1 Сегѡ̀ ра́ди ѿ подо́бныхъ пострада́ша досто́йнѣ, и҆ мно́жествомъ ѕвѣре́й казне́ни бы́ша.
2 Вмѣ́стѡ мѹче́нїѧ бла́го сотвори́лъ є҆сѝ лю́демъ твои҄мъ, въ похотѣ́нїе жела́нїѧ стра́нное вкѹше́нїе, пи́щѹ ѹ҆гото́валъ є҆сѝ кра́стєли,
3 да ѻ҆́ни ѹ҆́бѡ вожделѣ́вшїи пи́щи, показа́нїемъ по́сланыхъ, и҆ ѿ нѹ́жнагѡ хотѣ́нїѧ ѿвратѧ́тсѧ, сі́и же вма́лѣ скѹ́дни бы́вше, и҆ стра́нна приѡбща́тсѧ вкѹше́нїѧ.
4 Подоба́ше бо на ѻ҆́ныхъ ѹ҆́бѡ неизбѣ́жнѣй нищетѣ̀ наитѝ мѹчи́телствѹющихъ, си҄мъ же то́кмѡ показа́ти, ка́кѡ вразѝ и҆́хъ мѹ́чишасѧ.
5 И҆́бо є҆гда̀ тѣ҄мъ на́йде же́стокъ ѕвѣре́й гнѣ́въ, и҆ ѹ҆грызе́ньми сверѣ́пыхъ и҆стреблѧ́хѹсѧ ѕмїє́въ,
6 но не до конца̀ пребы́сть гнѣ́въ тво́й: въ наказа́нїе же вма́лѣ смѹще́ни бы́ша, зна́менїе и҆мѣ́юще спасе́нїѧ, на воспомина́нїе за́повѣди зако́на твоегѡ̀:
7 ѡ҆брати́выйсѧ бо не (ве́щїю) зри́мою цѣлѧ́шесѧ, но тобо́ю всѣ́хъ сп҃си́телемъ.
8 И҆ въ се́мъ же показа́лъ є҆сѝ врагѡ́мъ на́шымъ, ѩ҆́кѡ ты̀ є҆сѝ и҆збавлѧ́ѧй ѿ всѧ́кагѡ ѕла̀:
9 тѣ́хъ бо а҆крї҄ды и҆ мѹ҄хи поби́ша ѹ҆грызе́нїемъ, и҆ не ѡ҆брѣ́тесѧ цѣльба̀ дѹша́мъ и҆́хъ, ѩ҆́кѡ досто́йни бѧ́хѹ ѿ таковы́хъ мѹ́читисѧ.
10 Сынѡ́въ же твои́хъ нижѐ ѩ҆дови́тыхъ ѕмїє́въ зѹ́бы ѡ҆долѣ́ша: мл҇ть бо твоѧ̀ прихожда́ше и҆ и҆зцѣлѧ́ше и҆̀хъ.
11 Въ па́мѧть бо слове́съ твои́хъ бѧ́хѹ ѹ҆сѣ́чени и҆ ско́рѡ и҆зцѣлѧ́хѹсѧ, да не во глѹбинѹ̀ впа́дше забве́нїѧ ѿлѹча́тсѧ твоегѡ̀ бл҃годѣѧ́нїѧ:
12 ниже́ бо ѕе́лїе, нижѐ ѡ҆бѧза́нїе и҆зцѣлѝ и҆̀хъ, но сло́во твоѐ, гд҇и, и҆зцѣлѧ́ющее всѧ҄.
13 Ты́ бо живота̀ и҆ сме́рти вла́сть и҆́маши, и҆ низво́диши да́же до вра́тъ а҆́да, и҆ возво́диши.
14 Человѣ́къ же ѹ҆бива́етъ ѹ҆́бѡ ѕло́бою свое́ю: и҆зше́дшагѡ же дѹ́ха не возврати́тъ, нижѐ па́ки призыва́етъ дѹ́шѹ взѧ́тѹю.
15 Твоеѧ́ же рѹкѝ и҆збѣжа́ти невозмо́жно є҆́сть:
16 ѿмета́ющїисѧ бо тебѐ вѣ́дѣти нечести́вїи, въ крѣ́пости мы́шцы твоеѧ̀ бїе́ни бы́ша стра́нными дождьмѝ и҆ гра́дами, и҆ бѹ́рѧми гони́ми неизбѣ́жнѡ, и҆ ѻ҆гне́мъ растаева́еми.
