1 Проси́те ѿ гд҇а дождѧ̀ во вре́мѧ ра́ннѧгѡ и҆ по́зднѧгѡ: гд҇ь сотворѝ привидѣ҄нїѧ, и҆ до́ждь зи́менъ да́стъ и҆̀мъ, комѹ́ждо ѕла́къ на селѣ̀.
2 Занѐ провѣща́ющїи глаго́лаша трѹды̀, и҆ вражби́телїе видѣ҄нїѧ лѡ́жна и҆ сѡ́нїѧ лжи҄ва глаго́лахѹ, сѹ́етными ѹ҆тѣша́хѹ: сегѡ̀ ра́ди и҆зсхо́ша ѩ҆́кѡ ѻ҆́вцы, и҆ ѡ҆ѕло́блени бы́ша, поне́же не бѣ̀ и҆зцѣле́нїѧ.
3 На па́стырей прогнѣ́васѧ ѩ҆́рость моѧ̀, и҆ на а҆́гнцы посѣщѹ̀: и҆ посѣти́тъ гд҇ь бг҃ъ вседержи́тель ста́до своѐ, до́мъ ї҆ѹ́динъ, и҆ ѹ҆чини́тъ ѧ҆̀ а҆́ки конѧ̀ благолѣ́пна своего̀ во бра́ни.
4 И҆ ѿ негѡ̀ призрѣ̀, и҆ ѿ негѡ̀ ѹ҆чинѝ, и҆ ѿ негѡ̀ лѹ́къ въ дѹ́сѣ ѩ҆́рости, и҆ ѿ негѡ̀ и҆зы́детъ всѧ́къ и҆згонѧ́ѧй въ то́мъ.
5 И҆ бѹ́дѹтъ ѩ҆́кѡ ра́тницы попира́юще бре́нїе на пѹте́хъ во бра́ни, и҆ ѡ҆полча́тсѧ, ѩ҆́кѡ гд҇ь съ ни́ми, и҆ постыдѧ́тсѧ вса́дницы ко́ннїи.
6 И҆ ѹ҆крѣплю̀ до́мъ ї҆ѹ́довъ и҆ до́мъ ї҆ѡ́сифовъ сп҃сѹ̀, и҆ вселю̀ ѧ҆̀, поне́же возлюби́хъ ѧ҆̀, и҆ бѹ́дѹтъ а҆́ки бы не ѿврати́хъ и҆́хъ: занѐ а҆́зъ гд҇ь бг҃ъ и҆́хъ и҆ ѹ҆слы́шѹ ѧ҆̀.
7 И҆ бѹ́дѹтъ ѩ҆́кѡ ра́тницы є҆фре́мѡвы, и҆ возра́дѹетсѧ се́рдце и҆́хъ а҆́ки ѿ вїна̀: и҆ ча҄да и҆́хъ ѹ҆ви́дѧтъ и҆ возвеселѧ́тсѧ, и҆ возра́дѹетсѧ се́рдце и҆́хъ ѡ҆ гд҇ѣ.
8 Возвѣщѹ̀ и҆̀мъ и҆ прїимѹ̀ ѧ҆̀, занѐ и҆скѹплю̀ и҆́хъ, и҆ ѹ҆мно́жатсѧ, ѩ҆́коже бѧ́хѹ мно́зи:
9 и҆ всѣ́ю ѧ҆̀ въ лю́дехъ, и҆ да́льнїи помѧнѹ́тъ мѧ̀, и҆ воспита́ютъ ча҄да своѧ҄, и҆ ѡ҆братѧ́тсѧ:
10 и҆ возвращѹ̀ ѧ҆̀ ѿ землѝ є҆гѵ́петскїѧ и҆ ѿ а҆ссѷрі́анъ прїимѹ̀ ѧ҆̀, и҆ въ галааді́тъ и҆ въ лїва́нъ введѹ̀ ѧ҆̀, и҆ не и҆́мать ѡ҆ста́ти ѿ ни́хъ ни є҆ди́нъ.
11 И҆ про́йдѹтъ мо́ремъ ѹ҆́зкимъ и҆ поразѧ́тъ въ мо́ри вѡ́лны, и҆ и҆зсѧ́кнѹтъ всѧ҄ глѹбины҄ рѣчны҄ѧ, и҆ ѿи́метсѧ всѧ́ко досажде́нїе а҆ссѷрі́йско, и҆ ски́птръ є҆гѵ́петскъ ѿи́метсѧ.
12 И҆ ѹ҆крѣплю̀ ѧ҆̀ ѡ҆ гдѣ̀ бз҃ѣ и҆́хъ, и҆ ѡ҆ и҆́мени є҆гѡ̀ восхва́лѧтсѧ, гл҃етъ гд҇ь.
Нашли в тексте ошибку? Выделите её и нажмите:
Ctrl + Enter
Книга пророка Захарии, 10 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784