1 Нечєсти́вымъ же до конца̀ без̾ ми́лости ѩ҆́рость на́йде: предвѣ́дѣ бо и҆́хъ и҆ бѹ҄дѹщаѧ,
2 ѩ҆́кѡ ті́и ѿпѹсти́вшїи, є҆́же ѿитѝ, и҆ со тща́нїемъ предпосла́вше и҆̀хъ, поженѹ́тъ в̾слѣ́дъ раска́ѧвшесѧ:
3 є҆ще́ бо въ рѹка́хъ и҆мѣ́юще рыда҄нїѧ и҆ сѣ́тѹюще над̾ гроба́ми ме́ртвыхъ, и҆́нъ себѣ̀ взѧ́ша по́мыслъ безѹ́мїѧ, и҆ и҆̀хже молѧ́ще и҆згна́ша, си́хъ а҆́ки бѣглецє́въ гонѧ́хѹ.
4 Влеча́ше бо и҆̀хъ къ семѹ̀ концѹ̀ досто́йнаѧ нѹ́жда, и҆ приклю́чшихсѧ забы́тїе вложѝ, да и҆ про́чѹю къ мѹче́нїємъ принапо́лнѧтъ ка́знь:
5 и҆ лю́дїе ѹ҆́бѡ твоѝ пресла́вное пѹтьше́ствїе пре́йдѹтъ, ѻ҆ни́ же стра́ннѹ ѡ҆брѧ́щѹтъ сме́рть.
6 Все́ бо творе́нїе во свое́мъ є҆мѹ̀ ро́дѣ па́ки свы́ше преѡбразова́шесѧ, слѹжа́щее сво́йствєннымъ твои҄мъ повелѣ́нїємъ, да ѻ҆́троцы твоѝ сохранѧ́тсѧ неврежде́ни.
7 Ѡ҆́блакъ ѡ҆сѣнѧ́ѧй по́лкъ и҆́хъ, и҆ и҆з̾ преждебы́вшїѧ воды̀ ѿкры́тїе сѹхі́ѧ землѝ ѩ҆ви́сѧ, и҆ и҆з̾ мо́рѧ чермна́гѡ пѹ́ть невозбра́ненъ, и҆ по́ле ѕла́чное ѿ волне́нїѧ ѕѣ́лнагѡ:
8 и҆́мже ве́сь ѩ҆зы́къ про́йде, твое́ю рѹко́ю покрове́ни, ви́дѧще ди҄внаѧ чѹдеса̀.
9 ѩ҆́коже бо ко́ни насы́тишасѧ, и҆ ѩ҆́кѡ а҆́гнцы взыгра́шасѧ, хва́лѧще тѧ̀, гд҇и, и҆зба́вльшаго и҆̀хъ:
10 воспомѧнѹ́ша бо є҆щѐ, ѩ҆̀же во ѡ҆бита́нїи и҆́хъ, ка́кѡ ѹ҆́бѡ вмѣ́стѡ рожде́нїѧ живо́тныхъ и҆зведѐ землѧ̀ скнї҄пы, вмѣ́стѡ же ры́бъ и҆зры́гнѹ рѣка̀ мно́жество жа́бъ.
11 Послѣди́ же ви́дѣша и҆ но́вое рожде́нїе пти́цъ, є҆гда̀ похотѣ́нїемъ подви́гшесѧ, проси́ша сла́достныѧ пи́щи.
12 Во ѹ҆тѣше́нїе бо взыдо́ша и҆̀мъ ѿ мо́рѧ кра́стєли: и҆ мѹчє́нїѧ грѣ҄шнымъ наидо́ша, не без̾ бы́вшихъ зна́менїй си́лою мо́лнїй: пра́веднѣ бо пострада́ша за своѧ҄ ѕлѡ́бы,
13 и҆́бо лютѣ́йшее ненавидѣ́нїе стра́нныхъ соверши́ша: и҆ні́и ѹ҆́бѡ незна́емыхъ не прїе́млѧхѹ прише́лцєвъ, сі́и же благодѣ́телей стра́нныхъ порабоща́хѹ.
14 И҆ не то́кмѡ, но а҆́ще ко́е разсмотре́нїе бѹ́детъ и҆́хъ: занѐ вражде́бнѡ прїе́млѧхѹ чѹжды́хъ.
15 Сі́и же съ пра́зднествами прїе́мше приѡбщи́вшихсѧ ѹ҆жѐ и҆́хъ ѡ҆бы́чаємъ, жесточа́йшими ѡ҆ѕло́биша трѹда́ми.
16 Побїе́ни же бы́ша и҆ ѡ҆слѣпле́нїемъ, ѩ҆́коже ѻ҆́нїи при две́рехъ пра́ведника, є҆гда̀ вели́кою ѡ҆бложе́ни тмо́ю, кі́йждо свои́хъ две́рїй прохо́да и҆ска́ше.
17 Са́ми бо собо́ю стїхї҄и премѣнѧ́ємы, ѩ҆́коже въ гѹ́слехъ гла́сы сли́чїѧ и҆́мѧ премѣнѧ́ютъ, всегда̀ хранѧ́ще звѹ́къ: є҆́же є҆́сть ви́дѣти ѿ зра́ка бы́вшихъ и҆звѣ́стнѡ.
18 Земна҄ѧ бо въ вѡ́днаѧ прелага́хѹсѧ, и҆ пла҄вающаѧ прехожда́хѹ на зе́млю.
19 Ѻ҆́гнь возмога́ше въ водѣ̀ вы́шше своеѧ̀ си́лы, и҆ вода̀ ѹ҆гаша́ющѹю си́лѹ забы̀.
20 Пла́мень вопрекѝ ѹ҆доботлѣ́нныхъ живо́тныхъ не вредѝ пло́тей въ не́мъ ходѧ́щихъ, нижѐ таѧ́ше ледови́дный ѹ҆добота́ѧй ро́дъ сла́достныѧ пи́щи.
21 По всемѹ́ бо, гд҇и, возвели́чилъ є҆сѝ лю́ди твоѧ҄ и҆ просла́вилъ є҆сѝ, и҆ не презрѣ́лъ є҆сѝ, во всѧ́цѣмъ вре́мени и҆ мѣ́стѣ предстоѧ́й.
Нашли в тексте ошибку? Выделите её и нажмите:
Ctrl + Enter
Книга Премудрости Соломона, 19 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784