17 Пресла́вное бо, въ водѣ̀ всѧ҄ ѹ҆гаша́ющей мно́жае дѣ́йствоваше ѻ҆́гнь: спобо́рникъ бо є҆́сть мі́ръ ѡ҆ пра́ведныхъ.
18 Ѻ҆вогда́ бо ѹ҆́бѡ ѹ҆кроща́шесѧ пла́мень, да не сожже́тъ по́сланныхъ живо́тныхъ на нечєсти́выѧ: но сі́и зрѧ́ще да вѣ́дѧтъ, ѩ҆́кѡ ѿ бж҃їѧ сѹда̀ стра́ждѹтъ гоне́нїе.
19 Ѻ҆вогда́ же и҆ междѹ̀ водо́ю вы́ше си́лы ѻ҆́гненныѧ палѧ́ше, да беззакѡ́нныѧ землѝ порождє́нїѧ растли́тъ.
20 Вмѣ́стѡ же си́хъ а҆́гг҃лскою пи́щею пита́лъ є҆сѝ лю́ди твоѧ҄, и҆ ѹ҆гото́ванъ хлѣ́бъ съ небесѐ посла́лъ є҆сѝ и҆̀мъ без̾ трѹда̀, всѧ́кое ѹ҆слажде́нїе въ себѣ̀ и҆мѣ́ющь и҆ ко всѧ́комѹ сли́чный вкѹше́нїю.
21 Сѹщество́ бо твоѐ сла́дость твою̀ ко сынѡ́мъ пока́зоваше, и҆ ѹ҆гожда́ѧ є҆ди́нагѡ коегѡ́ждо во́ли, ѩ҆́коже кто̀ хотѧ́ше, превраща́шесѧ.
22 Снѣ́гъ же и҆ ле́дъ терпѧ́хѹ ѻ҆́гнь и҆ не растаѧва́хѹ: да ѹ҆вѣ́дѧтъ, ѩ҆́кѡ плоды̀ врагѡ́въ и҆стреблѧ́ше ѻ҆́гнь горѧ́щь во гра́дѣ и҆ въ дожде́хъ блиста́ющь:
23 то́йже па́ки, да пита́ютсѧ пра́веднїи, (ѻ҆́гнь) и҆ свою̀ забы̀ си́лѹ.
24 Творе́нїе бо, тебѣ̀ творцѹ̀ всѣ́хъ слѹжа́щее, распростира́етсѧ на мѹ́кѹ проти́вѹ непра́ведныхъ и҆ легча́е твори́тсѧ во благодѣѧ́нїе ра́ди на тѧ̀ надѣ́ющихѧ.
25 Сегѡ̀ ра́ди и҆ тогда̀ во всѧ҄ преѡбразѹ́емое всѣ́хъ корми́телницѣ блгдти твое́й слѹжа́ше къ во́ли тре́бѹющихъ:
26 да наѹча́тсѧ сы́нове твоѝ, и҆̀хже возлюби́лъ є҆сѝ, гд҇и, ѩ҆́кѡ не рождє́нїѧ плодѡ́въ пита́ютъ человѣ́ка, но сло́во твоѐ тебѣ̀ вѣ́рѹющихъ соблюда́етъ.
27 Е҆́же бо ѻ҆гне́мъ нерастлѣ́но ско́рѡ ѿ ма́лыѧ лѹчѝ со́лнечныѧ грѣ́емое растаѧва́шесѧ:
28 да зна́емо бѹ́детъ (всѣ҄мъ), ѩ҆́кѡ подоба́етъ предвари́ти со́лнце на благодаре́нїе тебѣ̀ и҆ къ восто́кѹ свѣ́та тебѣ̀ поклони́тисѧ.
29 Неблагода́рнагѡ бо ѹ҆пова́нїе ѩ҆́кѡ зи́мный и҆́ней раста́етъ, и҆ и҆злїе́тсѧ ѩ҆́кѡ вода̀ неключи́ма.
Нашли в тексте ошибку? Выделите её и нажмите:
Ctrl + Enter
Книга Премудрости Соломона, 16 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784