1 Въ де́нь ѡ҆́нъ бѹ́детъ всѧ́ко мѣ́сто ѿверза́емо до́мѹ даві́довѹ и҆ живѹ́щымъ во ї҆ер҇ли́мѣ въ предвиже́нїе и҆ раздѣле́нїе.
2 И҆ бѹ́детъ въ де́нь ѡ҆́нъ, гл҃етъ гд҇ь саваѡ́ѳъ, потреблю̀ и҆мена̀ їдѡлѡвъ ѿ землѝ, и҆ ктомѹ̀ не бѹ́детъ и҆́хъ па́мѧти:и҆ лжи҄выѧ проро́ки и҆ дѹ́ха нечи́стаго и҆змѹ̀ ѿ землѝ.
3 И҆ бѹ́детъ, а҆́ще прорече́тъ человѣ́къ є҆щѐ, и҆ рече́тъ къ немѹ̀ ѻ҆те́цъ є҆гѡ̀ и҆ ма́ти є҆гѡ̀, ро́ждшїи є҆го̀, внегда̀ проро́чествовати є҆мѹ̀: не жи́въ бѹ́деши, ѩ҆́кѡ лжѹ̀ глаго́лалъ є҆сѝ во и҆́мѧ гд҇не: и҆ за́пнѹтъ є҆мѹ̀ ѻ҆те́цъ є҆гѡ̀ и҆ ма́ти є҆гѡ̀, роди́вшїи є҆го̀, є҆гда̀ проро́чествовати на́чнетъ.
4 И҆ бѹ́детъ въ де́нь ѡ҆́нъ, постыдѧ́тсѧ проро́цы, кі́йждо ѿ видѣ́нїѧ своегѡ̀, внегда̀ проро́чествовати є҆мѹ̀, и҆ ѡ҆блекѹ́тсѧ въ ко́жѹ власѧнѹ́ю, занѐ солга́ша.
5 И҆ рече́тъ: нѣ́смь про҇ро́къ а҆́зъ, ѩ҆́кѡ человѣ́къ дѣ́лаѧй зе́млю а҆́зъ є҆́смь, занѐ человѣ́къ роди́ мѧ ѿ ю҆́ности моеѧ̀.
6 И҆ рекѹ̀ къ немѹ̀: что̀ ѩ҆́звы сїѧ҄ посредѣ̀ рѹкѹ̀ твоє́ю; И҆ рече́тъ: и҆́миже ѹ҆ѧ́звленъ бы́хъ въ домѹ̀ возлю́бленнагѡ моегѡ̀.
7 Мечѹ̀, воста́ни на па́стырѧ моего̀ и҆ на мѹ́жа граждани́на моего̀, гл҃етъ гд҇ь вседержи́тель: поразѝ па́стырѧ, и҆ расточа́тсѧ ѻ҆́вцы ста́да: и҆ наведѹ̀ рѹ́кѹ мою̀ на (ма҄лыѧ) па҄стыри.
8 И҆ бѹ́детъ въ де́нь ѡ҆́нъ на все́й землѝ, гл҃етъ гд҇ь, двѣ̀ ча҄сти є҆ѧ̀ потребѧ́тсѧ и҆ и҆зче́знѹтъ, а҆ тре́тїѧ ѡ҆ста́нетсѧ на не́й:
9 и҆ проведѹ̀ тре́тїю ча́сть сквозѣ̀ ѻ҆́гнь, и҆ разжгѹ̀ ѧ҆̀, ѩ҆́коже разжиза́етсѧ сребро̀, и҆ и҆скѹшѹ̀ ѧ҆̀, ѩ҆́коже и҆скѹша́етсѧ зла́то: то́й призове́тъ и҆́мѧ моѐ, и҆ а҆́зъ ѹ҆слы́шѹ є҆го̀ и҆ рекѹ̀: лю́дїе моѝ сі́и сѹ́ть. И҆ ті́и рекѹ́тъ: гд҇ь бг҃ъ мо́й.
Нашли в тексте ошибку? Выделите её и нажмите:
Ctrl + Enter
Книга пророка Захарии, 13 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784