1 Е҆́смь бо и҆ а҆́зъ человѣ́къ сме́ртенъ, подо́бенъ всѣ҄мъ и҆ земноро́днагѡ внѹ́къ первозда́ннагѡ:
2 и҆ во чре́вѣ ма́терни и҆з̾ѡбрази́хсѧ пло́ть, въ десѧтомѣ́сѧчнѣмъ вре́мени согѹсти́всѧ въ кро́ви ѿ сѣ́мене мѹ́жеска и҆ ѹ҆слажде́нїѧ сно́мъ соше́дшагѡсѧ.
3 И҆ а҆́зъ рожде́нъ воспрїѧ́хъ ѻ҆́бщагѡ а҆́ера и҆ на подобостра́стнѹю зе́млю спадо́хъ, пе́рвый гла́съ подо́бный всѣ҄мъ и҆спѹсти́хъ пла́ча:
4 въ пелена́хъ воскормле́нъ є҆́смь, и҆ съ (вели́кимъ) прилѣжа́нїемъ:
5 ни є҆ди́нъ бо ца́рь и҆́но и҆мѣ̀ рожде́нїѧ нача́ло,
6 є҆ди́нъ бо вхо́дъ всѣ҄мъ є҆́сть въ житїѐ, подо́бенъ же и҆ и҆схо́дъ.
7 Сегѡ̀ ра́ди помоли́хсѧ, и҆ да́нъ бы́сть мнѣ̀ ра́зѹмъ: призва́хъ, и҆ прїи́де на мѧ̀ дѹ́хъ премѹ́дрости.
8 Предсѹди́хъ ю҆̀ па́че ски́птрѡвъ и҆ престо́лѡвъ, и҆ бога́тство ничто́же вмѣни́хъ ко сравне́нїю тоѧ̀,
9 нижѐ ѹ҆подо́бихъ є҆ѧ̀ ка́меню драгоцѣ́нномѹ, ѩ҆́кѡ всѐ зла́то пред̾ не́ю песо́къ ма́лый, и҆ ѩ҆́кѡ бре́нїе вмѣни́тсѧ пред̾ не́ю сребро̀:
10 па́че здра́вїѧ и҆ красоты̀ возлюби́хъ ю҆̀ и҆ пред̾избра́хъ ю҆̀ вмѣ́стѡ свѣ́та и҆мѣ́ти, ѩ҆́кѡ неѹгаса́емо є҆́сть блиста́нїе є҆ѧ̀.
11 Прїидо́ша же мнѣ̀ блага҄ѧ всѧ҄ вкѹ́пѣ съ не́ю и҆ безчи́слено бога́тство рѹка́ма є҆ѧ̀:
12 и҆ возвесели́хсѧ ѡ҆ всѣ́хъ, ѩ҆́кѡ и҆́ми ѡ҆блада́етъ премѹ́дрость: не вѣ́дѣхъ же ю҆̀ роди́телницѹ бы́ти си́хъ.
13 Неле́стнѣ наѹчи́хсѧ, без̾ за́висти преподаю̀ и҆ бога́тства є҆ѧ̀ не сокрыва́ю:
14 неѡскѹ́дно бо є҆́сть сокро́вище человѣ́кѡмъ, є҆́же ѹ҆потреби́вшїи къ бг҃ѹ посла́шасѧ въ содрѹже́нїе, дара́ми ѿ наказа́нїѧ предста́влени.
15 Мнѣ́ же дадѐ бг҃ъ глаго́лати по разѹмѣ́нїю и҆ мнѣ́ти досто́йнѣ ѡ҆ подава́емыхъ, ѩ҆́кѡ то́й и҆ премѹ́дрости предводи́тель є҆́сть и҆ премѹ́дрыхъ и҆спра́витель:
16 въ рѹкѹ́ бо є҆гѡ̀ и҆ мы̀ и҆ словеса̀ на҄ша, и҆ всѧ́кїй ра́зѹмъ и҆ дѣ́лъ хѹдо́жество.
17 Се́й бо дадѐ мнѣ̀ ѡ҆ сѹ́щихъ позна́нїе нело́жное, позна́ти составле́нїе мі́ра и҆ дѣ́йствїе стїхі́й,
18 нача́ло и҆ коне́цъ и҆ среди́нѹ време́нъ, возвра́тѡвъ премѣ҄ны и҆ и҆змѣнє́нїѧ време́нъ,
19 лѣ́тъ крѹ́ги и҆ ѕвѣ́здъ расположє́нїѧ,
20 є҆стество̀ живо́тныхъ и҆ гнѣ́въ ѕвѣре́й, вѣ́трѡвъ ѹ҆си́лїе и҆ помышлє́нїѧ человѣ́кѡвъ, ра́знство лѣ́тораслемъ и҆ си҄лы коре́нїй.
21 И҆ є҆ли҄ка сѹ́ть скры҄та и҆ ѩ҆́вна, позна́хъ: всѣ́хъ бо хѹдо́жница наѹчи́ мѧ премѹ́дрость.
22 Е҆́сть бо въ то́й дѹ́хъ ра́зѹма ст҃ъ, є҆диноро́дный, многоча́стный, то́нкїй, благодви́жный, свѣ́тлый, нескве́рный, ѩ҆́сный, невреди́телный, благолюби́вый, ѻ҆́стръ, невозбра́ненъ, благодѣ́лателенъ,
23 человѣколюби́въ, и҆звѣ́стный, крѣ́пкїй, безпеча́льный, всеси́льный, всеви́дѧй, и҆ сквозѣ̀ всѧ҄ проходѧ́й дѹ́хи разѹми҄чныѧ, чи҄стыѧ, тонча́йшыѧ.
24 Всѧ́кагѡ бо движе́нїѧ подви́жнѣйша є҆́сть премѹ́дрость: достиза́етъ же и҆ проница́етъ сквозѣ̀ всѧ́чєскаѧ ра́ди (своеѧ̀) чистоты̀.
25 Па́ра бо є҆́сть си́лы бж҃їѧ и҆ и҆злїѧ́нїе вседержи́телѧ сла́вы чи́стое: сегѡ̀ ра́ди ничто́же ѡ҆скверне́но на ню̀ напа́даетъ.
26 Сїѧ́нїе бо є҆́сть свѣ́та пр҇носѹ́щнагѡ и҆ зерца́ло непоро́чно бж҃їѧ дѣ́йствїѧ и҆ ѡ҆́бразъ бл҃госты́ни є҆гѡ̀.
27 Е҆ди́на же сѹ́щи всѧ́чєскаѧ мо́жетъ, и҆ пребыва́ющи въ себѣ̀ всѧ҄ ѡ҆бновлѧ́етъ, и҆ по родѡ́мъ въ дѹ́шы прпдбныхъ преходѧ́щи, дрѹ́ги бж҃їѧ и҆ про҇ро́ки ѹ҆строѧ́етъ:
28 ни кого́же бо лю́битъ бг҃ъ, то́кмѡ сего̀, и҆́же со премѹ́дростїю пребыва́етъ.
29 Е҆́сть бо сїѧ̀ благолѣ́пнѣе со́лнца и҆ па́че всѧ́кагѡ расположе́нїѧ ѕвѣ́здъ: свѣ́тѹ соравнѧ́ема ѡ҆брѣта́етсѧ пе́рваѧ:
30 сего́ бо прее́млетъ но́щь, премѹ́дрости же не ѡ҆долѣ́етъ ѕло́ба.
Нашли в тексте ошибку? Выделите её и нажмите:
Ctrl + Enter
Книга Премудрости Соломона, 7 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784