1 Сїѧ̀ первозда́ннаго ѻ҆тца̀ мі́рѹ є҆ди́наго созда́ннаго сохранѝ и҆ и҆зведѐ є҆го̀ ѿ грѣха̀ є҆гѡ̀,
2 даде́ же є҆мѹ̀ крѣ́пость содержа́ти всѧ́чєскаѧ.
3 Ѿстѹпи́въ же ѿ неѧ̀ непра́ведный во гнѣ́вѣ свое́мъ со братоѹбі́йственными поги́бе ѩ҆́ростьми:
4 є҆гѡ́же ра́ди потоплѧ́емѹ зе́млю па́ки спасѐ премѹ́дрость, ма́лымъ дре́вомъ првдника соблю́дши.
5 Сїѧ̀ и҆ во є҆диномы́слїи лѹка́вства смѣ́шеныхъ ѩ҆зы́кѡвъ ѡ҆брѣ́те првдника и҆ сохранѝ є҆го̀ непоро́чна бг҃ѹ, и҆ въ поболѣ́нїи ѡ҆ ча́дѣ крѣ́пка соблюдѐ.
6 Сїѧ̀ првднаго, погиба́ющымъ нечести́вымъ, и҆зба́ви бѣжа́щаго ѿ ѻ҆гнѧ̀ низходѧ́ща на пѧ́ть градѡ́въ:
7 и҆́хже є҆щѐ свидѣ́телство лѹка́вствїѧ дымѧ́щаѧсѧ стои́тъ землѧ̀ пѹста̀, и҆ несоверше́нными времены̀ плодоносѧ҄щаѧ древеса̀, и҆ невѣ́рныѧ дѹшѝ па́мѧть стоѧ́щь сто́лпъ сла́нъ.
8 Премѹ́дрость бо мимоходѧ́щїи не то́кмѡ повреди́шасѧ, є҆́же не вѣ́дѣти бла́га, но и҆ безѹ́мїѧ своегѡ̀ ѡ҆ста́виша житїю̀ па́мѧть, да въ ни́хже согрѣши́ша, нижѐ ѹ҆таи́тисѧ возмо́гѹтъ.
9 Премѹ́дрость же слѹжа́щихъ є҆́й ѿ болѣ́зней и҆зба́ви.
10 Сїѧ̀ бѣжа́щаго ѿ гнѣ́ва бра́тнѧ првдника наста́ви на стєзѝ пра҄вы и҆ показа̀ є҆мѹ̀ цр҇твїе бж҃їе и҆ дадѐ є҆мѹ̀ ра́зѹмъ ст҃ы́хъ, почтѐ є҆го̀ въ трѹдѣ́хъ и҆ ѹ҆мно́жи трѹды̀ є҆гѡ̀.
11 Во ѡ҆би́дѣ ѡ҆бдержа́щихъ є҆го̀ предста̀ є҆мѹ̀ и҆ ѡ҆богатѝ є҆го̀,
12 сохранѝ є҆го̀ ѿ вра҄гъ, и҆ ѿ навѣ́тѹющихъ защитѝ є҆го̀, и҆ по́двигъ крѣ́покъ на побѣ́дѹ дадѐ є҆мѹ̀, да ѹ҆вѣ́сть, ѩ҆́кѡ всѣ́хъ сильнѣ́е є҆́сть бл҃гоче́стїе.
13 Сїѧ̀ прода́наго првдника не ѡ҆ста́ви, но ѿ грѣха̀ и҆зба́ви є҆го̀: сни́де съ ни́мъ въ ро́въ,
14 и҆ во ѹ҆́захъ не ѡ҆ста́ви є҆го̀, до́ндеже принесѐ є҆мѹ̀ ски́птръ ца́рствїѧ и҆ вла́сть на мѹ́чащихъ є҆го̀: лжи́выхъ же показа̀, поро́къ сотво́ршихъ на́нь, и҆ дадѐ є҆мѹ̀ сла́вѹ вѣ́чнѹю.
15 Сїѧ̀ люде́й преподо́бныхъ и҆ сѣ́мѧ непоро́чное и҆зба́ви ѿ ѩ҆зы҄къ ѡ҆скорблѧ́ющихъ:
16 вни́де въ дѹ́шѹ раба̀ гд҇нѧ и҆ воста̀ проти́вѹ царе́й стра́шныхъ въ чѹдесѣ́хъ и҆ зна́менїихъ.
17 Воздадѐ преподѡ́бнымъ мздѹ̀ трѹдѡ́въ и҆́хъ, наста́ви и҆̀хъ въ пѹ́ть ди́венъ и҆ бы́сть и҆̀мъ въ покро́въ дне́мъ и҆ въ пла́мень ѕвѣ́здъ въ нощѝ.
18 Преведѐ и҆̀хъ но мо́рю чермно́мѹ и҆ проведѐ и҆̀хъ сквозѣ̀ во́дѹ мно́гѹ:
19 враги́ же и҆́хъ потопѝ и҆ и҆з̾ глѹбины̀ бе́здны и҆зри́нѹ и҆̀хъ.
20 Сегѡ̀ ра́ди пра́веднїи взѧ́ша кѡры́сти нечести́выхъ и҆ воспѣ́ша, гд҇и, и҆́мѧ ст҃о́е твоѐ, и҆ ѡ҆долѣ́телницѹ рѹ́кѹ твою̀ похвали́ша є҆динодѹ́шнѣ:
21 ѩ҆́кѡ премѹ́дрость ѿве́рзе ѹ҆ста̀ нѣмы́хъ и҆ ѧ҆зы́ки младе́нцємъ сотворѝ ѩ҆́сны.
Нашли в тексте ошибку? Выделите её и нажмите:
Ctrl + Enter
Книга Премудрости Соломона, 10 глава. Елизаветинская Библия.
Обратите внимание. Номера стихов — это ссылки, ведущие на раздел со сравнением переводов, параллельными ссылками, текстами с номерами Стронга. Попробуйте, возможно, вы будете приятно удивлены.
Public Domain — общественное достояние.
Елизаветинская Библия на церковнославянском языке.
© 1751, 1762, 1756, 1784