1 Лѹ́чше безча́дство со добродѣ́телїю: безсме́ртїе бо є҆́сть въ па́мѧти є҆ѧ̀, ѩ҆́кѡ и҆ пред̾ бг҃омъ позна́етсѧ и҆ пред̾ человѣ҄ки:
2 присѹ́щѹю бо подража́ютъ ю҆̀ и҆ жела́ютъ ѿше́дшїѧ, и҆ въ вѣ́цѣ вѣнцено́снѡ чти́тсѧ нескве́рныхъ по́двигѡвъ бра́нь ѡ҆долѣ́вши.
3 Многопло́дно же нечести́выхъ мно́жество неключи́мо бѹ́детъ, и҆ прелюбодѣ҄йнаѧ насаждє́нїѧ не дадѹ́тъ коре́нїѧ въ глѹбинѹ̀, нижѐ крѣ́пко стоѧ́нїе сотворѧ́тъ:
4 а҆́ще бо и҆ вѣ҄тви на вре́мѧ процвѣтѹ́тъ, не крѣ́пкѡ возше́дше ѿ вѣ́тра поколе́блютсѧ и҆ ѿ ѕѣ́лныхъ вѣ́трѡвъ и҆скоренѧ́тсѧ:
5 сокрѹша́тсѧ вѣ҄тви несовершє́нны, и҆ пло́дъ и҆́хъ неключи́мь, ѡ҆ско́менъ въ снѣ́дь, и҆ ни во что̀ потре́бенъ.
6 Ѿ беззако́нныхъ бо снѡ́въ ча҄да ражда́ємаѧ свидѣ́телїе сѹ́ть лѹка́вствїѧ на роди́тєли во и҆спыта́нїи и҆́хъ.
7 Првдникъ же а҆́ще пости́гнетъ сконча́тисѧ, въ поко́и бѹ́детъ:
8 ста́рость бо честна̀ не многолѣ́тна, нижѐ въ числѣ̀ лѣ́тъ и҆зчита́етсѧ:
9 сѣди́на же є҆́сть мѹ́дрость человѣ́кѡмъ, и҆ во́зрастъ ста́рости житїѐ нескве́рно.
10 Бл҃гоѹго́денъ бг҃ови бы́въ, возлю́бленъ бы́сть, и҆ живы́й посредѣ̀ грѣ́шныхъ преста́вленъ бы́сть:
11 восхище́нъ бы́сть, да не ѕло́ба и҆змѣни́тъ ра́зѹмъ є҆гѡ̀, и҆лѝ ле́сть прельсти́тъ дѹ́шѹ є҆гѡ̀.
12 Раче́нїе бо ѕло́бы помрача́етъ дѡ́браѧ, и҆ паре́нїе по́хоти премѣнѧ́етъ ѹ҆́мъ неѕло́бивъ.
13 Сконча́всѧ вма́лѣ и҆спо́лни лѣ҄та дѡ́лга:
14 ѹ҆го́дна бо бѣ̀ гд҇еви дѹша̀ є҆гѡ̀, сегѡ̀ ра́ди потща́сѧ ѿ среды̀ лѹка́вствїѧ:
15 лю́дїе же ви́дѣвше и҆ не разѹмѣ́вше, нижѐ поло́жше въ помышле́нїи таково́е, ѩ҆́кѡ блгдть и҆ мл҇ть въ прпдбныхъ є҆гѡ̀ и҆ посѣще́нїе во и҆збра́нныхъ є҆гѡ̀.
16 Ѡ҆сѹ́дитъ же првдникъ ѹ҆мира́ѧй живы́хъ нечести́выхъ, и҆ ю҆́ность сконча́вшаѧсѧ ско́рѡ долголѣ́тнѹю ста́рость непра́веднагѡ.
17 Ѹ҆́зрѧтъ бо кончи́нѹ премѹ́драгѡ и҆ не ѹ҆разѹмѣ́ютъ, что̀ ѹ҆совѣ́това ѡ҆ не́мъ и҆ во что̀ ѹ҆твердѝ є҆го̀ гд҇ь:
18 ѹ҆́зрѧтъ и҆ ѹ҆ничижа́тъ є҆го̀, гд҇ь же посмѣе́тсѧ и҆̀мъ:
19 и҆ бѹ́дѹтъ посе́мъ въ паде́нїе безче́стно и҆ во ѹ҆кори́знѹ въ ме́ртвыхъ въ вѣ́къ: ѩ҆́кѡ расто́ргнетъ и҆̀хъ безгла҄сны ни́цъ и҆ поколе́блетъ и҆̀хъ ѿ ѡ҆снова́нїй, и҆ да́же до послѣ́днихъ ѡ҆пѹстѣ́ютъ и҆ бѹ́дѹтъ въ болѣ́зни, и҆ па́мѧть и҆̀хъ поги́бнетъ:
20 прїи́дѹтъ въ помышле́нїе грѣхѡ́въ свои́хъ боѧзли́вїи, и҆ ѡ҆блича́тъ и҆̀хъ проти́вѹ беззакѡ́нїѧ и҆́хъ.
Нашли в тексте ошибку? Выделите её и нажмите:
Ctrl + Enter
Книга Премудрости Соломона, 4 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784