1 Бж҃е ѻ҆тцє́въ и҆ гд҇и мл҇ти твоеѧ̀, сотвори́вый всѧ҄ сло́вомъ твои́мъ
2 и҆ премдростїю твое́ю ѹ҆стро́ивый человѣ́ка, да владѣ́етъ сотворе́нными ѿ тебє̀ тва́рьми,
3 и҆ да ѹ҆правлѧ́етъ мі́ръ въ преподо́бїи и҆ пра́вдѣ, и҆ въ правотѣ̀ дѹшѝ сѹ́дъ да сѹ́дитъ:
4 да́ждь мнѣ̀ твои҄мъ пр҇то́лѡмъ присѣдѧ́щѹю премдрость и҆ не ѿри́ни менѐ ѿ ѻ҆́трѡкъ твои́хъ:
5 ѩ҆́кѡ а҆́зъ ра́бъ тво́й и҆ сы́нъ рабы́ни твоеѧ̀, человѣ́къ не́мощенъ и҆ маловре́мененъ и҆ ѹ҆ма́ленъ въ ра́зѹмѣ сѹда̀ и҆ зако́нѡвъ.
6 А҆́ще бо кто̀ бѹ́детъ и҆ соверше́нъ въ сынѣ́хъ человѣ́ческихъ, ѿсѹ́тствѹющей твое́й премдрости, ни во что́же вмѣни́тсѧ.
7 Ты̀ и҆збра́лъ мѧ̀ є҆сѝ царѧ̀ лю́демъ твои҄мъ и҆ сѹдїю̀ сынѡ́мъ твои҄мъ и҆ дще́ремъ,
8 и҆ ре́клъ мѝ є҆сѝ созда́ти хра́мъ въ горѣ̀ ст҃ѣ́й твое́й и҆ во гра́дѣ ѡ҆бита́нїѧ твоегѡ̀ ѻ҆лта́рь, подо́бїемъ ски́нїи (твоеѧ̀) ст҃ы́ѧ, ю҆́же пред̾ѹгото́валъ є҆сѝ ѿ нача́ла.
9 И҆ съ тобо́ю премдрость вѣ́дѹщаѧ дѣла̀ твоѧ҄ и҆ присѹ́тствѹющаѧ тогда̀, є҆гда̀ мі́ръ твори́лъ є҆сѝ, и҆ вѣ́дѹщаѧ, что̀ є҆́сть ѹ҆го́дно пред̾ ѻ҆чи́ма твои́ма и҆ что̀ пра́во въ за́повѣдехъ твои́хъ:
10 послѝ ю҆̀ съ нб҃съ ст҃ы́хъ и҆ ѿ пр҇то́ла сла́вы твоеѧ̀ послѝ ю҆̀: да сѹ́щи со мно́ю трѹди́тсѧ, и҆ ѹ҆вѣ́мъ, что̀ благоѹго́дно є҆́сть пред̾ тобо́ю:
11 вѣ́сть бо ѻ҆на̀ всѧ҄ и҆ разѹмѣ́етъ, и҆ наста́витъ мѧ̀ въ дѣ́лѣхъ мои́хъ цѣломѹ́дреннѣ и҆ сохрани́тъ мѧ̀ во сла́вѣ свое́й:
12 и҆ бѹ́дѹтъ прїѧ҄тна дѣла̀ моѧ҄, и҆ разсѹждѹ̀ лю́ди твоѧ҄ пра́веднѣ, и҆ бѹ́дѹ досто́инъ престо́лѡвъ ѻ҆тца̀ моегѡ̀.
13 Кто́ бо ѿ человѣ҄къ позна́етъ совѣ́тъ бж҃їй; и҆лѝ кто̀ помы́слитъ, что̀ хо́щетъ бг҃ъ;
14 Помышлє́нїѧ бо сме́ртныхъ боѧзли҄ва, и҆ погрѣши́тєлна ѹ҆мышлє́нїѧ на҄ша:
15 тѣ́ло бо тлѣ́нное ѡ҆тѧгоща́етъ дѹ́шѹ, и҆ земно́е жили́ще ѡ҆бременѧ́етъ ѹ҆́мъ многопопечи́теленъ.
16 И҆ є҆два̀ разѹмѣва́емъ, ѩ҆̀же на землѝ, и҆ ѩ҆̀же въ рѹка́хъ ѡ҆брѣта́емъ со трѹдо́мъ: а҆ ѩ҆̀же на нб҃сѣ́хъ, кто̀ и҆зслѣ́ди;
17 Во́лю же твою̀ кто̀ позна̀, а҆́ще бы не ты̀ да́лъ є҆сѝ премѹ́дрость и҆ посла́лъ є҆сѝ дх҃а ст҃а́го твоего̀ ѿ высоты̀;
18 И҆ та́кѡ и҆спра́вишасѧ стєзѝ сѹ́щихъ на землѝ, и҆ ѩ҆̀же тебѣ̀ ѹ҆гѡ́дна, наѹчи́шасѧ человѣ́цы
19 и҆ премѹ́дростїю спасо́шасѧ.
Нашли в тексте ошибку? Выделите её и нажмите:
Ctrl + Enter
Книга Премудрости Соломона, 9 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784