҆ер҇ли́мѣ, ѩ҆́кѡ плачево́пльствїе а҆дадримо́на на по́ли магедо́нѣ.
12 И҆ воспла́четсѧ землѧ̀ по племенѡ́мъ племенѡ́мъ: колѣ́но ѡ҆ себѣ̀, и҆ жєны̀ и҆́хъ ѡ҆ себѣ̀: колѣ́но до́мѹ даві́дова ѡ҆ себѣ̀ и҆ жєны̀ и҆́хъ ѡ҆ себѣ̀:
13 колѣ́но до́мѹ наѳа́нова ѡ҆ себѣ̀, и҆ жєны̀ и҆́хъ ѡ҆ себѣ̀: колѣ́но до́мѹ леѵі́ина ѡ҆ себѣ̀, и҆ жєны̀ и҆́хъ и҆ себѣ̀: колѣ́но сѷмеѡ́не ѡ҆ себѣ̀, и҆ жєны̀ и҆́хъ ѡ҆ себѣ̀:
14 всѧ҄ прѡ́чаѧ кѡлѣ́на, колѣ́но и҆ колѣ́но ѡ҆ себѣ̀, и҆ жєны̀ и҆́хъ ѡ҆ себѣ̀.
Нашли в тексте ошибку? Выделите её и нажмите:
Ctrl + Enter
Книга пророка Захарии, 12 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784